សមាជិកទាំងអស់នៃគ្រួសារស្មៀនឃុំសាលាក្រៅ ស្រុកសាលាក្រៅ ខេត្តប៉ៃលិន បានស្លាប់ក្នុងភ្លើងឆេះផ្ទះ ដោយត្រូវជនមិនស្គាល់មុខសម្លាប់រួចដុត ហើយសមត្ថកិច្ចសន្និដ្ឋានថាជារឿងគំនុំផ្ទាល់ខ្លួន។
អភិបាលស្រុកសាលាក្រៅ លោក សំ សារ៉េត មានប្រសាសន៍បញ្ជាក់នៅរសៀលថ្ងៃទី២១ វិច្ឆិកា ថា ជនរងគ្រោះដែលស្លាប់ក្នុងហេតុការណ៍នោះមានចំនួន ៣នាក់ រួមមាន ស្មៀនឃុំសាលាក្រៅ ឈ្មោះ លោក ហេង រ៉ាវី អាយុ ២៩ឆ្នាំ អ្នកស្រី ធី ផលម៉ាឡៃ អាយុ ២៤ឆ្នាំជាភរិយា និងកូនស្រីម្នាក់អាយុ ៦ខែ។ អ្នកទាំង ៣នាក់ ស្លាប់នៅក្នុងភ្នក់ភ្លើងដែលឆេះផ្ទះរបស់ពួកគេនៅភូមិអូរ៧៥ ឃុំអូរអណ្ដូង ស្រុកសាលាក្រៅ នៅវេលាម៉ោងប្រមាណ១២ និង ៤០នាទីរំលងអាធ្រាត្រ យប់ថ្ងៃទី២០ វិច្ឆិកា។
លោក សំ សារ៉េត៖ «ករណីហ្នឹង គឺឃាតកម្មកើតទុកជាមុន ហើយដោយសារតែសាកសពទាំង៣ហ្នឹង គឺប្ដីប្រពន្ធ ហើយជាមួយកូនហ្នឹង គឺប្ដីរឹតខ្សែករឹតនឹងលួស។ ហើយប្រពន្ធក៏រឹតនឹងលួសដែរ ហើយប្រហែលមានវ៉ៃនឹងបំពង់ទីបខ្ទេចមុខអស់ ហើយបានដុតសាកសពហ្នឹងបានឆេះទាំងផ្ទះទាំងអីទាំងអស់បាទ ព្រោះករណីហ្នឹង ព្រោះលុយកាក់អីអត់មានយកផងបង សុខចិត្តលុយឆេះចោលអស់ហើយ លុយ បីបួនម៉ឺនដុល្លារហ្នឹងឆេះចោល ហើយយើងគិតថាមិនមែនជារឿងប្លន់ទេ»។
នៅក្នុងករណីនេះ អាជ្ញាធរសន្និដ្ឋានថាជារឿងឃាតកម្ម អាចមានពាក់ព័ន្ធនឹងរឿងធ្វើអាជីវកម្មជួញដូរពោតរបស់ស្មៀនឃុំ ហើយសមត្ថកិច្ចខេត្តប៉ៃលិន កំពុងស៊ើបអង្កេតរកមុខសញ្ញា ដើម្បីចាប់ជនសង្ស័យមកផ្ដន្ទាទោសតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។