ក្រសួងអប់រំយុវជន និងកីឡា នៅតែចាត់ទុកការរឹតបន្តឹង និងការយកចិត្តទុកដាក់លើការប្រឡងគឺជារឿងសំខាន់ ដើម្បីលើកកម្ពស់គុណភាពវិស័យអប់រំនៅកម្ពុជា។ ការប្រឡងសញ្ញាប័ត្រមធ្យមសិក្សាទុតិយភូមិ ឬហៅថា បាក់ឌុប ឆ្នាំ១០១៥ ដែលនឹងប្រព្រឹត្តិទៅនៅពេលខាងមុខនេះ ក្រសួងបានបង្ហាញជំហរបន្តរឹតបន្តឹងដូចឆ្នាំមុនដដែល ព្រមទាំងឈរលើគោលការណ៍ ៤ចំណុច។
គោលការណ៍ ៤ចំណុច ដែលក្រសួងបន្តរក្សា ដើម្បីពង្រឹងវិស័យអប់រំនៅកម្ពុជា សម្រាប់ការប្រឡងសញ្ញាប័ត្រ បាក់ឌុប ដែលនឹងប្រព្រឹត្តទៅនៅថ្ងៃទី២៤ ខែសីហា ខាងមុខនេះ គឺការប្រឡងត្រូវតែឈរលើការគោរពច្បាប់ តម្លាភាព យុត្តិធម៌ និងសុចរិតភាព។
នាយកខុទ្ទកាល័យ និងជាអ្នកនាំពាក្យក្រសួងអប់រំយុវជន និងកីឡា លោក រស់ សាលីន បានឲ្យដឹងថា ក្រសួងបន្តរឹតបន្តឹងវិន័យប្រឡងឲ្យអោយដូចការប្រឡងក្នុងឆ្នាំ២០១៤ ដែរ ដោយសហការជាមួយអង្គភាពប្រឆាំងអំពើពុករលួយ សមត្ថកិច្ចក្រសួងមហាផ្ទៃ ដើម្បីរក្សាសន្តិសុខ និងសណ្ដាប់ធ្នាប់ ព្រមទាំងបើកឱកាសឲ្យអង្គការសង្គមស៊ីវិល និងស្ថាប័នពាក់ព័ន្ធចូររួមសង្កេតការណ៍។
លើសពីនេះ ក្រសួងក៏បានពង្រឹងគុណភាពបង្រៀនទាំងគ្រូ ទាំងសិស្ស ដើម្បីសម្រេចគោលការណ៍ទាំង ៤ចំណុចនេះ៖ «ការរឹតបន្តឹងរបស់យើង គឺយើងចង់បានលទ្ធផលឲ្យតែអ្នកចេះត្រូវតែជាប់»។
លោក រស់ សាលីន លើកឡើងទៀតថា ដើម្បីឲ្យសិស្សបានត្រៀមខ្លួនជាមុន ក្រសួងបានបញ្ចូលមេរៀនសង្ខេប ទាំងទ្រឹស្តី ទាំងលំហាត់ ក្នុងគេហទំព័ររបស់ក្រសួងដើម្បីឲ្យសិស្សសិក្សាស្វែងយល់ដោយខ្លួនឯង។ លោកបានឲ្យដឹងទៀតថា ប៉ុន្មានខែចុងក្រោយនេះ ក្រសួងបានបញ្ជូនគ្រូទៅបង្រៀនគួរដល់សិស្សរៀងរាល់ថ្ងៃសៅរ៍ និងអាទិត្យ ទៅលើមុខវិជ្ជា គណិតវិទ្យា ជីវវិទ្យា គីមីវិទ្យា និងរូបវិទ្យា ដល់សិស្សទាំងនៅរាជធានី និងតាមបណ្ដាខេត្ត។ លោកបានអំពាវនាវដល់សិស្សដែលត្រៀមប្រឡងបាក់ឌុប ទាំងអស់ ត្រូវខិតខំសិក្សារៀនសូត្រ ព្រោះក្រសួងនឹងឲ្យធ្លាក់ជាស្វ័យប្រវត្តិចំពោះបេក្ខជនណាដែលមិនគោរពច្បាប់ និងនីតិវិធីប្រឡង៖ «បើបេក្ខជនណាម្នាក់ គាត់ហ៊ានតែយកទូរស័ព្ទចូល ឬមើលប្រ៊ុយយ៉ុង បើយើងតាមទាន់ យើងនឹងឲ្យគាត់ធ្លាក់»។
ក្រសួងអប់រំយុវជន និងកីឡា ឲ្យដឹងថា ការប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុប ឆ្នាំនេះ មានបេក្ខជនជាង ៨៣.៤៨០នាក់ មានមណ្ឌលប្រឡងចំនួន ១៤៩ ដែលស្មើនិង ៣.៥៧៩បន្ទប់។
សេចក្ដីជូនដំណឹងរបស់អង្គភាពប្រឆាំងអំពីពុករលួយ ស្ដីពីការងារសង្កេតការណ៍ការប្រឡងបាក់ឌុបនេះ ដែលបានចេញផ្សាយនៅថ្ងៃទី៦ ខែកក្កដា ឆ្នាំ២០១៥ បានឲ្យដឹងថា បានអំពាវនាវឲ្យអ្នកស្ម័គ្រចិត្តជាសង្គមស៊ីវិល និងបុគ្គលឯកជននានា ធ្វើជាអ្នកសង្កេតការណ៍ប្រឡងបាក់ឌុប ដើម្បីបង្កភាពងាយស្រួលដល់ក្រសួងអប់រំ និងរឹតបន្តឹងគុណភាពអប់រំនៅកម្ពុជា កាន់តែប្រសើរឡើង។
លោកនាយករដ្ឋមន្ត្រី ហ៊ុន សែន ធ្លាប់មានប្រសាសន៍កាលពីថ្ងៃទី១១ ខែឧសភា កន្លងទៅថា ការប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុប នៅឆ្នាំ២០១៥ នេះ នឹងមិនអនុញ្ញាតឲ្យមានអ្នកបើកចម្លងនោះឡើយ ពោលគឺអ្នកប្រឡងជាប់ត្រូវមានសមត្ថភាពពិតប្រាកដ ហើយលោកបានជំរុញក្រសួងអប់រំត្រូវតែបន្តពង្រឹងកុំឲ្យមានភាពធូររលុង និងមានអំពើពុករលួយក្នុងពេលប្រឡង។
ក្នុងពេលធ្វើកំណែទម្រង់ការប្រឡងសញ្ញាប័ត្របាក់ឌុប ដែលធ្វើឡើងភ្លាមៗ របស់ក្រសួងអប់រំយុវជន និងកីឡា កាលពីឆ្នាំ២០១៤ នោះ គឺមានបេក្ខជនជាង ២ម៉ឺននាក់ប៉ុណ្ណោះដែលប្រលងជាប់ក្នុងចំណោមបេក្ខជនបានដាក់ពាក្យប្រឡងជិត ៩ម៉ឺននាក់។ នៅពេលនោះ ចំពោះបេក្ខជនរាប់ម៉ឺននាក់បានប្រឡងធ្លាក់ ហើយលោកនាយករដ្ឋមន្ត្រីបានប្រកាសឲ្យបេក្ខជនទាំងនោះមានឱកាសបានប្រឡងម្ដងទៀត។ ជាលទ្ធផលប្រឡងលើកទី២ មានបេក្ខជនជាង ១ម៉ឺននាក់ ថែមទៀតដែលបានប្រឡងជាប់។
ទោះយ៉ាងណាបញ្ហានេះ ត្រូវបានរងការរិះគន់ពីមជ្ឈដ្ឋានទូទៅថា ក្រសួងអប់រំគួរតែប្រើពេលវេលាពង្រឹងគុណភាពអប់រំជាមុនសិន មិនត្រូវអនុវត្តការរឹតបន្តឹងពេលប្រលងឆាប់ៗដូចការដែលក្រសួងអប់រំ បានអនុវត្តនេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។