ក្រសួងអប់រំយុវជននិងកីឡា ចេញសេចក្ដីជូនដំណឹងដល់ប្រធានមន្ទីរអប់រំ ទាំងអស់នៅគ្រប់ខែត្ររាជធានី ដើម្បីរៀបចំប្រឡងឡើងវិញ ចំពោះសិស្សថ្នាក់ទី១២ ដែលមានមធ្យមភាគពិន្ទុប្រចាំឆ្នាំក្រោម ២៥ពិន្ទុនោះ។
ការចេញសេចក្ដីណែនាំរបស់ក្រសួងអប់រំយុវជននិងកីឡានេះ ធ្វើឡើងនៅក្រោយពេលសិស្សនៅតាមបណ្ដាខែត្រមួយចំនួនដែលប្រឡងធ្លាក់នោះ ធ្វើការតវ៉ា និងឡើងមកសុំសិទ្ធិប្រឡងថ្នាក់ជាតិពីរដ្ឋមន្ត្រីក្រសួងអប់រំ។
មន្ត្រីមន្ទីរអប់រំយុវជននិងកីឡា ខែត្រកំពង់ធំ ឲ្យដឹងថា លោកបានចែកលិខិតណែនាំរបស់ក្រសួងអប់រំទៅកាន់នាយកវិទ្យាល័យចំនួន២២ ក្នុងខែត្រកំពង់ធំ រួចហើយ ដើម្បីឲ្យរៀបចំការប្រឡងអោយកូនសិស្សដែលប្រឡងធ្លាក់ពិន្ទុប្រចាំឆ្នាំនោះឡើងវិញ។
ប្រធានការិយាល័យមធ្យមសិក្សានៃមន្ទីរអប់រំយុវជននិងកីឡា ខែត្រកំពង់ធំ លោក សុខ លេនីន ឲ្យដឹងនៅថ្ងៃទី១០ កក្កដា ថា លោកបានអនុវត្តទៅតាមសេចក្ដីណែនាំរបស់ក្រសួងអប់រំយុវជននិងកីឡា រួចហើយ តែការរៀបចំប្រឡងចំពោះសិស្សរៀនធ្លាក់ពិន្ទុប្រចាំឆ្នាំនៅថ្ងៃណាមួយនោះ គឺអាស្រ័យលើការចាត់ចែងរបស់នាយកសាលានីមួយៗ។
«សំឡេង»
វិទ្យាល័យទាំងអស់នៅខែត្រកំពង់ធំ មានចំនួន ២២ និងមានសិស្សសរុបទាំងអស់ ៣.៨៨៦នាក់។ លោក សុខ លេនីន បញ្ជាក់ថា មកទល់ពេលនេះលោកមិនទាន់ទទួលបានស្ថិតិថា សិស្សនៅវិទ្យាល័យក្នុងខែត្រកំពង់ធំ ទាំងអស់មានចំនួនប៉ុន្មាននាក់ពិតប្រាកដ ដែលប្រឡងធ្លាក់ពិន្ទុមធ្យមភាគនោះទេ។
នៅក្នុងសេចក្ដីជូនដំណឹងរបស់ក្រសួងអប់រំយុវជននិងកីឡានេះ ការរៀបចំប្រឡងឡើងវិញចំពោះសិស្សថ្នាក់ទី១២ មានពិន្ទុមធ្យមភាគក្រោម២៥នោះ គឺរៀបចំប្រឡងទៅតាមមុខវិជ្ជាដែលសិស្សម្នាក់ធ្លាក់មធ្យមភាគ ដើម្បីវាយតម្លៃសមត្ថភាពចុងក្រោយមុននឹងសម្រេចដកសិទ្ធិជាបេក្ខភាពប្រឡងសញ្ញាប័ត្រមធ្យមសិក្សាទុតិយភូមិ។ បញ្ជីដកបេក្ខភាពនេះ ត្រូវផ្ដល់មកនាយកដ្ឋានមធ្យមសិក្សាចំណេះដឹងទូទៅឲ្យបានមុនថ្ងៃទី១៦ កក្កដា ឆ្នាំ២០១៤។
ការចេញសេចក្ដីណែនាំរបស់ក្រសួងអប់រំដែលចុះហត្ថលេខាដោយលោករដ្ឋមន្ត្រី ហង់ ជួនណារ៉ុន ថ្ងៃទី៩ កក្កដា ធ្វើឡើងនៅបន្ទាប់ពីសិស្សវិទ្យាល័យ ហ៊ុន សែន តាំងគោកជាង ៣០នាក់ឡើងមកសុំសិទ្ធិប្រឡងពីរដ្ឋមន្ត្រីក្រសួងអប់រំ កាលពីថ្ងៃទី៧ កក្កដា បន្ទាប់ពីពួកគេបានប្រឡងប្រចាំឆ្នាំមានពិន្ទុមធ្យមភាគក្រោម ២៥ ដែលការកែទម្រង់របស់ក្រសួងអប់រំមិនអនុញ្ញាតឲ្យសិស្សថ្នាក់ទី១២ ណាម្នាក់មានសិទ្ធិប្រឡងនោះទេ បើសិនជាមិនមានពិន្ទុលើសពី២៥ ទេនោះ។
សិស្សវិទ្យាល័យ ហ៊ុន សែន តាំងគោក ដែលនាំគ្នាមកភ្នំពេញនោះ បានលើកហេតុផលថា ពួកគាត់នៅឆ្ងាយពីសាលាគ្មានលុយរៀនគួរ គួបផ្សំនឹងគ្រូ បន្ទុកថ្នាក់បង្រៀនមិនយកចិត្តទុកដាក់ទើបបណ្ដាលឲ្យពួកគេប្រឡងធ្លាក់ ដូច្នេះហើយបានជាពួកគេស្នើសុំមកក្រសួងសុំមានសិទ្ធិប្រឡងនោះ។
នាយករងវិទ្យាល័យ ហ៊ុន សែន តាំងគោក លោក ស៊ឹម ស៊ីន លើកឡើងថា លោកនឹងធ្វើតាមការណែនាំរបស់ក្រសួង តែលោកនិងនាយកសាលាមួយចំនួនទៀតមិនពេញចិត្តចំពោះការអនុគ្រោះរបស់ក្រសួងនេះទេ បើសិនជាធ្វើដូច្នេះគុណភាពអប់រំនៅតែមិនល្អដដែល។
«សំឡេង»
លោក ស៊ឹម ស៊ីន មានប្រសាសន៍ថា សិស្សថ្នាក់ទី១២ នៅវិទ្យាល័យរបស់លោកមានជិត ២០០នាក់ ក្នុងនោះអ្នកប្រឡងធ្លាក់មាន ៥២នាក់ ហើយលោកនឹងរៀបចំឲ្យសិស្សប្រលងធ្លាក់តាមការណែនាំរបស់ក្រសួងនេះនៅថ្ងៃទី១២ កក្កដា នេះ។ លោក ស៊ឹម ស៊ីន បដិសេធថា សិស្សដែលប្រលងធ្លាក់មធ្យមភាគមួយចំនួនបានរៀនគួរដូចសិស្សដទៃដែរ។ ចំពោះគ្រូបង្រៀនក្នុងម៉ោងរដ្ឋវិញ គឺបង្រៀនយកចិត្តទុកដាក់តែសិស្សទៅវិញទេ ដែលខ្ជិល ខ្លះមិនចូលសាលា និងពួកគាត់រៀនខ្សោយតាំងពីថ្នាក់ក្រោម។
សម័យប្រលងសញ្ញាប័ត្រទុតិយភូមិនឹងប្រព្រឹត្តទៅនៅថ្ងៃទី៤ ទី៥ ខែសីហា ឆ្នាំ២០១៤ ខាងមុខ។ បេក្ខជនប្រឡងទាំងអស់មានប្រមាណ ១សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។