អ្នកស្រុកនៅខេត្តបាត់ដំបង និងនៅខេត្តបន្ទាយមានជ័យ បានអំពាវនាវសុំឲ្យរដ្ឋាភិបាលកម្ពុជា ជួយរកទីផ្សារលក់កសិផលពោតជាច្រើនម៉ឺនតោនដែលបានប្រមូលផលពីចម្ការ។ កសិផលពោតទាំងនោះ ពួកគាត់លក់បានតម្លៃទាប និងពោតនៅតាមតំបន់ខ្លះទៀត ពុំមានក្រុមឈ្មួញចូលទៅទិញនោះឡើយ។
កសិករឈ្មោះ នាង ភឿន រស់នៅស្រុកសំពៅលូន ខេត្តបាត់ដំបង ថ្លែងនៅថ្ងៃទី១២ សីហា ថា នៅឆ្នាំ២០១៣ នេះ ប្រជាពលរដ្ឋជាអ្នកប្រកបរបរកសិកម្មបាននាំដាំដំណាំពោតច្រើនជាងឆ្នាំ២០១២ កន្លងទៅ។ នៅពេលពោតឲ្យផល ពួកគាត់បាននាំគ្នាចុះកាច់ពីចម្ការ ប៉ុន្តែបែរជាផលពោតទាំងនោះលក់បានតម្លៃទាបអត់ទីផ្សារទៅវិញ។ វិបត្តិអត់ទីផ្សារនេះបានញ៉ាំងឲ្យពួកគាត់មានការព្រួយបារម្ភពីការខាតបង់ដើមទុន និងអាចធ្លាក់ខ្លួនជំពាក់លុយគេថែមទៀត។
កសិករ នាង ភឿន៖ «សំណូមពរឲ្យខាងខេត្តបាត់ដំបង ជួយរកទីផ្សារឲ្យប្រជាពលរដ្ឋឲ្យបានតម្លៃ កុំឲ្យវាចុះខ្លាំងពេក។ ឥឡូវនេះពោតស្នូល ១គីឡូក្រាមលក់បានជាង ៤បាត (ស្មើ៤០០ប្រាក់រៀល) ចង់ឲ្យបានតម្លៃខ្ពស់ជាងនេះ សមរម្យ បើមិនអ៊ីចឹងទេ អត់រួចថ្លៃទេ ប្រជាជនចងកងាប់អស់ហើយ»។
កសិករជាច្រើននាក់ទៀតរស់នៅស្រុកម៉ាឡៃ ខេត្តបន្ទាយមានជ័យ ថ្លែងថា កសិផលពោតរបស់ពួកគាត់កំពុងជួបវិបត្តិអត់ទីផ្សារ។ ម្យ៉ាងវិញទៀត ក្រុមឈ្មួញកណ្ដាលដែលដើរប្រមូលទិញពោតនៅក្នុងស្រុក ពួកគេទិញក្នុងតម្លៃទាប ធ្វើឲ្យពួកគាត់ពុំអាចលក់ពោតទាំងនោះបាន។
ពួកគាត់បញ្ជាក់ថា ឥឡូវនេះកសិផលពោតខ្លះដែលទុកគរចោលក្នុងចម្ការរងការខូចខាតថែមទៀត៖ «តម្លៃអត់មានហាងឆេង អត់មានទីផ្សារ ហើយគេមិនទិញទៀត គេយកតិចតួច រើសយករបស់ដែលល្អបំផុត។ សុទ្ធតែដាក់ប្លង់នៅអង្គការ (ធនាគារ)។ របស់ដែលធ្វើបានហើយអត់មានទីផ្សារអ៊ីចឹង។ នៅខែ៨ នេះ ច្រើនណាស់ ពោតព្រោះអីដំឡូងដាំមួយសាទៅភ្ជួរចោលអស់ប្រជាជននៅស្រុកនេះខាតអស់មួយសាហើយ ដំឡូងភ្ជួរដីដាំពោតមួយសាទៀត តែឥឡូវពោតអត់មានទីផ្សារ អ៊ីចឹងទៅខូច កាច់ហើយដុះក្នុងចម្ការគេអត់ទិញយើង»។
បច្ចុប្បន្នមានក្រុមឈ្មួញដើរទិញពោតនោះដែរ ប៉ុន្តែពួកគេទិញក្នុងចំនួនតិចតួច ហើយពួកគេហ៊ានឲ្យតម្លៃទាបខុសពីការចង់បានរបស់កសិករ។ ពោតស្នូលមួយគីឡូក្រាមលក់បានថ្លៃ ៤.១បាត ឬស្មើប្រហែល ៤០០ប្រាក់រៀលប៉ុណ្ណោះ។ តម្លៃនេះ បានធ្វើឲ្យអ្នកដាំពោតនៅក្នុងខេត្តបាត់ដំបង និងខេត្តបន្ទាយមានជ័យ ខាតបង់ច្រើន ព្រោះនៅពេលចុះបង្កបង្កើនផលដាំដុះ ពួកគាត់ខ្លីលុយពីអង្គការ និង ធនាគារយកទៅធ្វើដើមទុន ជួលកម្លាំងពលកម្មដាំដុះ ហើយនៅពេលប្រមូលផលត្រូវជួលកម្លាំងពលកម្មថែមទៀត៖ «សុំរដ្ឋាភិបាលជួយប្រជាពលរដ្ឋ ពោតនេះស្រេចតែគេទិញម្ដងបីបាត ម្ដង ៤បាត។ វេទនាខ្លាំងណាស់ឆ្នាំនេះ អត់មានទីផ្សារទេ សុំឲ្យរដ្ឋាភិបាលដោះស្រាយឆាប់ៗបន្តិចមកវេទនាខ្លាំងណាស់»។
កាលពីឆ្នាំ២០១២ កន្លងទៅ ពោតស្នូល ១គីឡូក្រាមលក់បានថ្លៃ ៤.៧បាត ស្មើជាង ៥០០ប្រាក់រៀល ប៉ុន្តែនៅឆ្នាំ២០១៣ នេះ ពោតស្នូលលក់បានតម្លៃតែ ៤បាត ស្មើ ៤០០ប្រាក់រៀលប៉ុណ្ណោះ។ បញ្ហា នេះបានធ្វើឲ្យអ្នកដាំពោតទាំងនោះព្រួយបារម្ភចំពោះការខាតបង់និងជំពាក់បំណុលធនាគារ។
កសិផលពោតនៅស្រុកខ្មែរត្រូវបានក្រុមឈ្មួញប្រមូលទិញ បន្ទាប់មកដឹកយកទៅលក់នៅប្រទេសថៃ និងប្រទេសវៀតណាម និងមួយចំនួនទៀតនាំចេញទៅប្រទេសចិន។ យ៉ាងណាក៏ដោយ វិបត្តិទីផ្សារ និងសេចក្ដីអំពាវនាវរកទីផ្សារលក់កសិផលពោតរបស់កសិករខ្មែរកើតមានឡើងចំពេលដែលប្រទេសកម្ពុជា មានការរំជើបរំជួលខាងផ្នែកនយោបាយនៅក្រោយការបោះឆ្នោត ហើយរដ្ឋាភិបាលដែលគេរំពឹងថា នឹងកើតចេញពីការបោះឆ្នោតកាលពីថ្ងៃទី២៨ កក្កដា នោះ រហូតមកដល់ពេលនេះ ក៏មិនទាន់លេចចេញជារូបរាងនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។