ប៉ុន្តែយ៉ាងណាក៏ដោយ អ្នកជំនាញសេដ្ឋកិច្ចបានព្យាករថា កំណើនសេដ្ឋកិច្ចកម្ពុជា មិនឡើងខ្ពស់ដូចការរំពឹងទុករបស់រដ្ឋាភិបាលនោះទេ។
លោកនាយករដ្ឋមន្ត្រី ហ៊ុន សែន បានព្យាករណ៍ថា កំណើនសេដ្ឋកិច្ចកម្ពុជា មានអត្រាច្រើនជាង ៧% ដោយពឹងលើដំណាំស្រូវ និងជលផល។
នៅក្នុងសន្និសីទទស្សនវិស័យប្រទេសកម្ពុជា ឆ្នាំ២០១៣ ក្រោមប្រធានបទ "ការពង្រឹងអនាគតប្រទេសកម្ពុជា ស្បៀងអាហារ ថាមពល និងធនធានធម្មជាតិ" នៅសណ្ឋាគារអាំងទែកុងទីណង់តាល់ (InterContinental Hotel) រៀបចំដោយវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (ស៊ីឌីអរអាយ = CDRI) និងធនាគារអេអ៊ិនហ្សិត រូយ៉ាល់ (ANZ Royal) នៅថ្ងៃទី២០ ខែកុម្ភៈ លោកនាយករដ្ឋមន្ត្រី ហ៊ុន សែន បានថ្លែងថា ទស្សនវិស័យនៅពេលអនាគតសម្រាប់កម្ពុជា មានភាពវិជ្ជមាន សេដ្ឋកិច្ចកម្ពុជា ត្រូវបានព្យាករថានឹងមានកំណើនច្រើនជាង ៧% ក្នុងមួយឆ្នាំ ក្នុងរយៈពេលមធ្យម ឬ ៥ឆ្នាំ។
លោកបានបញ្ជាក់ថា កំណើនខ្លាំងជាងគេនោះ គឺបានមកពីវិស័យកសិកម្ម ជាពិសេស គឺដំណាំស្រូវប្រាំង និងនេសាទ៖ «ឥឡូវ តួលេខជាបណ្ដោះអាសន្ន យើងប្រើត្រឹម ៧,៣%។ មុននេះ យើងនិយាយអំពីកំណើនរបស់យើងក្នុងឆ្នាំ២០១២ នេះ គឺគេហៅជុំវិញ ៧% ជុំវិញ ៧% មានន័យថាអាចក្រោម ៧% បន្តិច អាចលើ ៧% បន្តិច។ វិទ្យាស្ថានស្ថិតិនៃក្រសួងផែនការ បានផ្ដល់មកនូវការវាយតម្លៃ គឺឃើញ ៧,៧% ឯណោះ។ ប៉ុន្តែម្សិលមិញ ក្រុមប្រឹក្សាគោលនយោបាយសេដ្ឋកិច្ចរបស់យើងបានធ្វើការពិនិត្យផ្ទៀងផ្ទាត់ ក៏ឃើញថា មានតែ ៧,៣%។ ដូច្នេះ ពេលនេះយើងនៅបន្តប្រើប្រាស់អត្រាកំណើន ៧,៣% ជាបណ្ដោះអាសន្នសិន ហើយជាធម្មតា ការវាយតម្លៃសេដ្ឋកិច្ចនៅកម្ពុជា រហូតទៅដល់ខែមិថុនា ទើបបានបញ្ចប់»។
ទាក់ទងបញ្ហានេះ ប្រធានមជ្ឈមណ្ឌលអភិវឌ្ឍន៍កសិកម្មកម្ពុជា សេដាក (Cedac) លោកបណ្ឌិត យ៉ង សាំងកុមារ មានប្រសាសន៍ថា ទាក់ទងទៅនឹងការរួមចំណែកនៃដំណាំស្រូវក្នុងកំណើនសេដ្ឋកិច្ចនេះ លោកថា បើគិតពីផលិតផល ឬបរិមាណស្រូវ វាអាចត្រូវខ្លះដែរ ដោយសារតែផលិតស្រូវបានកើនឡើងជាងឆ្នាំមុន ប៉ុន្តែបើគិតអំពីទឹកប្រាក់វិញ គឺអាចខុស ដោយសារតែតម្លៃស្រូវធ្លាក់ចុះ។
លោកបណ្ឌិត យ៉ង សាំងកុមារ៖ «បើយើងគិតពីបរិមាណស្រូវដែលប្រជាជនគាត់ផលិតបាននោះ សម្រាប់ស្រូវប្រាំង និងស្រូវវស្សានោះ គឺយើងអាចចាត់ទុកថាវាមានកំណើនខ្លះៗដែរ។ ប៉ុន្តែទាក់ទងការវាយតម្លៃលើស្ថានភាពជាក់ស្ដែងនោះ គឺបើយើងគិតជាទឹកលុយវិញ វាហាក់ដូចជាមិនមានការកើនអីទេ ដោយសារតម្លៃស្រូវបច្ចុប្បន្នវាថោកជាងឆ្នាំទៅ កាលពីឆ្នាំទៅតម្លៃស្រូវមានតម្លៃគួរសម ខ្ទង់ប្រហែលជា ៨០០រៀលក្នុងមួយគីឡូ ស្រូវប្រាំងក៏ដូចជាស្រូវវស្សា លើកលែងតែស្រូវក្រអូបបាយទន់ទេ វាមានតម្លៃលើស ១ពាន់រៀលក្នុងមួយគីឡូ។ បើយើងផ្អែកលើយកតម្លៃស្រូវមកគុណនឹងបរិមាណស្រូវវិញ ហាក់ដូចជាមិនមានកំណើនអីធំដុំទេ វាអាចនៅដដែល គិតជាទឹកលុយវាអាចទាប»។
ក្នុងសន្និសីទនោះ វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា ក៏បានចេញផ្សាយនូវរបាយការណ៍ស្ដីពីការព្យាករណ៍កំណើនសេដ្ឋកិច្ចរបស់កម្ពុជា ឆ្នាំ២០១៣ ដែលនឹងមានប្រមាណ ៧%។ កំណើនសេដ្ឋកិច្ចរបស់កម្ពុជា នៅឆ្នាំ២០១៣ គឺមានកំណើនល្អប្រសើរជាងឆ្នាំ២០១២ ដែលមាន ៦,៥%។
ប៉ុន្តែធនាគារពិភពលោក (World Bank) ធនាគារអភិវឌ្ឍន៍អាស៊ី (ADB) មូលនិធិរូបិយវត្ថុអន្តរជាតិ (IMF) បានព្យាករកំណើនសេដ្ឋកិច្ចកម្ពុជា ឆ្នាំ២០១៣ មានចន្លោះពី ៦,៥ ទៅ ៦,៧%។
នៅក្នុងសេចក្ដីប្រកាសព័ត៌មាន នាយកប្រតិបត្តិស៊ីឌីអរអាយ លោក ឡូរី ស្ត្រែង (Larry Strange) បានថ្លែងថា ដើម្បីឈានទៅមុខបានមួយជំហានធំនោះ កម្ពុជា ត្រូវធ្វើការកែលំអច្រើនថែមទៀត ខាងផ្នែកហេដ្ឋារចនាសម្ពន្ធ បរិយាកាសអាជីវកម្ម ការវិនិយោគកសាងធនធានមនុស្ស ការគ្រប់គ្រងធនធានធម្មជាតិដែលអាចជឿជាក់បាន ការគ្រប់គ្រងម៉ាក្រូសេដ្ឋកិច្ច និងជាពិសេសការបន្តពង្រឹងផ្នែកស្ថាប័ន និងអភិបាលកិច្ច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។