ពលរដ្ឋមួយគ្រួសារជាតំណាងសហគមន៍ ចេញមុខរ៉ាប់រងសងបំណុលជំនួសពលរដ្ឋជាច្រើនគ្រួសារទៀតនៅភូមិបត់ត្រង់ ឃុំកោះថ្កូវ ស្រុកជលគីរី ខេត្តកំពង់ឆ្នាំង។ ការសម្រេចចេញមុខតែម្នាក់ឯងក្នុងការខ្ចីប្រាក់ពីធនាគារមកសងបង្គ្រប់ថ្លៃស្ថាបនាផ្លូវលំមួយខ្សែចូលភូមិនេះ បន្ទាប់ពីរូបគាត់ និងពលរដ្ឋចំនួនពីរនាក់ផ្សេងទៀត ជាអ្នកផ្ដើមគំនិតក្នុងការកសាងផ្លូវនេះឡើង ប៉ុន្តែរៃអង្គាសប្រាក់ពីប្រជាពលរដ្ឋក្នុងភូមិមិនបានគ្រប់ចំនួននៃថ្លៃសាងសង់ផ្លូវនោះ។
ការចេញមុខខ្ចីប្រាក់ពីធនាគារអេស៊ីលីដា (ACLEDA) ចំនួន ២.៨លានរៀលរបស់តំណាងសហគមន៍ភូមិបត់ត្រង់ នៃឃុំកោះថ្កូវ ដើម្បីសងបង្គ្រប់ថ្លៃធ្វើផ្លូវចម្ងាយជិត ២គីឡូម៉ែត្រចេញពីចំណុចព្រៃពោធិ៍ រហូតមកដល់ក្នុងភូមិបត់ត្រង់ បានក្លាយជាបំណុលទឹកភ្នែក។ ចំណែកអាជ្ញាធរភូមិឃុំ ហាក់ព្រងើយកន្តើយមិនជួយដោះស្រាយបញ្ហា និងលើកទឹកចិត្តចំពោះពលរដ្ឋដែលខំខ្នះខ្នែងចង់ជួយអភិវឌ្ឍន៍ក្នុងមូលដ្ឋាន។
តំណាងសហគមន៍ភូមិបត់ត្រង់ អ្នកស្រី យ៉ប់ គន្ធា មានប្រសាសន៍នៅថ្ងៃទី៩ ខែតុលា ថា ក្រោយពីផ្លូវធ្វើរួចនៅខែមេសា ឆ្នាំ២០១៤ អ្នកភូមិមានភាពងាយស្រួលធ្វើដំណើរចេញចូលទៅធ្វើស្រែចម្ការ និងដឹកជញ្ជូនកសិផល។ អ្នកស្រីបន្តថា ផ្លូវនេះបានបម្រើផលប្រយោជន៍ឲ្យសាធារណៈ ប៉ុន្តែគ្រួសារគាត់ត្រូវឈ្លោះបែកបាក់គ្នា ដោយសារតែបញ្ហារកប្រាក់ស្ទើរមិនបានគ្រប់បង់ការប្រាក់ឲ្យទៅធនាគារ ចំណែកប្រាក់ដើមនៅជំពាក់គេចំនួន ២.៨លានរៀលដដែល។
អ្នកស្រី យ៉ប់ គន្ធា៖ «ដល់ជំពាក់គេច្រើន ប្ដីខ្ញុំទូទាត់ជាមួយខ្ញុំថាជំពាក់លើអី? ខ្ញុំថាចុះលុយហ្នឹង ខ្ញុំមានលុយឯណាបើមិនទៅរកគេ? បើភ្លាមៗដល់ថ្ងៃទៅហើយ។ អ៊ីចឹងគាត់ចេះតែរករឿងខ្ញុំគ្រប់ពេលវេលា ចេះតែទាស់គ្នា អ៊ីចឹងរហូតដល់ឥឡូវគាត់រត់ទៅថៃបាត់ហើយ។ ជាចុងក្រោយខ្ញុំសំណូមពរអាជ្ញាធរភូមិឃុំឲ្យជួយរកដំណោះស្រាយលុយ ២លាន ៨០ម៉ឺនរៀលឲ្យខ្ញុំវិញផង»។
អ្នកស្រីបញ្ជាក់ថា តាមគម្រោងផ្លូវប្រវែង ១.៧០០ម៉ែត្រ ត្រូវចំណាយទឹកប្រាក់ ១២លានរៀល ដែលជាប្រាក់របស់អ្នកភូមិបត់ត្រង់ ប្រមាណជា ៥០គ្រួសារ តាមរយៈការរៃអង្គាស និងកំណត់ទំហំដីកសិកម្មដែលត្រូវឆ្លងកាត់ផ្លូវនេះទៅធ្វើក្នុងមួយហិកតារ ១២ម៉ឺនរៀល។ ប៉ុន្តែការចំណាយលើការសាងសង់អស់ទឹកប្រាក់រហូតដល់ ២១លាន ១០ម៉ឺនរៀល ហើយសព្វថ្ងៃមានអ្នកភូមិប្រហែលពីរ ឬបីគ្រួសារជំទាស់មិនឲ្យអ្នកស្រុកភូមិបរទេះកាត់ ដោយអះអាងថា ផ្លូវដែលបានធ្វើរួចនោះប៉ះពាល់លើដីរបស់ពួកគេ។
ឆ្លើយតបបញ្ហានេះមេឃុំកោះថ្កូវ លោក ចិន ផាន់ណា មានប្រសាសន៍ថា អាជ្ញាធរឃុំនិងស្រុកបានយកចិត្តទុកដាក់ខ្លាំងលើបញ្ហានេះ ហើយនៅក្នុងរយៈពេលប្រហែល ១សប្ដាហ៍ទៀតនឹងមានការកោះប្រជុំសមាជិកសហគមន៍ ដើម្បីពិភាក្សារកដំណោះស្រាយ ឬត្រូវនាំគ្នារៃអង្គាសប្រាក់បន្ថែមទៀត ដើម្បីឲ្យទៅអ្នកស្រី យ៉ប់ គន្ធា យកទៅបង់ផ្ដាច់ធនាគារ។
លោកថា កន្លងមកអាជ្ញាធរឃុំធ្លាប់ជួយថវិកាខ្លះដែរលើគម្រោងស្ថាបនាផ្លូវនេះ៖ «ឃុំក៏ទទួលបានការណែនាំពីស្រុកឲ្យជួយធ្វើការសម្របសម្រួល ហើយឃុំក៏បានធ្វើការសម្របសម្រួល ប៉ុន្ដែផ្លូវហ្នឹងវាពាក់ព័ន្ធទៅនឹងពីរឃុំ គឺឃុំជលសា និងឃុំកោះថ្កូវ តែដោយសារតែឥឡូវនេះទឹកវាលិចយើងលំបាកនឹងប្រមូលប្រជាពលរដ្ឋដែលជាសមាជិកប្រជុំហេតុ ដើម្បីឲ្យគាត់ចូលរួមបន្ថែមទៀត។ ប្រហែលជាសប្ដាហ៍ក្រោយ គឺថាយើងចាប់ផ្ដើមប្រមូលសមាជិករបស់គាត់ទាំងអស់ហ្នឹងមកប្រជុំ»។
នាយកអង្គការបង្កើនសមត្ថភាពសហគមន៍ដើម្បីអភិវឌ្ឍន៍(CCD) អ្នកស្រី យឹម លាងអ៊ី ថ្លែងថា ការកសាងផ្លូវថ្នល់នេះ គឺដើម្បីបម្រើផលប្រយោជន៍សាធារណៈ ដូច្នេះបន្ទុកនៃការទទួលខុសត្រូវមិនត្រូវធ្លាក់តែទៅលើតំណាងសហគមន៍ម្នាក់នោះទេ គឺអាជ្ញាធរភូមិឃុំនិងប្រជាពលរដ្ឋទាំងអស់ជាអ្នកទទួលខុសត្រូវរួម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។