សមាគមសាមគ្គីធម៌ជួយជនចាស់ជរា ភូមិគោកក្ដួច ឃុំតាពូង ស្រុកថ្មគោល ខេត្តបាត់ដំបង ដឹកនាំប្រជាពលរដ្ឋដែលមានវ័យចំណាស់ប្រមាណ ៥០នាក់ ធ្វើទិវាជនចាស់ជរានាព្រឹកថ្ងៃទី១ តុលា ដើម្បីផ្ដល់កម្លាំងចិត្ត និងផ្ដល់ថវិកាមួយចំនួនដល់ពួកគាត់ ដែលគ្មានទីពឹង។
អនុប្រធានសមាគមជួយជនចាស់ជរា បង្ហាញពីទុក្ខកង្វល់នៅក្នុងពិធីនោះថា មនុស្សចាស់ជរាជាច្រើននៅក្នុងសមាគមលោក កំពុងប្រឈមនឹងការខ្វះខាត គ្មានប្រាក់កាសសម្រាប់ដោះស្រាយជីវភាពប្រចាំថ្ងៃ និងខ្វះការយកចិត្តទុកដាក់ពីកូនចៅ។
លោក ពៅ គឹមលី បញ្ជាក់ទៀតថា ប្រជាពលរដ្ឋដែលស្ថិតក្នុងវ័យចាស់ជរា ពួកគាត់ជួបការលំបាកខ្លាំង ភាគច្រើនអាយុប្រមាណ ៦០ឆ្នាំ ទៅ ៨៥ឆ្នាំ ហើយគ្មានកម្លាំងកំហែង។ ពួកគាត់រស់នៅពឹងផ្អែកទៅលើប្រាក់ចិញ្ចឹមបន្តិចបន្តួចរបស់កូនចៅ។ ក្រៅអំពីនោះ ពួកគាត់បន្ថែមបន្ទុកមួយទៀត ដោយកូន ឬសាច់ញាតិរបស់ខ្លួន ឲ្យជួយមើលថែទាំក្មេងតូចៗ។ រីឯពួកគេទៅធ្វើការនៅប្រទេសថៃ។ លោកបន្តថា ជនចាស់ជរាក្នុងសមាគម ពីមួយថ្ងៃទៅមួយថ្ងៃ កាន់តែមានចំនួនច្រើនឡើងជាលំដាប់ ចំណែកឯថវិកាមិនគ្រប់គ្រាន់ ដើម្បីជួយដោះបន្ទុករបស់ពួកគាត់ទាំងនោះនៅឡើយទេ។
លោក ពៅ គឹមលី៖ «អាទិភាពទីមួយមនុស្សចាស់ ដែលគាត់ចាស់ ហើយគ្មានកូនចៅទីពឹង គឺទុក្ខលំបាកសព្វគ្រប់ អត់លុយទេ។ ជួនកាល គាត់ដេកអត់បាយមួយថ្ងៃពីរថ្ងៃឯណោះទៅជួប។ ឧទាហរណ៍ តាមួយទើបនឹងស្លាប់ទៅនេះ តា ថាវៗ គាត់អត់ហើយខ្ញុំ ពីរនាក់តានេះចេះតែរៃលុយគ្នាខ្លះៗទៅ បានយកទៅជួយបន្ទាប់បន្សំទៅឲ្យបាននេះ។ ហើយអ្នកជិតខាង ក៏គេអត់មើលនឹងភ្នែកដែរណាស់ក្មួយ។ គេជួយបាយជួយបាយជួយទឹកអ៊ីចឹងដែរ។ ពេលខ្លះ គាត់ទៅស្រែចម្ការ គាត់នៅម្នាក់ឯងអ៊ីចឹង ក៏មានដាច់បាយដាច់ទឹកអ៊ីចឹងដែរ»។
អ្នកចូលរួមក្នុងទិវាជនចាស់ជរា ដែលមានភាគច្រើនជាស្ត្រីប្រមាណ ៥០នាក់នោះ អាយុចន្លោះពី ៦០ ទៅ ៩០ឆ្នាំ។ ពួកគាត់ទាំងនោះស្លៀកសពាក់ស ដូចអ្នកកាន់សីល មានទុក្ខលំបាកប្រហាក់ប្រហែលគ្នា។
លោកយាយម្នាក់ឈ្មោះ អ្នកស្រី គឹម គាត អាយុ ៧២ឆ្នាំ រស់នៅឃុំគោលឃ្មុំ ស្រុកថ្មគោល ថ្លែងក្នុងពិធីនោះថា កន្លងមក លោកយាយមិនធ្លាប់ចូលរួមក្នុងកម្មវិធីជួយមនុស្សចាស់ជរាបែបនេះឡើយ ហើយថា នៅពេលដែលចូលរួមមានក្ដីរំភើបរកអ្វីប្រៀបមិនបានទេ៖ «ខ្ញុំមិនដែលបានចូលទេ ព្រោះខ្ញុំទើបយាយដែលគាត់ចូលយូរហើយហ្នឹង គាត់ថា យាយឯងរោគា យាយឯងច្រើនណាស់។ ឥឡូវចូលសមាគមខ្ញុំទៅ គ្រាន់បានអឺ! គេជូនគេអីមក បានយាយទិញថ្នាំព្យាបាលរោគ។ ក៏យាយគាត់ប្រាប់ថ្ងៃហ្នឹង ខ្ញុំទើបមក ទើបមកម្ដងនេះឯង ខ្ញុំនោះ។ គ្រួសារកូនចៅរវល់ទៅរកស៊ីថៃ អត់ទៅខ្ញុំហ្នឹងនៅវត្ត ប៉ុន្តែខ្ញុំមិនចោលសីលទានរបស់ខ្ញុំទេ។ ខ្ញុំទៅរាល់តែសីលអ៊ីចឹងទៅ»។
ទាក់ទងនឹងបញ្ហានេះ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តបាត់ដំបង គឺលោក គឹម សេង ពុំបានពន្យល់ជុំវិញបញ្ហានេះថាយ៉ាងណានៅឡើយទេ ដោយថាជាប់រវល់ប្រជុំ។
ចំណែកប្រធានមន្ទីរធម្មការ និងសាសនា ខេត្តបាត់ដំបង លោក សួន ប៊ុនជឿន មានប្រសាសន៍ថា មន្ត្រីថ្នាក់ក្រោមពុំបានបញ្ជូនរបាយការណ៍ជុំវិញទុក្ខលំបាករបស់ជនចាស់ជរា ដែលបានសហការជាមួយមន្ទីរធម្មការ និងសាសនា នៅឡើយទេ។ ទោះជាយ៉ាងនេះក្ដី លោកថា ខាងមន្ទីរនឹងចុះស្រាវជ្រាវ។ ហើយប្រសិនបើរកឃើញថា ពួកគាត់ជួបការលំបាកមែន ខាងមន្ទីរនឹងជួយរកប្រភព ដើម្បីដោះស្រាយលើការងារនេះ។
លោក សួន ប៊ុនជឿន៖ «ខាងជនចាស់ជរាហ្នឹងបង្កើតសមាគមតាមមណ្ឌលតាមមូលដ្ឋាន។ អ៊ីចឹងទៅវាអត់មានទំនាក់ទំនងគ្នាមកដល់មន្ទីរខាងខ្ញុំនេះ អត់មានបានទំនាក់ទំនងគ្នាមកទេ។ ចំពោះការសហការ គឺចេះតែមានហើយ នៅតាមស្រុកមួយៗហ្នឹង តេជគុណ អនុគណ ក៏ដូចជាធម្មការស្រុកដែរ បើថាមាន អឺ! គ្រោះមហន្តរាយអីហ្នឹង អាចជួយគ្នា។ ក៏ប៉ុន្តែជនចាស់ជរាក្នុងស្រុកហ្នឹង គឺអត់មានកម្មវិធីច្បាស់លាស់ទេ បើនៅតាមបណ្ដាវត្តលោកជួយអ៊ីចឹងដែរ»។
របាយការណ៍របស់សមាគមសាមគ្គីធម៌ជួយជនចាស់ជរា ស្រុកថ្មគោល បង្ហាញថា ជនចាស់ជរាគ្មានទីពឹង ដែលចូលក្នុងសមាគម ប្រមាណ ៤០០នាក់ រស់នៅតាមបណ្ដាឃុំនានាក្នុងស្រុក ភាគច្រើនពួកគាត់បានព្រឹកខ្វះល្ងាច ពឹងផ្អែកទៅលើប្រាក់បន្តិចបន្តួចពីកូនចៅ និងញាតិក្បែរខាង។ សមាគមឲ្យដឹងទៀតថា កន្លងមកធ្លាប់ផ្ដល់ថវិកាជនចាស់ជរាក្នុងសមាគមមួយឆ្នាំពីរលើក ហើយក្នុងមួយលើក ម្នាក់ទទួលបានថវិកាប្រមាណ ២ម៉ឺនរៀល។ ប៉ុន្តែចាប់ពីឆ្នាំ២០១០ មក សមាគមផ្ដល់ថវិកាមួយឆ្នាំម្ដង ហើយឆ្នាំនេះ អ្នកដែលចូលរួមប្រមាណ ៥០នាក់ ទទួលបានថវិកា ១ម៉ឺនរៀលក្នុងម្នាក់។
សមាគមនេះរៀបចំកម្មវិធីជួយមនុស្សចាស់ ក្នុងគោលបំណងដើម្បីឲ្យក្មេងជំនាន់ក្រោយ គិតពីទុក្ខលំបាករបស់ពួកគាត់ផង និងជាការជំរុញឲ្យអាជ្ញាធរពាក់ព័ន្ធ យកចិត្តទុកដាក់ដល់មនុស្សចាស់ផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។