អាជ្ញាធរស្រុកត្រាំកក់ បានចុះជួបជាមួយតំណាងសិប្បកម្ម ឈ្មោះ ហុង ម៉ីម៉ី ដើម្បីចរចារកដំណោះស្រាយបញ្ចប់ការតវ៉ារបស់កម្មករ។
អភិបាលរងស្រុកត្រាំកក់ លោក ជា វណ្ណ មានប្រសាសន៍នៅព្រឹកថ្ងៃទី៥ ខែវិច្ឆិកា ឆ្នាំ២០១៣ ថា កម្មករប្រមាណ ៣០០នាក់ ធ្វើការក្នុងសិប្បកម្មកាត់ដេរខោអាវ ត្បាញ ឈ្មោះ ហុង ម៉ីម៉ី បានតវ៉ា ២ថ្ងៃហើយ ទាមទារប្ដូរមេការប្រព្រឹត្តអំពើពុករលួយ និងដូរលក្ខខណ្ឌការងារ។ លោកថា ចំណុចសំខាន់ដែលកម្មករប្ដឹងមកឲ្យអាជ្ញាធរស្រុកជួយចរចា គឺការកាត់ប្រាក់ខែកម្មករនៅពេលឈប់សម្រាកបុណ្យជាតិច្រើនថ្ងៃ។
លោក ជា វណ្ណា៖ «ហើយខ្ញុំបានផ្ដាំឲ្យតំណាងកម្មករ ៤នាក់ហ្នឹងថា បើពាក់ព័ន្ធនឹងបញ្ហាបុណ្យជាតិ យើងបានដោះស្រាយគ្នាហើយ។ បើពាក់ព័ន្ធនឹងអីក្រៅពីបុណ្យជាតិ សុំឲ្យតំណាងកម្មករហ្នឹងធ្វើរបាយការណ៍ជាលាយលក្ខណ៍អក្សរនៅចំណុចអីខ្លះដែលខុសប្រក្រតីនៅសិប្បកម្មហ្នឹង ហើយចាំឲ្យតំណាងសាខាសិប្បកម្មធំគាត់អញ្ជើញមកដើម្បីគាត់ពិគ្រោះ តើកំហុសរបស់មេការវាខុសប្រក្រតីអីខ្លះ វាកំហុសដកតួនាទី ឬកំហុសអប់រំ?»។
លោកបន្តថា កម្មករសិប្បកម្មកាត់ដេរខោអាវ ត្បាញ ហុង ម៉ីម៉ី កាលពីសប្ដាហ៍មុនបានផ្ដិតមេដៃប្ដឹងសុំឲ្យអាជ្ញាធរស្រុកត្រាំកក់ ជួយដោះស្រាយការរំលោភសិទ្ធិ និងច្បាប់ការងារពីសំណាក់អ្នកមើលការខុសត្រូវនៅរោងចក្រនេះ ពីព្រោះថៅកែជនជាតិចិន មិនមានវត្តមានក្នុងប្រទេសកម្ពុជា។
កាលពីល្ងាចថ្ងៃច័ន្ទ ទី៤ វិច្ឆិកា អាជ្ញាធរស្រុកបានចុះចរចាជាមួយអ្នកមើលការខុសត្រូវនោះហើយ។ ការចរចាបានយល់ព្រមបញ្ហាខ្លះ ដូចជាកម្មករមានសិទ្ធិមិនមកធ្វើការនៅថ្ងៃសម្រាកបុណ្យជាតិមួយថ្ងៃ តែបើកម្មករស្ម័គ្រចិត្តមកធ្វើការថ្ងៃឈប់សម្រាក សិប្បកម្ម និងគុណប្រាក់ការងារទ្វេដង។ ប៉ុន្តែរឿងសុំប្ដូរអ្នកមើលការខុសត្រូវដែលប្រព្រឹត្តអំពើពុករលួយ អាជ្ញាធរស្រុកមិនអាចដោះស្រាយបាន ដោយសារថៅកែមិនមានវត្តមាន។ តែនៅថ្ងៃអង្គារ លោកក៏រង់ចាំការសម្រេចពីថៅកែនោះដែរ។
កម្មករសិប្បកម្មកាត់ដេរ ហុង ម៉ីម៉ី ឈ្មោះ ពៅ ថ្លែងថា កម្មករទាំង ៣០០នាក់ ប្ដឹងសុំដូរមេការពុករលួយ ព្រោះប្រើល្បិចបញ្ឈប់កម្មករនៅថ្ងៃជិតបើកប្រាក់ខែ ហើយរើសកម្មករថ្មីឲ្យចូលធ្វើការនៅដើមខែ ព្រមទាំងទារយកប្រាក់អ្នកចូលថ្មីម្នាក់ ១០ម៉ឺនរៀលឡើងទៅ។
លោកបន្តថា សិប្បកម្មនេះទើបដំណើរការប្រមាណ ៣ឆ្នាំ មិនទាន់មានសហជីពការពារសិទ្ធិកម្មករទេ ទើបអ្នកមើលការក្នុងសិប្បកម្មនោះធ្វើបាបកម្មករស្រេចចិត្ត ខណៈថៅកែចិន បណ្ដោយឲ្យ ២នាក់ប្ដីប្រពន្ធឈ្មោះ នី និងឈ្មោះ ណា ប្រព្រឹត្តអំពើពុករលួយ និងធ្វើបាបកម្មករស្រេចចិត្ត។ ប្រភពដដែលឲ្យដឹងថា គាត់ក៏បានសូកប្រាក់ ១៥ដុល្លារ ដើម្បីបានចូលធ្វើការនៅឆ្នាំ២០១២។
មេការកាត់យកប្រាក់គាត់ ១ខែ ហើយនៅខែបន្ទាប់ ទើបបានបើកប្រាក់ខែជាធម្មតា។ ប៉ុន្តែមានការកាត់យកប្រាក់ព្រីម (ប្រាក់រង្វាន់ទៀងទាត់) បន្តបន្ទាប់ យកពីកម្មករស្ទើរគ្រប់គ្នា ទើបមានការបះបោរតវ៉ាច្រើនថ្ងៃមកនេះរង់ចាំការដោះស្រាយពីអាជ្ញាធរស្រុក និងថៅកែជនជាតិចិន៖ «ពេលសុំឈប់ គឺឈប់បានតែ ១ថ្ងៃទេ។ លើសពី១ថ្ងៃគេកាត់លុយយើងកាត់ ៥ដុល្លារ លុយព្រីម»។
កម្មករមួយរូបទៀតថ្លែងថា ពួកគាត់ទាមទារសុំប្ដូរលក្ខខណ្ឌការងារ ១៦ចំណុច ដូចជាសុំឲ្យថៅកែបើប្រាក់ខែទៀងទាត់ នៅរាល់ថ្ងៃទី១០ ដូចសហគ្រាសនិងរោងចក្រដទៃ។ សុំបើកប្រាក់ថ្លៃបាយ ១អាទិត្យម្ដង គឺក្នុង ១ថ្ងៃ ១ពាន់រៀល។ សុំឲ្យថៅកែកុំកាត់ប្រាក់ព្រីម ៥ដុល្លារ ក្នុងការសុំច្បាប់ឈប់លើស១ថ្ងៃ នៅពេលមានបុណ្យជាតិ មានធុរៈ ដូចជាឈឺ ឬបងប្អូនស្លាប់ ឬរៀបការ ឬសុំបញ្ជាក់សំបុត្រផ្សេងៗជាដើម៖ «ខាងសាលាស្រុក ខ្ញុំឃើញគេមក។ ប៉ុន្តែឃើញគេសូកប៉ាន់លុយអ៊ីចឹងទៅ ឥឡូវឃើញគេទៅវិញបាត់ហើយ។ ឥឡូវនៅតែពួកសហជីពគាត់កំពុងតែជួយដោះស្រាយ»។
វិទ្យុអាស៊ីសេរី មិនអាចទាក់ទងប្ដីប្រពន្ធដែលមានឈ្មោះ នី និងឈ្មោះ ណា ជាមេការសិប្បកម្ម ហុង ម៉ីម៉ី សុំបំភ្លឺតបការចោទរបស់កម្មករបាននៅឡើយ នៅថ្ងៃទី៥ ខែវិច្ឆិកា នេះ។
ក្រុមកម្មករឲ្យដឹងថា នៅពេលពួកគេកំពុងឈរតវ៉ា មានសហជីពមកពីភ្នំពេញ មកជួយពង្រឹងការតវ៉ារបស់កម្មករសិប្បកម្មកាត់ដេរខោអាវ ត្បាញ ហុង ម៉ីម៉ី នេះ។ ប៉ុន្តែកម្មករមិនដឹងថា សហជីពមកជួយនោះឈ្មោះអ្វីទេ។ កម្មករអះអាងថា ពួកគេនៅឈរតវ៉ារហូតថៅកែចិនចុះមកជួបពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។