សហគមន៍ជនជាតិដើមភាគតិចនៅខេត្តរតនគិរី អំពាវនាវសុំឲ្យអាជ្ញាធរខេត្តជួយទប់ស្កាត់ការប្រើប្រាស់គ្រឿងញៀន ដែលកំពុងហូរចូលទៅដល់ស្រទាប់យុវជនយុវនារីជនជាតិដើមភាគតិច គួរឲ្យបារម្ភ។ ចំណែកមន្ត្រីឃ្លាំមើលសិទ្ធិមនុស្សកត់សម្គាល់ថា ការប្រើប្រាស់គ្រឿងញៀននៅក្នុងសហគមន៍ជនជាតិដើម ធ្វើឲ្យកើតមានអំពើហិង្សាក្នុងគ្រួសារ និងអំពើលួចប្លន់កាប់សម្លាប់ផ្ទុយទៅនឹងប្រពៃណីវប្បធម៌ជនជាតិដើម។
ការព្រួយបារម្ភនេះ កើតមានបន្ទាប់ពីអ្នកភូមិប្រទះឃើញកម្មករចំណាកស្រុក បាននាំគ្នាលួចជក់គ្រឿងញៀនជាញឹកញាប់នៅតាមចម្ការក្បែរភូមិ។ ទន្ទឹមនោះដែរ កម្មករចំណាកស្រុកខ្លះបានទាក់ទាញយុវជនជនជាតិដើមជាមិត្តភ័ក្ដិ ឲ្យប្រើប្រាស់គ្រឿងញៀននេះជាមួយពួកគេទៀតផង។
តំណាងសហគមន៍ភូមិគងយុ ឃុំប៉ាតេ ស្រុកអូរយ៉ាដាវ លោក សេវ ទ្វែល កត់សម្គាល់ថា នាពេលថ្មីៗនេះ កូនចៅអ្នកភូមិខ្លះបានក្លាយជាអ្នកប្រើប្រាស់គ្រឿងញៀន។ ដូច្នេះ ករណីនេះជាសញ្ញាបញ្ជាក់ថា គ្រឿងញៀនកំពុងហូរចូលមកក្នុងសហគមន៍ជនជាតិដើមភាគតិច និងបង្កផលវិបាកដល់សមាជិកសហគមន៍ផ្សេងទៀត។ លោកបន្តថា សហគមន៍បានផ្តល់ព័ត៌មានជូនសមត្ថកិច្ចប៉ូលិសមូលដ្ឋានពីករណីនេះ ក៏ប៉ុន្តែក្រុមអ្នកប្រើប្រាស់គ្រឿងញៀនទាំងនោះ មិនទាន់ត្រូវបានបង្ក្រាបនៅឡើយ៖ «ទើបមានឆ្នាំនេះទេ វាទាក់ទងក្មេងជនជាតិដើមភាគតិចចារ៉ាយ ភូមិគងធំ ពីរបីនាក់ វាជក់ដែរ មានន័យថា ប៉ះពាល់វប្បធម៌ជនជាតិដើមភាគតិច វាកាចសាហាវ វាធ្វើបាបបំផ្លិចបំផ្លាញឪពុកម្តាយណា»។
សមត្ថកិច្ចប៉ូលិសប្រឆាំងការជួញដូរគ្រឿងញៀនខេត្តរតនគិរី ឲ្យដឹងថា ទីតាំងនៃការជួញដូរ និងប្រើប្រាស់គ្រឿងញៀនមាន ៤គោលដៅសំខាន់ៗ រួមមាន ស្រុកវ៉ឺនសៃ ស្រុកអណ្ដូងមាស ស្រុកអូរយ៉ាដាវ និងក្រុងបានលុង។ ដោយឡែកនៅបណ្ដាស្រុកផ្សេងទៀត ក៏មានសកម្មភាពប្រើប្រាស់គ្រឿងញៀនទ្រង់ទ្រាយតូចៗដែរ។
យ៉ាងណាមិញ អធិការប៉ូលិសស្រុកអូរយ៉ាដាវ លោក ជួប វណ្ណារ៉ាក់ ទទួលស្គាល់ថា អ្នកភូមិបានផ្តល់ព័ត៌មានពីការប្រើប្រាស់គ្រឿងញៀននេះមកប៉ូលិស ក៏ប៉ុន្តែទីតាំងដែលមានការប្រើប្រាស់គ្រឿងញៀន ធ្វើឡើងក្នុងចម្ការកៅស៊ូធំទូលាយ មិនអំណោយផលឲ្យសមត្ថកិច្ចបង្ក្រាបក្រុមអ្នកប្រើប្រាស់គ្រឿងញៀនបាន។ លោកថា អ្នកភូមិត្រូវសហការគ្នាឃាត់ទុកអ្នកប្រើប្រាស់គ្រឿងញៀន កាលណាអ្នកភូមិប្រទះឃើញ ហើយផ្តល់ដំណឹងមកសមត្ថកិច្ចទាន់ពេលវេលា ទើបការបង្ក្រាបមានប្រសិទ្ធភាព៖ «វាពិបាកកន្លែងទីតាំងនៅតាមចម្ការ ទម្រាំយើងទៅដល់វាទៅផុតអស់។ យើងសុំកិច្ចសហការពីអ្នកភូមិអ៊ីចឹងដែរណា»។
ចាប់ពីពាក់កណ្ដាលខែវិច្ឆិកា ឆ្នាំ២០១៤ រហូតបច្ចុប្បន្ន សមត្ថកិច្ចប៉ូលិសខេត្តរតនគិរី បង្ក្រាបបានការជួញដូរ និងប្រើប្រាស់គ្រឿងញៀន ៩ករណី ឃាត់ខ្លួនជនជាប់សង្ស័យបាន ១៣នាក់ បញ្ជូនទៅតុលាការ និងរឹបអូសគ្រឿងញៀនម្សៅប្រភេទម៉ាទឹកកក ៣០កូនថង់ ម៉ូតូ ៩គ្រឿង ទូរស័ព្ទ ៧គ្រឿង និងដាវសាម៉ារ៉ៃ ៤ដើម។
ទាក់ទិនការប្រើប្រាស់គ្រឿងញៀននេះដែរ ស្នងការរងប៉ូលិសខេត្តរតនគិរី ទទួលបន្ទុកប្រឆាំងបទល្មើសគ្រឿងញៀន លោក វ៉ាន់ សង្វាត ទទួលស្គាល់ដែរថា សមត្ថកិច្ចប៉ូលិសបង្ក្រាបអ្នកជួញដូរ និងប្រើប្រាស់គ្រឿងញៀនបានជាបន្តបន្ទាប់ ទើបធ្វើឲ្យសកម្មភាពនេះបានថយចុះនៅឆមាសដើមឆ្នាំ២០១៥ នេះ៖ «បង្ក្រាបហូរហែ ដល់ឥឡូវចុះបង្ក្រាបបន្តកាត់បន្ថយបានច្រើន»។
យ៉ាងណាក៏ដោយ មន្ត្រីឃ្លាំមើលសិទ្ធិមនុស្សសមាគមអាដហុក (adhoc) ខេត្តរតនគិរី លោក ឆាយ ធី ចាត់ទុកការហូរចូលគ្រឿងញៀនទៅកាន់តំបន់ជនជាតិដើមភាគតិច គឺជាគ្រោះថ្នាក់ធ្ងន់ធ្ងរសម្រាប់អ្នកភូមិដែលយល់ដឹងនៅមានកម្រិត។ លោកថា ក្រុមសមត្ថកិច្ចត្រូវចាត់វិធានការម៉ឺងម៉ាត់អប់រំផ្សព្វផ្សាយដល់សហគមន៍ ពីផលវិបាកនៃការប្រើប្រាស់គ្រឿងញៀនឲ្យបានទូលំទូលាយបន្ថែមទៀត៖ «ថ្ងៃខាងមុខ ប្រសិនគ្មានការទប់ស្កាត់ទេ នឹងមានការប្រឈមការប្រើប្រាស់គ្រឿងញៀននៅតាមតំបន់មូលដ្ឋានជនជាតិដើមភាគតិច។ ឥឡូវនេះ យុវជនយុវនារីមួយចំនួនកំពុងនាំគ្នាប្រើប្រាស់គ្រឿងញៀន តាមរយៈកម្មករខ្មែរ និងកម្មករបច្ចេកទេសវៀតណាម តាមក្រុមហ៊ុន»។
កាលពីពាក់កណ្ដាលខែមិថុនា នគរបាលប្រឆាំងគ្រឿងញៀន សហការជាមួយព្រះរាជអាជ្ញាថ្នាក់ជាតិ បានបើកប្រតិបត្តិការបង្ក្រាបទីតាំងផលិត និងស្តុកគ្រឿងញៀន ៥គោលដៅ។ ៤ទីតាំងនៅភ្នំពេញ និងមួយទីតាំងទៀតនៅខេត្តស្ទឹងត្រែង។ សមត្ថកិច្ចចាប់ខ្លួនជនសង្ស័យបាន ៤នាក់ ជាអ្នកបច្ចេកទេសកែច្នៃគ្រឿងញៀន មេខ្លោងជួញដូរ រួមជាមួយគ្រឿងញៀនទម្ងន់ជិត ៥៥គីឡូក្រាម ដែលមានតម្លៃប្រមាណជិត ៣លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។