ក្រុមគ្រួសារជនរងគ្រោះអំពាវនាវអោយសមត្ថកិច្ចពាក់ព័ន្ធ ស្វែងរកជនដៃដល់ក្នុងសំណុំរឿងឃាតកម្មលើ លោក តាំង ស៊ីម មកផ្ដន្ទាទោស។
ម្តាយជនរងគ្រោះ អ្នកស្រី រស់ ផៃ បានឱ្យដឹងដែរថា កូនអ្នកស្រីត្រូវបានស្លាប់យ៉ាងវេទនា ហើយអ្នកស្រីក៏នៅតែមានអារម្មណ៍មិនស្ងប់នោះដែរ នៅពេលដែលសមត្ថកិច្ចមិនទាន់វែកមុខរកឃាតកឃើញនោះ៖ «ហៅរកឃើញ ហើយគេហៅទៅស្រុកបញ្ជាក់មើល គេថាមិនមែនទេ គេលែងជនជាប់ហ្នឹងត្រឡប់មកវិញ។ ហើយនៅក្នុងខ្លួនខ្ញុំមិនអស់ចិត្តសោះ កូនខ្ញុំស្លាប់ដូចខ្មោចឆ្កែខ្មោចឆ្មា! រួចអយុត្តិធម៌ច្បាប់ណាដូចមិនបានចេញផ្ដន្ទាជនល្មើសហ្នឹងសោះ ឱ្យជនល្មើសរស់នៅដោយស្រួល សុខសូន្យសើចដឺដងទៀត។ ហើយកូនខ្ញុំនេះ ស្លាប់យ៉ាងវេទនា ប្រធានភូមិណាអើពើសួរនាំអីអើឈ្ងោកអី។ បុណ្យទានអីគ្មានមកក្បែររោងអីម៉ាបន្តិច។ ខ្ញុំដូចមិនអស់ចិត្ត កូនខ្ញុំស្លាប់យ៉ាងអាណោចអាធ័មខ្លាំងជាទីបំផុត»។
ជនរងគ្រោះឈ្មោះ តាំង ស៊ីម អាយុ ៣១ឆ្នាំ រស់នៅភូមិកំពង់សំណាញ់ ឃុំមៀន ស្រុកព្រៃឈរ ខេត្តកំពង់ចាម ត្រូវប្រទះឃើញដេកស្លាប់ក្នុងបឹងធំក្បែរផ្ទះជនរងគ្រោះ ដោយមានស្នាមកាប់ជាច្រើនកាំបិតកាលពីថ្ងៃទី១០ ខែតុលា។
ថ្លែងរៀបរាប់ទាំងទឹកភ្នែកបន្ទាប់ធ្វើពិធីបុណ្យសពប្រាំពីរថ្ងៃរបស់ប្ដីត្រូវបានបញ្ចប់។ អាយុ ៣០ឆ្នាំ ដែលជាប្រពន្ធជនរងគ្រោះ អ្នកស្រី លឿង អី បានឱ្យដឹងថា ទៅថ្ងៃមុខ ស្ថានភាពរស់នៅរបស់អ្នកស្រីនឹងកាន់តែលំបាកឡើងៗពីមួយថ្ងៃទៅមួយថ្ងៃ ដោយសារការបាត់បង់កម្លាំងក្នុងគ្រួសារ។ ពេលនេះ អ្នកស្រីមិនមានអ្វីទីពឹងនោះទេ ឯកូនទាំង ៤នាក់ នៅតូចៗ ហើយអ្នកស្រីកំពុងពពោះ និងមានឪពុកចាស់ជរាម្នាក់ទៀតក្នុងបន្ទុក។ អ្នកស្រីបន្តថា កាលពីថ្ងៃទី៩ ខែតុលា ប្ដីរបស់អ្នកស្រីបានទៅនេសាទនៅក្នុងបឹងក្បែរផ្ទះដូចរាល់ថ្ងៃ ដើម្បីយកត្រីមកលក់គ្រាន់ទិញអង្ករហូបប្រចាំថ្ងៃ។ ប៉ុន្តែ មិនបានត្រឡប់មកផ្ទះវិញនោះទេ ហើយមួយថ្ងៃបន្ទាប់ ក៏ត្រូវបានគេប្រទះឃើញសាកសពនៅក្នុងបឹងធំនៅក្បែរផ្ទះ ដោយមានស្នាមកាប់ជាច្រើនកាំបិត។
អ្នកស្រី លឿង អី៖ «គាត់ហ្នឹងទៅរាយមង ហើយគាត់យកអីៗ អីវ៉ាន់អីទៅដេកទូកទៅ គេកាប់គាត់តែម្តងទៅ។ កាប់ច្រើនដែរហ្នឹង! កាប់ពីនេះមកដល់នេះ ខ្ទេចខ្លួនដៃហ្នឹងឡើងខ្ទេចខ្លួនដៃជើង។ កាប់ឡើងសាំ អស់ហើយ»។
ចំណែកឯបងថ្លៃជនរងគ្រោះ លោក ហួរ ស៊ាងហ៊ន បានឱ្យដឹងដែរថា កន្លងមក ខាងអាជ្ញាធរមានសមត្ថកិច្ច បានស៊ើបអង្កេត និងចាប់ជនសង្ស័យម្នាក់ក្នុងករណីរឿងឃាតកម្មនេះ ប៉ុន្តែពេលបញ្ជូនដល់ខេត្ត ជនសង្ស័យត្រូវបានបញ្ជូនត្រឡប់មកវិញ។ លោកបន្តថា អ្វីដែលលោកមិនអស់ចិត្តមួយទៀតនោះ ត្រង់ថា អាជ្ញាធរភូមិឃុំដែលបានដឹងឮ ហើយថាគ្រួសាររបស់ប្អូនលោកជាគ្រួសារដែលមានភាពលំបាកក្រខ្សត់នោះ ប៉ុន្តែអាជ្ញាធរទាំងនោះមិនបានជួយឈឺឆ្អាលក្នុងនាមខ្លួនជាអ្នកគ្រប់គ្រងគេនោះឡើយ។
លោកបន្ថែមទៀតថា លោកនៅតែជឿជាក់លើសមត្ថកិច្ច និងតុលាការ ដើម្បីស្វែងរកយុត្តិធម៌ដល់ប្អូនរបស់លោក៖ «ខ្ញុំជឿលើយុត្តិធម៌ ជឿលើប៉ូលិសសមត្ថកិច្ច ហើយក៏ជឿលើតុលាការ មិនមែនថាអូ! តុលាការគ្មានយុត្តិធម៌ទេ ខ្ញុំច្បាស់ជាជឿ គឺសូមឱ្យតុលាការសម្រេចយុត្តិធម៌។ ហើយសុំអំពាវនាវដល់សប្បុរសជនទាំងអស់ដែលមានសទ្ធាជ្រះថ្លា ជួយដល់គ្នាផង ខ្ញុំឃើញថាគ្នាកម្សត់ណាស់ កូនប្រាំ ហើយមានឪពុកចាស់ជរាម្នាក់ទៀត»។
ទាក់ទងនឹងការបញ្ជូនជនសង្ស័យឱ្យវិលត្រឡប់មកវិញពេលនេះ អធិការស្រុកព្រៃឈរ លោក កែវ ស៊ាងហន់ បានលើកឡើងថា កន្លងមកមានតម្រុយថា មានជនសង្ស័យម្នាក់ដែលពាក់ព័ន្ធនៅក្នុងរឿងនេះ ប៉ុន្តែដោយសារពុំមានភស្តុតាងគ្រប់គ្រាន់ ទើបសម្រេចបញ្ជូនមកវិញ។ លោកបន្តថា ខាងលោក និងខាងស្នងការខេត្ត សហការគ្នាដើម្បីស្រាវជ្រាវបញ្ហានេះបន្តទៀត៖ «ថាទៅតាមតម្រុយថាមានពាក់ព័ន្ធក្នុងការសង្ស័យ ក្រោយមកយើងបានបញ្ជូនទៅដល់ខេត្ត យើងរកភស្តុតាងឱ្យស៊ីចង្វាក់គ្នាមិនទាន់បាន ក៏បានឱ្យវិលមកវិញសិន ដើម្បីឱ្យការងារស្រាវជ្រាវ ដើម្បីធ្វើការស្រាវជ្រាវបន្តទៀត ដើម្បីបំពេញទៅនឹងនីតិវិធី ហើយខ្ញុំក៏មិនទាន់ហ៊ាននិយាយវែងឆ្ងាយដែររឿងហេតុហ្នឹង ទុកឱ្យជំនាញខេត្ត និងស្រុកនេះធ្វើការបន្តទៀត ដោយមានការដឹកនាំបន្ត និងចង្អុលបង្ហាញពីឧត្តមសេនីយ៍ស្នងការ និងស្នងការរងខេត្ត»។
ស្របគ្នានេះ ប្រពន្ធ និងក្រុមគ្រួសារជនរងគ្រោះ អំពាវនាវសុំឱ្យសប្បុរសជនចូលរួមចំណែកក្នុងការជួយសម្រាលទុក្ខលំបាកដល់គ្រួសារជនរងគ្រោះ ដែលកំពុងតែរស់នៅក្នុងសភាពខ្វះខាតនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។