គ្រូបង្រៀនជិត ១ពាន់នាក់ រិះគន់មន្ត្រីអប់រំស្រុកបាធាយ មានការយឺតយ៉ាវក្នុងការបើកលុយដែលលោកនាយករដ្ឋមន្ត្រី ហ៊ុន សែន សន្យាផ្ដល់ឲ្យគ្រូបង្រៀនគ្រប់កម្រិត កាលពីដើមសប្ដាហ៍កន្លងទៅនេះ។ ក្រុមគ្រូបង្រៀនទាំងនោះបានដាក់ការសង្ស័យថា អាចមានការកិបកេងលុយរបបឧបត្ថម្ភប្រមាណជាង ២៧លានរៀលនោះទៅប្រើការផ្សេង។
ក៏ប៉ុន្តែ មន្ត្រីអប់រំស្រុកបាធាយ អះអាងថា ពួកគេកំពុងរៀបចំនីតិវិធីក្នុងការផ្ដល់ជូនគ្រូបង្រៀនទាំងនោះទៅតាមដំណាក់កាលហើយ។
ក្រុមគ្រូបង្រៀនជាង ៩រយនាក់ (៩២៨នាក់) នៅទូទាំងស្រុកបាធាយ ចោទប្រកាន់មន្ត្រីដែលបម្រើការនៅការិយាល័យអប់រំក្នុងស្រុកមួយនេះថា បានកិបកេងលុយសរុបជាង ២៧លានរៀល ដែលលោកនាយករដ្ឋមន្ត្រី ហ៊ុន សែន សន្យាផ្ដល់ឲ្យពួកគេកាលពីដើមសប្ដាហ៍កន្លងទៅនេះ ហើយរហូតមកដល់ពេលនេះ លុយទាំងនោះពួកគាត់បញ្ជាក់ថា នៅមិនទាន់ទទួលបាននៅឡើយទេ។
លោក ហៃ ឡុង គ្រូបង្រៀនប្រចាំវិទ្យាល័យមួយក្នុងចំណោមសាលាអប់រំទាំងអស់របស់ស្រុកបាធាយ ខេត្តកំពង់ចាម ឲ្យដឹងនៅថ្ងៃទី២៦ មិថុនា ថា គ្រូបង្រៀនគ្រប់កម្រិតចំនួន ៩២៨នាក់ ស្នើសុំឲ្យប្រធានការិយាល័យអប់រំស្រុកបាធាយ ត្រូវបើកលុយឲ្យបានគ្រប់ចំនួនដូចការផ្ដល់ឲ្យរបស់លោកនាយករដ្ឋមន្ត្រី ហ៊ុន សែន ក្នុងម្នាក់ ៣ម៉ឺនរៀល។ លោកបន្តថា ភាពយឺតយ៉ាវនេះនឹងធ្វើឲ្យប៉ះពាល់ដល់មុខមាត់ និងការសន្យារបស់ប្រមុខដឹកនាំរដ្ឋាភិបាល នៅគ្រាប្រាក់ឧបត្ថម្ភនានាចំនួន ១លានរៀល សម្រាប់សាលារៀននីមួយៗ និងប្រាក់ឧបត្ថម្ភផ្សេងទៀត ត្រូវបានផ្ដល់ឲ្យរួចហើយនោះ៖ «សម្ដេច ហ៊ុន សែន គាត់ប្រគល់លុយឲ្យគ្រូៗម្នាក់ ៣ម៉ឺន បែរជាថ្នាក់លើហ្នឹងយកលុយហ្នឹងបង្វិលទៅការងារផ្សេង។ អ៊ីចឹងមិនចង់ឲ្យថាសន្យាភរភូតកុហកសម្ដេចអ៊ីចឹងទេណា ព្រោះតួលេខគ្រូមួយស្រុកទៅហើយ បែរជាមិនឲ្យលុយវិញ។ រួចហើយភរសម្ដេចយកចែកគ្រូ ប៉ុន្តែឥតបានដល់ដៃគ្រូ យកលុយទៅចាយអីផ្សេងវិញ»។
ស្រដៀងគ្នានេះដែរ គ្រូបង្រៀនមួយចំនួនក្នុងចំណោមគ្រូបង្រៀនជិត ១ពាន់នាក់ បញ្ជាក់ថា តាមការឆ្លើយបំភ្លឺរបស់មន្ត្រីពាក់ព័ន្ធ ដូចជាប្រធានមន្ទីរអប់រំស្រុក និងប្រធានការិយាល័យអប់រំស្រុកបាធាយ និយាយថា លុយដែលលោកនាយករដ្ឋមន្ត្រីផ្ដល់ឲ្យគ្រូបង្រៀនក្នុងម្នាក់ ៣ម៉ឺនរៀលនេះ ត្រូវចំណាយទៅលើកិច្ចការផ្សេងទៅវិញ ពោលគឺមិនបានប្រគល់សម្រាប់គ្រូបង្រៀនដូចការសន្យារបស់លោកនាយករដ្ឋមន្ត្រី ហ៊ុន សែន នោះឡើយ៖ «សម្ដេចថាក្នុងម្នាក់ៗហ្នឹងចំនួន ៣ម៉ឺនរៀល អ៊ីចឹងណាបង។ ថវិកាហ្នឹងអាដែងមិនទាន់បានដល់ដៃបុគ្គលិកជាលោកគ្រូអ្នកគ្រូហ្នឹងនៅឡើយទេ។ កាកបាទក្រហម កូនសិស្សកាយរឹទ្ធិអីហ្នឹង គេបានលុយភ្លាមៗ ចំណែកគ្រូម្នាក់ ៣ម៉ឺនហ្នឹង បែរជាអត់បានវិញ។ គេថាលុយហ្នឹងគេទុកចាត់ចែងថ្លៃរោងថ្លៃអីណាណោះវិញ។ ទំនាក់ទំនងទៅថ្នាក់លើនៅការិយាល័យស្រុកហ្នឹង គេថាគេយកលុយហ្នឹងមកសម្រាប់ទូទាត់ ទូទាត់ពេលសម្ដេចមកអស់ប៉ុន្មានៗអីអ៊ីចឹងអ្ហា»។
ការខកខាននេះ ធ្វើឡើងក្នុងរយៈពេល ៣ថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន សម្ពោធដាក់ឲ្យប្រើប្រាស់ និងបញ្ចុះខណ្ឌសីមាវត្តរាមាជើងព្រៃ នៅស្រុកបាធាយ កាលពីថ្ងៃទី២៤ មិថុនា។
ក៏ប៉ុន្តែ ប្រធានការិយាល័យអប់រំស្រុកបាធាយ លោក អុន លៀងអាន បញ្ជាក់យ៉ាងខ្លីថា អង្គភាពរបស់លោកកំពុងរៀបចំថវិកាទាំងនេះ និងពន្លឿននីតិវិធីដើម្បីផ្ដល់ជូនលោកគ្រូអ្នកគ្រូដែលបានចូលរួមកាលពីថ្ងៃទី២៤ មិថុនា ឲ្យបានគ្រប់ៗគ្នា៖ «ខ្ញុំកំពុងតែចាត់ចែងហើយ។ ចាត់ចែងបានមួយចំនួននៅមួយចំនួនទៀតដែលនៅឆ្ងាយៗ»។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ គិតថា ដើម្បីដោះស្រាយបញ្ហានេះ ផ្នែកពាក់ព័ន្ធគួរចាត់វិធានការឲ្យមានប្រសិទ្ធភាព និងឆ្លើយតបឲ្យទាន់ពេលវេលាក្នុងន័យថា ដើម្បីរួមចំណែកកាត់បន្ថយអំពើពុករលួយនៅក្នុងវិស័យអប់រំ៖ «ហើយអ្នកដែលទទួលលុយហ្នឹង ត្រូវតែចែកទៅតាមអ្វីដែលម្ចាស់លុយចង្អុលបង្ហាញ ថាឲ្យលោកគ្រូអ្នកគ្រូម្នាក់ ៣ម៉ឺន ត្រូវតែឲ្យម្នាក់ ៣ម៉ឺន មិនអាចយកលុយរបស់លោកនាយករដ្ឋមន្ត្រី បង្វែរទៅប្រើប្រាស់អ្វីផ្សេង។ អាហ្នឹងវាជារឿងមួយខុសធ្ងន់ធ្ងរហើយ។ ហើយយើងគិតថាលោកនាយករដ្ឋមន្ត្រីឮតាមរយៈវិទ្យុអាស៊ីសេរី នឹងមានវិធានការជុំវិញបញ្ហាអស់ហ្នឹង»។
ប្រព័ន្ធអប់រំនៅក្នុងប្រទេសកម្ពុជា ត្រូវរងការរិះគន់ថា ជាស្ថាប័នមួយដែលធ្វើកំណែទម្រង់យឺតយ៉ាវក្នុងការប្រយុទ្ធប្រឆាំងនឹងអំពើរលួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។