ខេត្តឧត្តរមានជ័យ ដែលមានព្រំដែនជាប់គ្នាជាមួយប្រទេសថៃ ស្ថិតនៅជាប់ជួរភ្នំដងរែក គឺជាតំបន់ខ្ពស់។ បច្ចុប្បន្ន ក្នុងពេលដែលរដ្ឋាភិបាលកម្ពុជា កំពុងតែត្រៀមលក្ខណៈជួយបណ្ដាខេត្តមួយចំនួន ដែលនៅតាមដងទន្លេមេគង្គ ដែលរងគ្រោះទឹកជំនន់ បែរជាខេត្តឧត្តរមានជ័យ រងការគំរាមកំហែងដោយគ្រោះរាំងស្ងួតទៅវិញ។
មន្ត្រីផ្នែកផែនការរបស់មន្ទីរកសិកម្ម ខេត្តឧត្តរមានជ័យ គឺលោក គាំ វុទ្ធីធន។ លោកមានប្រសាសន៍កាលពីរសៀលថ្ងៃច័ន្ទ ទី២៥ ខែសីហា ថា គិតត្រឹមថ្ងៃទី២២ ខែសីហា រហូតមកដល់ពេលនេះ គ្រោះរាំងស្ងួតកំពុងគំរាមកំហែងសំណាប និងសន្ទូង លើផ្ទៃដីជាង ៥.១០០ហិកតារ។ ការគំរាមកំហែងនេះ គឺនៅលើស្រុកចំនួន៤ ដូចជា ក្រុងសំរោង មានសំណាប និងសន្ទូងចំនួន ១.១៥៧ហិកតារ ស្រុកចុងកាល់ មាន ៧០០ហិកតារ នៅស្រុកបន្ទាយអំពិល មាន ៣.១៧៩ហិកតារ និងស្រុកត្រពាំងប្រាសាទ មាន ១១៥ហិកតារ ដែលកំពុងគំរាមកំហែងដោយគ្រោះរាំងស្ងួតនេះ។
មន្ត្រីដដែលបញ្ជាក់ថា ក្នុងតួលេខ សន្ទូង និងសំណាបដែលកំពុងទទួលរងការគំរាមកំហែងពីគ្រោះរាំងស្ងួតនោះ គឺផ្ទៃដីចំនួនជាង ៤៧០ហិកតារ នៅស្រុកបន្ទាយអំពិល បានខូចខាត៖ «បើសិនជាមានភ្លៀងធ្លាក់ច្រើន យើងអាចសង្គ្រោះស្រូវមកវិញបានខ្លះ! ឥឡូវថ្ងៃនេះថ្ងៃច័ន្ទ ជិតពុធ ទៀតហើយ អត់ទាន់មានឃើញភ្លៀងធ្លាក់ អ៊ីចឹងវាអាចបង្កការខូចខាតជាបន្តទៅទៀត។ ក្នុងរយៈពេល១សប្ដាហ៍ទៀត បើសិនជាអត់មានភ្លៀងសោះ គឺអាចបង្កឱ្យមានការខូចខាតរហូតដល់ទៅរាប់ពាន់ហិកតារ»។
អាជ្ញាធរស្រុកបន្ទាយអំពិល ខេត្តឧត្តរមានជ័យ ឱ្យដឹងថា គេកំពុងប្រឹងប្រែងអស់ពីលទ្ធភាព ដើម្បីជួយសង្គ្រោះសំណាប និងសន្ទូងរបស់ប្រជាកសិករ ដែលកំពុងគំរាមកំហែងដោយគ្រោះរាំងស្ងួតនោះ។
អភិបាលរងស្រុកបន្ទាយអំពិល លោក ហ៊ីង ហឿន មានប្រសាសន៍ថា អាជ្ញាធរ និងមន្ទីរពាក់ព័ន្ធមួយចំនួនទៀត មានការពិបាកក្នុងការជួយសង្គ្រោះសំណាប និងសន្ទូងកសិករ នៅក្នុងឃុំទាំង៤ ពីគ្រោះរាំងស្ងួត ដោយសារតែកន្លែងខ្លះពុំមានប្រភពទឹកសោះ។ លោក ហ៊ីង ហឿន បញ្ជាក់ថា ២-៣ថ្ងៃមុននេះ គឺមានភ្លៀងធ្លាក់ខ្លះនៅក្នុងស្រុករបស់លោក ក៏ប៉ុន្តែលោកមិនដឹងថា សំណើមដោយសារទឹកភ្លៀង អាចនឹងជួយសង្គ្រោះសន្ទូងសំណាបបានដែរឬក៏យ៉ាងណា៖ «ខាងមន្ទីរធនធានទឹក ហើយនិងខាងកសិកម្ម គេជួយអន្តរាគមន៍តាមលទ្ធភាពដែលគេមាន គឺអាចចែកប្រេងសម្រាប់ម៉ាស៊ីនបូមទឹកខ្លះ ក៏ប៉ុន្តែវាមិនអាចបានគ្រប់ឃុំទាំង៤ ដោយសារតំបន់ខ្លះវាអត់មានប្រភពទឹក។ ប៉ុន្តែយើងមិនអាចទាន់វាយតម្លៃថា វាខូច ១០០% ទេ ដោយសារយើងមានសំណើមភ្លៀងខ្លះ។ ពីនេះទៅមុខទៀត បើថាវារាំងនោះ គឺវាអាចធ្វើឱ្យប៉ះពាល់ផលដំណាំស្រូវអាចខូចខាតដែរ»។
នៅខេត្តឧត្តរមានជ័យ មានស្រូវខ្លះកំពុងរងការគំរាមកំហែងដោយគ្រោះរាំងស្ងួត ហើយមានស្រូវខ្លះទៀតរងការប៉ះពាល់ ដោយសារទឹកជំនន់ម្ដងមកហើយ។
មន្ត្រីមន្ទីរកសិកម្មអះអាងថា កាលពីដើមខែសីហា កន្លងទៅ មានស្រូវចំនួនជាង ១១០ហិកតារ បានទទួលរងការប៉ះពាល់ដោយសារគ្រោះធម្មជាតិទឹកជំនន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។