រដ្ឋមន្ត្រីក្រសួងអប់រំ ចូលឆ្លើយសំណួរនៅរដ្ឋសភាជាលើកដំបូង។ នៅរសៀលថ្ងៃទី១៧ ខែកញ្ញា នេះ រដ្ឋមន្ត្រីក្រសួងអប់រំ លោក ហង់ ជួនណារ៉ុន ដឹកនាំមន្ត្រីក្រោមឱវាទចំនួន ១២នាក់ ចូលទៅបំភ្លឺនូវរាល់សំណួររបស់គណៈកម្មការអប់រំ យុវជន និងកីឡា ធម្មការ សាសនា វប្បធម៌ និងទេសចរណ៍ ដែលដឹកនាំដោយអ្នកតំណាងរាស្ត្រគណបក្សប្រឆាំង។
វេទិកាសួរឆ្លើយរបស់គណៈកម្មការទី៧រដ្ឋសភា ជាមួយក្បាលម៉ាស៊ីនដឹកនាំក្រសួងអប់រំ ជាវេទិកាបិទទ្វារមិនឲ្យអ្នកកាសែតចូលស្តាប់។ គណៈកម្មការជំនាញសួរពីដំណើរការប្រឡងបាក់ឌុប និងដំណោះស្រាយបញ្ហាប្រឈមនានាដែលក្រសួងអប់រំ កំពុងជួបប្រទះ។
រដ្ឋមន្ត្រីក្រសួងអប់រំ និយាយដោយភាពជឿជាក់ បន្ទាប់ពីកិច្ចប្រជុំរយៈពេលជាង ៣ម៉ោងនោះថា សំណួររបស់គណៈកម្មការជំនាញរដ្ឋសភា ជាការងារដែលក្រសួងអប់រំ ធ្វើជារៀងរាល់ថ្ងៃរួចទៅហើយ ហើយគ្មានសំណួរណាមួយដែលលោកពិបាកឆ្លើយនោះទេ។
លោកបន្តថា គណៈកម្មការជំនាញសួរលោកច្រើនពីយន្តការនៃការប្រឡងដូចជាការកំណត់ឲ្យមានការប្រឡងលើកទី២ ការរឹតបន្តឹងវិន័យពេលប្រឡង និងការលើកកម្ពស់គុណភាពអប់រំ តាំងពីថ្នាក់តូចជាដើម។ លោក ហង់ ជួនណារ៉ុន ប្រដូចកំណែទម្រង់ការប្រឡងបាក់ឌុប ទៅនឹងការជួសឈាមរកមេរោគ ហើយបច្ចុប្បន្ន ក្រសួងរកមុខសញ្ញានៃវីរុសដែលបំផ្លាញប្រព័ន្ធអប់រំ នៅកម្ពុជា ឃើញហើយ។ ប៉ុន្តែលោកមិនប្រាប់ថាអ្វីជាមេរោគបំផ្លាញប្រព័ន្ធអប់រំនៅកម្ពុជា ឡើយ។ លោកបញ្ជាក់ថា ក្រសួងនឹងធ្វើការកែទម្រង់ប្រព័ន្ធអប់រំតែម្តង ដើម្បីលើកកម្ពស់ធនធានមនុស្សនៅកម្ពុជា៖ «សំឡេង»។
លោក ហង់ ជួនណារ៉ុន បន្ថែមថា ការប្រឡងបាក់ឌុបលើកទី២នៅឆ្នាំនេះ ក៏នឹងមានបែងចែកនិទ្ទេសធម្មតា ដូចការប្រឡងលើកទី១ដែរ ដើម្បីធានាថា សិស្សដែលខំរៀនអាចមានឱកាសប្រឡងជាប់។ លោកបន្តថា ក្រសួងក៏នឹងដំឡើងប្រាក់ខែគ្រូបង្រៀនបឋមសិក្សានៅឆ្នាំ២០១៥ ខាងមុខ និងការរិះរកមធ្យោបាយដាក់ឲ្យបេក្ខជនប្រឡងបាក់ឌុប ឲ្យបានគ្រប់មុខវិជ្ជាដូចឆ្នាំមុនៗ ជាដើម។
ចំណែកឯប្រធានគណៈកម្មការទី៧នៃរដ្ឋសភា លោក យ៉ែម បុញ្ញឫទ្ធិ មានប្រសាសន៍ថា គណៈកម្មការជំនាញនឹងតាមដានមើលការធ្វើកំណែទម្រង់វិស័យអប់រំនេះបន្តទៅទៀត។ ហើយនឹងបើកវេទិកាសួរឆ្លើយលើកក្រោយៗទៀតដែរ។ លោកបន្តថា វិស័យអប់រំនៅកម្ពុជា ត្រូវចាប់ផ្ដើមកែទម្រង់តាំងពីជីវភាពរស់នៅរបស់គ្រូបង្រៀនឡើងទៅ៖ «សំឡេង»។
គណៈកម្មការជំនាញរដ្ឋសភាដែលដឹកនាំដោយបក្សប្រឆាំង ចាប់ផ្ដើមកោះហៅរដ្ឋមន្ត្រីតាមក្រសួងនានាមកឆ្លើយបំភ្លឺជាបន្តបន្ទាប់។ កាលពីថ្ងៃសុក្រ សប្ដាហ៍មុន គណៈកម្មការទី៨រដ្ឋសភា ក៏ទើបតែហៅរដ្ឋមន្ត្រីក្រសួងសុខាភិបាល ទៅបំភ្លឺក្នុងរដ្ឋសភា។ គណៈកម្មការទី១០នៃរដ្ឋសភា ក៏បានកោះហៅប្រធានអង្គភាពប្រឆាំងអំពើពុករលួយ ចូលបំភ្លឺក្នុងរដ្ឋសភាដែរ ប៉ុន្តែអង្គភាពនេះមិនទាន់កំណត់ថ្ងៃចូលបំភ្លឺបាននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។