សេចក្តីប្រកាសព័ត៌មានរបស់ស្ថានទូតសហរដ្ឋអាមេរិក ប្រចាំកម្ពុជា ចេញផ្សាយថ្ងៃទី៥ ខែកញ្ញា បានបង្ហាញថា ចាប់តាំងពី លោក វីល្លៀម ថត (William E. Todd) ឯកអគ្គរដ្ឋទូតសហរដ្ឋអាមេរិក បានមកបំពេញការងារនៅកម្ពុជា កាលពីខែមេសា ឆ្នាំ២០១២ លោកបានធ្វើការដើម្បីបន្ថែមតម្លៃទៅលើប្រតិបត្តិការនៃប្រព័ន្ធផ្សព្វផ្សាយសង្គមរបស់ស្ថានទូត និងដើម្បីបង្កើនអត្ថប្រយោជន៍របស់វាសម្រាប់ប្រជាជនកម្ពុជា។
ស្ថានទូតអាមេរិក ឲ្យដឹងថា ក្នុងរយៈពេល ១៦ខែកន្លងទៅនេះ ចំនួនអ្នកចូលរួមក្នុងហ្វេសប៊ុករបស់ស្ថានទូតអាមេរិក ពោលគឺអ្នកដែលបានចុចចូលចិត្ត (Like) នៅលើទំព័រហ្វេសប៊ុកនេះបានកើនដល់ចំនួនជាង ១សែននាក់។
ករណីនេះ ស្ថានទូតសហរដ្ឋអាមេរិក នឹងរៀបចំពិធីមួយនៅថ្ងៃច័ន្ទ ទី៩ ខែកញ្ញា វេលាម៉ោង ១១ព្រឹក នៅក្នុងស្ថានទូតអាមេរិក ដើម្បីអបអរការកើនចំនួនអ្នកចូលរួមនេះ និងអរគុណប្រជាជនកម្ពុជា ជាពិសេសអ្នកចូលរួមហ្វេសប៊ុក និងប្លុក (Blog) ដែលបន្តការចាប់អារម្មណ៍ទៅលើកម្មវិធីផ្សេងៗរបស់ស្ថានទូតអាមេរិក នៅក្នុងប្រទេសកម្ពុជា។ ពិធីនេះ លោកឯកអគ្គរដ្ឋទូត ថត ក៏នឹងថ្លែងសុន្ទរកថាទៅកាន់អ្នកចូលរួមកម្មវិធី។
ទំព័រហ្វេសប៊ុករបស់ស្ថានទូតអាមេរិក បានផ្តល់ឲ្យប្រជាជនកម្ពុជា នូវឱកាសអាចទាក់ទងដោយផ្ទាល់ជាមួយស្ថានទូតអាមេរិក ដោយទទួលបានព័ត៌មានថ្មីៗស្ដីពីព្រឹត្តិការណ៍ កម្មវិធី និងឱកាសនានា និងដោយសរសេរមតិ និងសំណួរស្ដីពីរឿងដែលគេមានការចាប់អារម្មណ៍។ ទំព័រហ្វេសប៊ុកនេះ ថែមទាំងធ្វើជាវេទិកាមួយសម្រាប់ឲ្យប្រជាជនកម្ពុជា លើកឡើងនូវបញ្ហាផ្សេងជាមួយស្ថានទូតសហរដ្ឋអាមេរិក ដោយផ្ទាល់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។