ការសម្រេចផ្អាកនេះ ក្រោយពីអ្នកជំនាញ រកឃើញថា រោងចក្រនោះត្រូវការកែលំអ និងជួសជុលអគារបន្ថែមទៀត។ ចំណែកកម្មករនៅតែអះអាងថា ពួកគេហាក់មិនមានទំនុកចិត្ត ឬមានភាពកក់ក្ដៅដូចមុនទៀតឡើយ ក្នុងការធ្វើការនៅទីនោះ បើទោះបីជាមានការជួសជុលរួចក្ដី។
ក្រុមកម្មករថ្លែងថា ពួកគេហាក់មានការព្រួយបារម្ភដដែល បើទោះជារោងចក្រមួយនេះត្រូវជួសជុលរួចហើយក៏ដោយ។ ពួកគេទាមទារឲ្យមានការត្រួតពិនិត្យឲ្យបានល្អិតល្អន់ជាងនេះបន្ថែមទៀត ដើម្បីប្រាកដថា ក្រោយពីកែលំអរួចហើយ នឹងពុំបណ្ដាលឲ្យកើតមានហានិភ័យដល់អាយុជីវិតរបស់កម្មករណាមួយនោះឡើយ។
កញ្ញា អ៊ុង ចានដារា កម្មការិនីម្នាក់ក្នុងចំណោមកម្មករជាង ៧០០នាក់ផ្សេងទៀត ឲ្យដឹងនៅថ្ងៃទី២៧ ខែវិច្ឆិកា ថា ក្រុមកម្មករនៅតែភ័យខ្លាចនៅឡើយ បើទោះជាបានដឹងហើយថា អគារនេះកំពុងស្ថិតក្រោមការត្រួតពិនិត្យពីក្រុមអ្នកជំនាញបច្ចេកទេសក៏ដោយចុះ ការឃើញ និងជួបទិដ្ឋភាពនៃការរញ្ជួយអគារក្នុងពេលថ្មីៗនេះ ពិតជានៅដក់ក្នុងអារម្មណ៍នៅឡើយ៖ «អារម្មណ៍ណាធ្វើការទេពូ។ វាប្រេះច្រើន ពូឡើងទៅឃើញផ្ទាល់ហើយមែនអត់។ ប្រេះគ្រប់កន្លែងទាំងអស់ ជាន់លើប្រេះ។ ឥឡូវរង្គើជាន់ក្រោម ជាន់ផ្ទាល់ដីហ្នឹងក៏មានប្រេះទៀតដែរ»។
ចំណែកក្រុមកម្មករដទៃទៀត ថ្លែងថា ពួកគេស្នើសុំឲ្យភាគីរោងចក្រ គប្បីគិតគូរឲ្យបានម៉ត់ចត់ ដើម្បីបញ្ចៀសហេតុការណ៍កើតឡើងដោយយថាហេតុណាមួយ បណ្ដាលមកពីការរញ្ជួយអគារនេះ ដែលអាចប៉ះពាល់ដល់អាយុជីវិតរបស់កម្មករនោះ៖ «ចុះពួកខ្ញុំថាសុខចិត្តព្រមតើ ដោយសារហ្នឹងហើយ ឲ្យគេជួសជុលឲ្យស្អាតបាត បានកម្មករមានទំនុកចិត្ត។ ប៉ុន្តែ ខ្ញុំជឿថាអ៊ីចេះ អគារប្រេះអ៊ីចឹងហើយ កន្លែងឥដ្ឋខាងក្រោមហ្នឹងញ័ររញ្ជួយអ៊ីចឹងហើយ ជួសជុលធ្វើម៉េច។ ដូចមិនមែនផ្ទះឈើណាពូ ផ្ទះថ្ម»។
យ៉ាងណាក៏ដោយ ខាងភាគីរោងចក្របានចុះកិច្ចព្រមព្រៀងមួយធានាពីហានិភ័យកើតឡើង ដែលមានតំណាងរោងចក្រ ស៊ាវគិញ និងតំណាងកម្មករ ចុះថ្ងៃទី២៦ វិច្ឆិកា សរសេរថា ថ្ងៃក្រោយបើកម្មករទាំងអស់មានគ្រោះថ្នាក់ដោយការបាក់ស្រុតដំបូលអគារនេះ ក្រុមហ៊ុនទទួលខុសត្រូវទាំងស្រុងចំពោះហេតុការណ៍ដែលកើតឡើងនេះ។
បន្ថែមពីលើនេះ ប្រធានរដ្ឋបាលនៃរោងចក្រ ស៊ាវគិញ លោក ប៊ុន ឡេង អះអាងថា កម្មករទាំងផ្នែកត្បាញ និងកាត់ដេរសម្លៀកបំពាក់ ត្រូវបានអនុញ្ញាតឲ្យឈប់សម្រាកបណ្ដោះអាសន្ន ក្នុងអំឡុងពេលអគារកំពុងជួសជុល។ លោកបន្តថា ការកែលំអនេះ យ៉ាងហោចណាស់ក៏ត្រូវប្រើពេលរហូតដល់ថ្ងៃទី២ ខែធ្នូ ដែរ។ ទន្ទឹងនឹងនេះ ក្នុងពេលកម្មករឈប់សម្រាក ខាងរោងចក្រចេញថ្លៃឈ្នួល ៥០% នៃប្រាក់ខែរបស់កម្មករថែមទៀត៖ «ថ្ងៃពីរ កម្មករគាត់មកវិញ បើមិនហើយទេ យើងនឹងអនុញ្ញាតឲ្យគាត់ឈប់បន្តទៀត។ យើងឥតមានកាត់អីទេបង។ យើងគ្រាន់តែថាយើងឲ្យគាត់ ៥០% ព្រោះដោយសារហេតុអី យើងធ្វើអ៊ីចឹងបង ព្រោះដោយសារគេពិនិត្យគេថាអត់បញ្ហា»។
កាលពីថ្ងៃទី២៦ វិច្ឆិកា មានក្រុមអ្នកជំនាញមកពីស្ថាប័នពីរ បានចុះត្រួតពិនិត្យលើសំណង់នៃអគាររោងចក្រ ស៊ាវគិញ នេះ គឺពីមជ្ឈមណ្ឌលវិស្វកម្ម និងបច្ចេកវិទ្យា ព្រមទាំងវិទ្យាស្ថានជាតិបច្ចេកទេសកម្ពុជា បានបញ្ជាក់ថា អគារនេះអាចដំណើរការអាជីវកម្មបាន ដោយពុំមានប៉ះពាល់ដល់កម្មករទេ។ បើទោះជាអគារនេះឆ្លងកាត់ការត្រួតពិនិត្យដោយក្រុមជំនាញផ្នែកសំណង់ក្ដី ការរញ្ជួយអគារកាលពីថ្ងៃទី២២ វិច្ឆិកា បានបន្សល់ទុកស្នាមប្រេះ បណ្ដាលដោយការរង្គើអគារនៅជាន់ទី២ នៅឡើយ។
ចំណែកអគ្គនាយកនៃអគ្គនាយកដ្ឋានក្រសួងដែនដី នគរូបនីយកម្ម និងសំណង់ លោក ហ៊ុយ ណារា ដែលបានចុះពិនិត្យសំណង់ដោយផ្ទាល់នៅថ្ងៃទី២៧ ថ្លែងថា លោកបានស្នើខាងភាគីរោងចក្ររួចហើយ ដើម្បីឲ្យកម្មករបានឈប់សម្រាកក្នុងពេលអគារមានបញ្ហា និងដំណើរការជួសជុលនេះ។ លោកគិតថា ការបន្តថា ឲ្យកម្មករបំពេញកិច្ចការដោយប្រថុយប្រថាន អាចប្រឈមគ្រោះថ្នាក់ជាយថាហេតុណាមួយ៖ «យើងមិនមែនដេញកម្មករ មិនមែនស្អីទេ គឺរោងចក្រក៏មិនអ៊ីចឹងដែរ។ កម្មករគ្នាក៏មិនចោទថាអ៊ីចឹងដែរ ប៉ុន្តែដើម្បីសុវត្ថិភាព អាជ្ញាធរបានរៀបចំឲ្យមានការផ្អាកដំណើរការការដ្ឋានហ្នឹងសិន»។
ក្រុមអ្នកជំនាញបច្ចេកទេសផ្នែកសំណង់មួយចំនួន ដែលបានចុះស៊ើបអង្កេតដាក់បន្ទុកទៅលើសំណង់ ធ្វើខ្វះគុណភាព និងបទដ្ឋានបច្ចេកទេស។ អគារនេះដែលមានទំហំ ៣០ គុណនឹង ៤០ម៉ែត្រ សាងសង់តាំងពីឆ្នាំ២០០០ ដោយក្រុមហ៊ុន ប៊េ សុខឡេង ជាអ្នកម៉ៅការសាងសង់នេះ ត្រូវបានអ្នកជំនាញផ្នែកសំណង់ខ្លះគិតថា អគារដែលធ្វើក្នុងរយៈពេល ១០ឆ្នាំមុន ជាទូទៅពុំសូវបានគិតគូរពីបច្ចេកទេស និងគុណភាពប៉ុន្មាននោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។