ប្រជាពលរដ្ឋជាសាច់ញាតិរបស់ពលការិនីទៅធ្វើការនៅប្រទេសម៉ាឡេស៊ី នៅស្រុកស្វាយជ្រំ ខេត្តស្វាយរៀង នៅថ្ងៃទី១៨ មីនា បានដាក់ពាក្យបណ្ដឹងស្វែងរកកូននៅអង្គការសង្គមស៊ីវិល និងស្ថាប័នពាក់ព័ន្ធខេត្តនេះ ឲ្យជួយអន្តរាគមន៍ស្វែងរកកូនដែលបាត់ខ្លួន ពេលធ្វើការនៅប្រទេសម៉ាឡេស៊ី ត្រឡប់មកកម្ពុជា វិញ។ សាច់ញាតិពលការិនីបញ្ជាក់ថា ការប្ដឹងស្វែងរកកូន ដោយសារបាត់ដំណឹងគ្មានការទំនាក់ទំនងគ្នាតាំងតែពីចេញទៅម៉ាឡេស៊ី ជាង ២ឆ្នាំមកហើយ។
ឪពុករបស់ពលការិនីដែលទៅធ្វើការនៅប្រទេសម៉ាឡេស៊ី អំពាវនាវសុំឲ្យស្ថាប័នពាក់ព័ន្ធរបស់រដ្ឋាភិបាល និងអង្គការសង្គមស៊ីវិលនានា ជួយស្វែងរកកូនស្រីរបស់ខ្លួននៅប្រទេសម៉ាឡេស៊ី ឲ្យត្រឡប់មកស្រុកកំណើតវិញជាបន្ទាន់ ព្រោះការបាត់ដំណឹងច្រើនឆ្នាំ ព្រួយបារម្ភខ្លាចកូនមានគ្រោះថ្នាក់ និងជួបបញ្ហាអ្វីមួយពេលធ្វើការនៅក្រៅប្រទេស។
ឪពុករបស់ពលការិនីរស់នៅភូមិថ្នា ឃុំគោកព្រីង នៃស្រុកស្វាយជ្រំ លោក ពៅ លី ថ្លែងបញ្ជាក់នៅថ្ងៃទី១៨ មីនា ថា កូនរបស់លោកដែលបាត់ខ្លួននៅប្រទេសម៉ាឡេស៊ី ឈ្មោះ កញ្ញា ពៅ ស្រីណា អាយុ ១៩ឆ្នាំ បានចេញទៅធ្វើការជាអ្នកបម្រើតាមផ្ទះនៅប្រទេសម៉ាឡេស៊ី ដោយស្របច្បាប់ តាមរយៈក្រុមហ៊ុននាំពលករទៅធ្វើការនៅក្រៅប្រទេស អេ.ភី.ធី.អែស.អ៊ី.ស៊ី (APTSEC) គិតមកទល់ពេលនេះមានរយៈពេលជាង ២ឆ្នាំហើយ គឺតាំងតែពីខែតុលា ឆ្នាំ២០១១ រហូតមក។ លោក ពៅ លី បញ្ជាក់ថា ចាប់តាំងពីពេលកូនចេញទៅធ្វើការនៅប្រទេសម៉ាឡេស៊ី មក កូនរបស់លោកពុំដែលបានទំនាក់ទំនងមករកសាច់ញាតិនៅឯស្រុកខ្មែរម្ដងណានោះទេ។
លោកថា លោកបានព្យាយាមទូរស័ព្ទសួរទៅក្រុមហ៊ុនដែលនាំកូនទៅធ្វើការនៅប្រទេសម៉ាឡេស៊ី ដែរ ប៉ុន្តែពុំទទួលបានដំណឹងអ្វីទាល់តែសោះ៖ «សន្យាតែ២ឆ្នាំទេបងបាទ! ឥឡូវវាលើសប្រមាណ ៤-៥-៦ខែហើយ អត់ឃើញកូន ហើយកូនតាំងពីទៅបាត់ដំណឹងសូន្យឈឹងតែហ្មង។ ឥឡូវខ្ញុំកំពុងតែដាក់ពាក្យទៅអង្គការអាដហុក (Adhoc) ហើយអាដែងនែកលីកាដូ (Licadho) បាន២កន្លែងហើយ នៅតែ ឥឡូវដល់ម៉ាង២ហ្នឹង ខ្ញុំទៅកន្លែងនគរបាល កន្លែងប៉ូលិសបង!។ ស្នងការហ្នឹងមួយកន្លែង ហើយមន្ទីរការងារទៀត»។
ឆ្លើយតបនឹងបញ្ហានេះ ប្រធានក្រុមហ៊ុននាំពលករទៅធ្វើការនៅប្រទេសម៉ាឡេស៊ី អេ.ភី.ធី.អែស.អ៊ី.ស៊ី លោក សេង សិទ្ធិជ័យ មានប្រសាសន៍បញ្ជាក់ថា ការដែលពលការិនីពុំបានទាក់ទងមករកសាច់ញាតិរយៈពេលជាង២ឆ្នាំនៅស្រុកខ្មែរ គឺពុំមែនមានន័យថា ពលការិនីបាត់ខ្លួននោះទេ។ លោក សេង សិទ្ធិជ័យ គូសបញ្ជាក់ថា ការដែលមិនបានទាក់ទងគ្នានេះ គឺដោយសារសាច់ញាតិរបស់ពលការិនីមិនបានផ្ដល់ដំណឹងពីការបាត់ការទំនាក់ទំនងកូននៅប្រទេសម៉ាឡេស៊ី ដល់ក្រុមហ៊ុន ដើម្បីធ្វើការស្រាវជ្រាវរកមូលហេតុពីការបាត់ដំណឹង៖ «យើងមិនអាចនិយាយតាមរយៈធម្មតាៗអ៊ីចឹងបានទេបង! ដោយសារកូនគាត់ឈ្មោះអី អត្តលេខប៉ុន្មាន ចុះឈ្មោះហ្នឹងតាមរយៈក្រុមហ៊ុនខ្ញុំពិតប្រាកដ ឬក៏តាមមជ្ឈមណ្ឌលណាមួយអ៊ីចឹងណាបង។ បើសិនជាគាត់មានពាក្យបណ្ដឹងត្រឹមត្រូវហើយ អត់អីទេ ចាំគេទាក់ទងមកខ្ញុំទៅ ដើម្បីខ្ញុំយកឈ្មោះយកអត្តលេខហ្នឹងស្រាវជ្រាវឲ្យគាត់ ចុះឈ្មោះតាមរយៈក្រុមហ៊ុនខ្ញុំពិតប្រាកដមែនអត់។ ហើយបើចុះតាមខ្ញុំៗនឹងទាក់ទងនឹងដៃគូភ្លាម ដើម្បីដោះស្រាយឲ្យគាត់ណាស់!»។
ទាក់ទងបញ្ហានេះ មន្ត្រីសម្របសម្រួលអង្គការអាដហុក ប្រចាំខេត្តស្វាយរៀង អ្នកស្រី កើត ផល្លី មានប្រសាសន៍ដោយចាត់ទុកការបាត់ដំណឹងរយៈពេលជាង ២ឆ្នាំរបស់ពលការិនីនេះថា ជារឿងខុសច្បាប់នៃកិច្ចសន្យា៖ «ក្រុមហ៊ុនហ្នឹងវារំលោភលើច្បាប់ទៅហើយ ព្រោះអីកិច្ចសន្យាវាតែ២ឆ្នាំទេ ឥឡូវហួសកាលកំណត់របស់កូនគាត់ហើយ។ ហើយម្យ៉ាងបាត់ដំណឹងឈឹង សូម្បីតែគាត់ទូរស័ព្ទទៅចូលហើយ មិនលើកទៀត។ ហ្នឹងហើយដែលវារំលោភលើកិច្ចសន្យាហ្នឹង អំពើហ្នឹងហើយដែលជាអំពើខុសច្បាប់»។
កន្លងមក ករណីពលករពលការិនីខ្មែរទៅធ្វើការនៅក្រៅប្រទេស ទាំងទៅដោយស្របច្បាប់ និងមិនស្របច្បាប់ បានបាត់ខ្លួន តែងតែកើតជាបន្តបន្ទាប់។ ហើយរាល់ការបាត់ខ្លួននោះ អង្គការសង្គមស៊ីវិលរកឃើញថា ភាគច្រើន គឺកើតចេញពីការកេងចំណេញលើកម្លាំងពលកម្មរបស់ពលករ ដែលធ្វើការនៅក្រៅប្រទេសនោះតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។