ពលរដ្ឋនៅស្រុកបាភ្នំ ខេត្តព្រៃវែង ស្វែងរកអន្តរាគមន៍ឲ្យជួយរំដោះកូនស្រីចេញពីប្រទេសម៉ាឡេស៊ី បន្ទាប់ពីដឹងតាមរយៈការឆ្លើយឆ្លងតាមទូរស័ព្ទ នៅព្រឹកថ្ងៃទី២៦ កុម្ភៈ ថា កូនស្រីរបស់ខ្លួនត្រូវគេឃុំទុកក្នុងជំរំមួយកន្លែង ក្បែរព្រលានយន្តហោះកូឡាឡាំពួរ ប្រទេសម៉ាឡេស៊ី។
ប៉ុន្តែ មន្ត្រីក្រសួងការបរទេសខ្មែរបញ្ជាក់ថា មន្ត្រីស្ថានទូតខ្មែរប្រចាំនៅប្រទេសម៉ាឡេស៊ី បានទាក់ទងជួបនាងតាមទូរស័ព្ទហើយ គឺពុំមានបញ្ហាអ្វីនោះទេ ហើយមន្ត្រីស្ថានទូតនឹងរៀបចំបែបបទបញ្ជូននាងត្រឡប់មកកម្ពុជា វិញក្នុងពេលឆាប់ៗ។
ម្ដាយស្ត្រីដែលមានកូនចេញទៅធ្វើការនៅប្រទេសម៉ាឡេស៊ី នោះថ្លែងនៅថ្ងៃទី២៦ កុម្ភៈ ឆ្នាំ២០១៤ ថា កូនស្រីឈ្មោះ ជា ហឿង ហៅ អាហៀង អាយុ ៣០ឆ្នាំ ត្រូវគេឃុំមិនឲ្យនាងចេញពីជំរំនៅប្រទេសម៉ាឡេស៊ី នោះមានរយៈពេលប្រមាណមួយខែហើយ។
អ្នកស្រី ខាន់ សុខន រស់នៅភូមិក្រាំងចិន ឃុំស្ដៅកោង ស្រុកបាភ្នំ ថ្លែងទាំងទឹកភ្នែកថា កូនរបស់អ្នកស្រីបាននិយាយឆ្លើយឆ្លងតាមទូរស័ព្ទ ដោយបញ្ជាក់ថា គេឃុំរូបនាងនៅក្នុងជំរំនៅប្រទេសម៉ាឡេស៊ី បន្ទាប់ពីនាងទៅស្វែងរកអន្តរាគមន៍ ឲ្យគេជូនរូបនាងត្រឡប់មកស្រុកកំណើតវិញ។ ស្ត្រីដដែលថ្លែងបន្តថា កូនរបស់គាត់ប្រាប់តាមទូរស័ព្ទថា នាងជួបការលំបាកដោយសារក្នុងជំរំដែលនាងស្នាក់នៅនោះ សុទ្ធតែប្រុសៗ ធ្វើឲ្យនាងមានការភ័យខ្លាច ព្រោះគេមិនឲ្យនាងដើរចេញពីជំរំស្នាក់នៅឡើយ។ ជាងនេះទៅទៀត នៅក្នុងជំរំក៏គេមិនឲ្យនិយាយទូរស័ព្ទមកកម្ពុជា លើសពីមួយនាទីដែរក្នុងមួយសប្ដាហ៍នោះ៖ «ដល់អ៊ីចឹង ចេះតែឲ្យខ្ញុំជួយ ខ្ញុំថាម៉ែធ្វើម៉េចទេកូនអើយ! ជួយមិនបានទេ មិនដឹងធ្វើម៉េច លោកគ្រូអើយអាណិតណាស់កូន។ ខ្ញុំមិនដឹងធ្វើម៉េចទេ។ ខ្ញុំអស់ចិត្តអស់សង្ឃឹមហើយ ឲ្យគាត់ជួយខ្ញុំផង។ ខ្ញុំមិនសូវស្គាល់មិនដឹងនៅត្រង់ណាត្រង់ណីទៀត។ វាតេមក ខ្ញុំមិនសូវហ៊ានសួរ មិនដឹងថាម៉េច គេឲ្យនិយាយតែមួយនាទី គេស្រែកថាឲ្យបិទៗ អាហៀង បិទៗ ម៉ែអើយគេឲ្យបិទហើយ ខ្ញុំថាក៏ពិបាកម្ល៉េះកូនហើយ!»។
កម្មការិនី ជា ហឿង បានចេញទៅធ្វើការនៅប្រទេសម៉ាឡេស៊ី ស្របច្បាប់រយៈពេលប្រមាណ ៣ឆ្នាំ។ ដំបូងនាងជាកម្មករធ្វើការតាមផ្ទះ លុះបានមួយឆ្នាំក្រោយមក នាងបានលួចរត់ចេញពីផ្ទះនោះ ប្ដូរការងារទៅធ្វើការនៅរោងចក្រវិញ។ ម្ដាយរបស់នាងថ្លែងថា ដោយនឹកកូន និងឪពុកម្ដាយនៅឯស្រុកកំណើត កម្មការិនី ជា ហឿង ក៏បានពឹងឲ្យកម្មករខ្មែររួមការងារ ជូននាងទៅស្ថានទូតខ្មែរនៅប្រទេសម៉ាឡេស៊ី ដើម្បីឲ្យជួយបញ្ជូននាងត្រឡប់មកកម្ពុជា វិញ។ ពេលនោះ រូបនាងពុំមានលិខិតឆ្លងដែន ឬប៉ាសស្ព័រ (Passport) ជាប់នឹងខ្លួនទេ ដោយនាងបានភ្លេចនៅផ្ទះពេលដែលនាងរត់ចេញពីការងារដំបូងនោះ។ លោកស្រីបន្ថែមថា ក្នុងការធ្វើដំណើរនោះ នាងមិនបានទៅដល់ស្ថានទូតខ្មែរនោះទេ គឺកម្មករបានយកទៅផ្ញើនៅជំរំមួយកន្លែងក្បែរព្រលានយន្តហោះ ដោយគិតថា នៅទីនោះគេអាចបញ្ជូននាងត្រឡប់មកខ្មែរបានដោយសុវត្ថិភាព។ ប៉ុន្តែ នាងបានស្នាក់នៅក្នុងជំរំរយៈពេលប្រមាណ ១ខែហើយ ក៏ពុំទាន់រកមធ្យោបាយវិលត្រឡប់មកមាតុភូមិវិញបាន។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍បញ្ជាក់ថា មន្ត្រីស្ថានទូតខ្មែរប្រចាំនៅប្រទេសម៉ាឡេស៊ី បានទាក់ទងឆ្លើយឆ្លងតាមទូរស័ព្ទជាមួយនាង ហើយគឺពុំមានបញ្ហាអ្វីនោះទេ។ លោក កុយ គួង បញ្ជាក់ថា មន្ត្រីស្ថានទូតខ្មែរនឹងរៀបចំបំពេញបែបបទដើម្បីបញ្ជូននាងមកកម្ពុជា វិញក្នុងពេលឆាប់ៗ៖ «បាទ ខ្ញុំបានទំនាក់ទំនងតាមទូរស័ព្ទបាទ ហើយគាត់ថាអត់មានប៉ូលិសណាចាប់គាត់ផង គាត់ទៅជួបអង្គការមួយ ប្រហែលអង្គការពាក់ព័ន្ធសាសនាគ្រិស្ដ បាទ។ អ៊ីចឹង ឥឡូវហ្នឹងស្ថានទូតបានទំនាក់ទំនងឲ្យអង្គការហ្នឹងជូនគាត់មកស្ថានទូត ព្រោះឮសូរថាអត់ប៉ាសស្ព័រ។ អ៊ីចឹង គេនឹងរៀបចំនីតិវិធីលិខិតបើកផ្លូវអីអ៊ីចឹងអ៊ីចេះមួយអ៊ីចេះពីរ ដើម្បីបញ្ជូនគាត់មកស្រុកខ្មែរវិញ»។
យ៉ាងណា ម្ដាយរបស់កម្មការិនីឲ្យដឹងថា រាល់ពេលលោកស្រីទាក់ទងនាងម្ដងៗ កូនគាត់តែងតែប្រាប់ថា នាងរស់នៅក្នុងជំរំនោះប្រឈមនឹងគ្រោះថ្នាក់ខ្លាំងណាស់ និងសុំឲ្យជួយអន្តរាគមន៍បញ្ជូននាងមកកម្ពុជា វិញឲ្យបានឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។