កម្មវិធីអភិវឌ្ឍន៍កសិកម្មមួយ ដែលគាំទ្រដោយរដ្ឋាភិបាលអូស្ត្រាលី (Australia) ហៅកាត់ថា កាវ៉ាក់ (CAVAC) សហការជាមួយអាជ្ញាធរខេត្តកំពត បើកពិធីតាំងពិព័រណ៍កសិកម្មមួយ នៅថ្ងៃទី១៤ វិច្ឆិកា។ កសិករប្រមាណ៣ រយនាក់ ដែលចូលរួមបានសិក្សាអំពីបច្ចេកទេសធ្វើកសិកម្មទំនើបផង។
មានក្រុមហ៊ុនរកស៊ីលក់ដូរផលិតផល និងគ្រឿងចក្រកសិកម្មប្រមាណ ២០ ដាក់តាំងពិព័រណ៍មុខទំនិញរបស់ក្រុមហ៊ុន ក្នុងពិធីតាំងពិព័រណ៍ ដែលធ្វើឡើងរយៈពេលមួយថ្ងៃនេះ។
មុខទំនិញដែលដាក់តាំងនោះ មានម៉ាស៊ីនគោយន្ត ទ្រាក់ទ័រ (Tractors) ជីរកសិកម្ម ពូជដំណាំ ថ្នាំបំផ្លាញស្មៅ និងថ្នាំសម្លាប់សត្វល្អិតជាដើម។
ពិធីនេះធ្វើឡើងរបៀបសិក្ខាសាលាបន្តិច ដោយបានចែកកសិករដែលចូលរួមនោះជាក្រុមៗ ពិភាក្សាផ្លាស់ប្ដូរយោបល់ អំពីការធ្វើកសិកម្មទទួលផលបានល្អ ដែលអាចឈានទៅលក់ដូរផលិតផលបាន។
កសិករ ណេត សឿ អាយុជាង ៥០ ឆ្នាំ មកពីឃុំត្នោតចុងស្រង់ ស្រុកបន្ទាយមាស ឲ្យដឹងថា គាត់បានដឹងអំពីរបៀបធ្វើស្រូវស្រែប្រាំងបានផលខ្ពស់ ពីការតាំងពិព័រណ៍រយៈពេលមួយថ្ងៃនេះ ៖ « គឺថាពេលមិនទាន់បានចូលរួមសិក្សានឹង គឺថាយើងធ្វើស្រែនឹងបាចជីរបាចអីនឹងវាច្រើនតែខុស ពេលដែលបានមករៀនសូត្រនឹង ឃើញថាបានយល់ខ្លះ បានយល់ថាយ៉ាងម៉េច របៀបប្រើជីរនិងប្រើថ្នាំ ព្រោះកាលពីមុនមកយើងអត់មានបទពិសោធន៍ កាលណាធ្វើទៅវាចេះតែខុសផែនការណ៍។ គឺថាបានចំណេញ ទោះបីជាខាតពេលវេលាមួយថ្ងៃពិតមែនតែយើងបានចំណេញ បានចំណេះ ហាហុកសិបភាគរយយើងចាំ » ។
ចំណែកកសិករមួយរូបទៀតគឺ អ្នកស្រី ខាន់ លាភ អាយុជាង ៣០ ឆ្នាំ មកពីឃុំស្រែជាខាងជើង ស្រុកដងទុង ក៏ទទួលបានចំណេះដឹងច្រើនដែរ ដូចជារបៀបផ្ដល់ចំណីសត្វ និងដាក់ជីរស្រែជាដើម៖ « ចាស ! ខ្ញុំមកនឹងខ្ញុំផ្ដោតអារម្មណ៍ជាងគេគឺជីរមួយមុខ នឹងខាងថ្នាំសម្លាប់ស្មៅនិងសម្លាប់សត្វល្អិត ខាងដំណាំស្រូវ ខាងចំណីសត្វខាងចិញ្ចឹមជ្រូក។ ពីមុនខ្ញុំអត់ដឹងថា ជីរនឹងគេប្រើប៉ុន្មានដំណាក់កាលរបៀបម៉េចទេ ដល់ពេលមកអ៊ីចឹង ខ្ញុំយល់បានខ្លះៗ មិនទាំងអស់ទេ ហើយថ្នាំដូចជាសម្លាប់ស្មៅ សម្លាប់សត្វល្អិតអ៊ីចឹង ខ្ញុំអត់ដឹងថា ស្រែស្មៅច្រើនខ្ញុំមិនដឹងធ្វើម៉េចទេ បោចមិនឈ្នះអ៊ីចឹង ខ្ញុំអត់ដឹងវិធីអីជម្រះស្មៅ ឥឡូវខ្ញុំដឹងថាមានថ្នាំអីចឹង គាត់ឲ្យនាមប័ណ្ណអីចឹង បើខ្ញុំត្រូវថ្នាំត្រូវការជីរ ខ្ញុំអាចទាក់ទាងទៅគាត់។ តិចតួចអ៊ីចឹងក្រុមហ៊ុនមិនអាចដឹកឲ្យបានទេតែបើយើងគិតជាក្រុម ដូចជាក្នុងសហគមន៍ អ៊ីចឹងយើងពិភាក្សាគ្នាទៅក្នុងម្នាក់យកប៉ុន្មាន បានច្រើនទៅក្រុមហ៊ុនដឹកដល់កន្លែង»។ អ្នកស្រី ខាន់ លាភ ដែលជាតំណាងសហគមន៍កសិករក្នុងតំបន់នោះផង បញ្ជាក់ថា គាត់ក៏បានយល់ខ្លះដែរអំពីរបៀបចិញ្ចឹមសត្វយកសាច់លក់។
កសិករជាក្រុមៗ បានដើរពីតូបមួយទៅតូបមួយ សួរនាំព័ត៌មានអំពីរបៀបប្រើមុខទំនិញ របស់ក្រុមហ៊ុននីមួយៗ ដូចជាសួររបៀបប្រើប្រភេទពូជ ប្រភេទថ្នាំសម្លាប់សត្វល្អិត របៀបជ្រើសរើសពូជសត្វចិញ្ចឹម និងពូជដំណាំនានា ឬក៏របៀបប្រើជីរលើមុខដំណាំនីមួយៗ។
លោក ស៊ុន សុវត្ថិ តំណាងក្រុមហ៊ុនលក់ជីរនៅតូបតាំងពិព័រណ៍មួយ ក្នុងចំណោមក្រុមហ៊ុនដទៃទៀត កំពុងមមាញឹកពន្យល់ក្រុមកសិករអំពីការប្រើប្រាស់ផលិតផលរបស់ក្រុមហ៊ុន។
លោកបញ្ជាក់ថា កសិករដែលចូលរួមតាំងពិព័រណ៍ឆ្នាំនេះមានការយល់ដឹងច្រើនអំពីការធ្វើកសិកម្មទំនើប៖ « និយាយទៅគាត់មកពីតំបន់ផ្សេងៗគ្នា គាត់មានអ្នកធ្វើស្រែប្រាំងក៏មាន ស្រែវស្សាក៏មាន ហើយមានអ្នកដាំបន្លែក៏មាន អ៊ីចឹងចំណេះដឹងគាត់ផ្សេងៗគ្នាទាំងអស់ អ៊ីចឹងអ្វីដែលយើងណែនាំគាត់ទៅមានកសិករខ្លះក៏គាត់ធ្លាប់បានប្រើ ហើយគាត់ក៏ធ្លាប់អនុវត្តទៅតាមរូបមន្តដែលយើងបានដាក់នៅក្នុងមានជាសៀវភៅមានជាបែនើ (Banner) អីនឹង ដែលយើងបានចែកឲ្យគាត់នឹង » ។
លោកឲ្យដឹងថា ក្នុងចំណោមកសិករប្រមាណ៣ រយនាក់នេះ ភាគច្រើនជាកសិករគ្រូបង្គោលនៅតាមមូលដ្ឋាន ដែលមានចំណេះដឹងខាងកសិកម្មទំនើបខ្លះហើយ។
ទោះយ៉ាងណា ក៏មានកសិករខ្លះទៀតត្អូញត្អែរថា ការបង្ហាត់បង្រៀនកសិករឲ្យចេះរបៀបធ្វើកសិកម្មទំនើបដូច្នេះ គឺជាការប្រសើរហើយ តែបើសិនជារដ្ឋាភិបាលរកទីផ្សារឲ្យពួកគាត់លក់ផលិតផលកសិកម្មបាន ឬក៏ក្រុមហ៊ុនលក់ដូរសម្ភារៈកសិកម្ម ឬមុខទំនិញកសិកម្មផ្សេងៗក្នុងតម្លៃថោកអន្តិចនោះ ប្រហែលជាកសិករអាចមានជីវភាពធូរធារបាន។
កសិករឈ្មោះ ហ៊ីង ឆុង អាយុជាង៦០ឆ្នាំ មកពីឃុំអង្គភ្នំតូច ស្រុកអង្គរជ័យ ដែលកំពុងឈរសម្លឹងម៉ាស៊ីនគោយន្តដែលក្រុមហ៊ុនដាក់តាំងនោះ ត្អូញត្អែរថា គាត់ធ្វើស្រែមិនសូវចំណេញទេ ព្រោះចំណាយច្រើនពេក ដូចជាចំណាយលើថ្លៃជីរ ថ្លៃប្រេងបូមទឹកដាក់ស្រែ និងចំណាយលើថ្លៃថ្នាំសម្លាប់សត្វល្អិតជាដើម ហើយនៅពេលបានផល ឈ្មួញឲ្យតម្លៃថោកទៀត ៖ « បាទអានេះ បើយើងនិយាយគោយន្ត ហើយអាត្រាក់ទ័រមិនអាចទេ បើមានក៏ភាគតិចណាស់ តែបើនិយាយក្រៅពីនឹងខ្ញុំអាចមានលុយទិញ បើសិនជាថោកជាងនឹងអរខ្លាំងណាស់ រាល់ថ្ងៃនេះបើនិយាយពីធ្វើបើមិនល្អមិនរួចតែម្ដង តែបើល្អវាអាចរួចហើយចំណេញតិចតួច បើថ្លៃសព្វបែបយ៉ាង ជួលគេស្ទូងអីក៏ថ្លៃ ដកអីក៏ថ្លៃ ហើយដល់ទៅជីរថ្លៃតែចៀសមិនរួចទាល់តែប្រើ » ។
ការតាំងពិព័រណ៍នេះបានបិទបញ្ចប់នៅល្ងាចថ្ងៃដដែល។
ប្រធានមន្ទីរកសិកម្មខេត្តកំពត លោក ចាន់ ចេស្ដា ដែលថ្លែងបិទពិធីនោះ បានអំពាវនាវដល់កសិករទាំងអស់ ឲ្យយកចំណេះដឹងទាំងនេះ ទៅប្រើប្រាស់ដើម្បីផ្លាស់ប្ដូរពីការធ្វើកសិកម្មបែបប្រពៃណីដែលគ្រាន់តែសម្រាប់ផ្គត់ផ្គង់ជីវភាពគ្រួសារ ទៅជាការធ្វើកសិកម្មទំនើប បែបពាណិជ្ជកម្មរកប្រាក់ចំណូលវិញ ដើម្បីឲ្យមានជីវភាពធូរធារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។