ឪពុកជនជាប់ចោទជាចោរលួចម៉ូតូម្នាក់ អះអាងថា ប៉ូលិសបានធ្វើទារុណកម្មកូនប្រុសគាត់ធ្ងន់ធ្ងរ ខណៈកូនប្រុសគាត់ត្រូវបានចាប់ឃុំខ្លួននៅអធិការដ្ឋានប៉ូលិស ខេត្តរតនគិរី។ មន្ត្រីសិទ្ធិមនុស្សពិនិត្យឃើញមានស្លាកស្នាមនៅលើខ្លួនជនជាប់ចោទ ដែលជាភស្តុតាងពាក់ព័ន្ធនឹងការធ្វើទណ្ឌកម្ម។
ឪពុកពិរុទ្ធជនមួយរូប អំពាវនាវឲ្យសមត្ថកិច្ចពាក់ព័ន្ធស៊ើបអង្កេតករណីប៉ូលិសធ្វើទណ្ឌកម្មធ្ងន់ធ្ងរមកលើកូនប្រុសគាត់ និងប្ដឹងសុំឲ្យដាក់ទោសទណ្ឌមន្ត្រីប៉ូលិសតាមច្បាប់ រួមទាំងទាមទារសំណងជំងឺចិត្តជាប្រាក់ ៥ពាន់ដុល្លារ។
ការអំពាវនាវនេះ ធ្វើឡើងបន្ទាប់ពីបុរសឈ្មោះ កុយ ពៅ អាយុ ៥០ឆ្នាំ រស់នៅភូមិអូររមៀត សង្កាត់ឡាបានសៀក ក្រុងបានលុង បានមកកាន់ការិយាល័យអង្គការសិទ្ធិមនុស្សអាដហុក (adhoc) ហើយស្នើសុំឲ្យអង្គការនេះធ្វើការស៊ើបអង្កេតទៅលើករណីកូនប្រុសគាត់ ដែលត្រូវប៉ូលិសវាយធំក្នុងពេលសួរចម្លើយ។ លោក កុយ ពៅ អះអាងថា កូនប្រុសគាត់បានបង្ហាញស្នាមធ្វើទារុណកម្មនៅលើខ្លួនប្រាណ និងបានបញ្ជាក់ថា នាយរងនគរបាលប៉ុស្តិ៍ឡាបានសៀក និងជាជំនួយការអធិការក្រុងបានលុង ឈ្មោះ ផន ទុំ ជាអ្នកវាយធ្វើទារុណកម្មលើរូបគេ ដោយសារខឹងថា ជនជាប់ចោទមិនសហការធ្វើរនុកក្នុងរបស់ប៉ូលិស ហើយទៅធ្វើចោរលួចម៉ូតូ។ លោកចាត់ទុកការវាយធ្វើទណ្ឌកម្មរបស់ប៉ូលិសលើកូនប្រុសគាត់ ថាជាអំពើឃោរឃៅ និងរំលោភសិទ្ធិមនុស្ស៖ «ស្នាមរបួសដូចកោសខ្យល់អ៊ីចឹង ប៉ុន្តែវាគ្រាំក្នុង។ សូមជួយរកយុត្តិធម៌ឲ្យខ្ញុំផង ឲ្យតុលាការកាត់ទោសតាមច្បាប់សងជំងឺចិត្តខ្ញុំ ដើម្បីមើលជំងឺកូនក្នុងគុក»។
ជនជាប់ចោទឈ្មោះ ពៅ ពីសាន់ អាយុ ២០ឆ្នាំ ត្រូវប៉ូលិសក្រុងបានលុង សហការជាមួយប៉ូលិសខេត្តកំពង់ចាម ចាប់ខ្លួននៅផ្ទះសំណាក់មួយនៅស្រុកមេមត់ កាលពីថ្ងៃទី១៦ ខែមីនា ពីបទលួចម៉ូតូពីខេត្តរតនគិរី។ បន្ទាប់ពីការឃាត់ខ្លួន ជនជាប់ចោទត្រូវបញ្ជូនមកអធិការដ្ឋានប៉ូលិសក្រុងបានលុង។
ឆ្លើយតបការចោទប្រកាន់នេះ អធិការប៉ូលិសក្រុងបានលុង លោក ហួត បូរី បដិសេធថាមិនមានមន្ត្រីប៉ូលិសណាម្នាក់ធ្វើទារុណកម្មជនជាប់ចោទនោះឡើយ៖ «គ្មានអ្នកណាវាយទេ វាចេះតែថា អត់ទេ យកវាមកគ្មានអ្នកណាប៉ះពាល់វាទេ។ វាជាប់គុកពីរបីដងហើយ ទើបចេញពីគុក»។
ផ្ទុយពីការអះអាងនេះ មន្ត្រីឃ្លាំមើលសិទ្ធិមនុស្សសមាគមអាដហុក លោក ឆាយ ធី អះអាងថា មន្ត្រីអយ្យការបានផ្តល់លទ្ធភាពឲ្យលោកបានជួបជាមួយជនជាប់ចោទ ខណៈប៉ូលិសបញ្ជូនរូបគេទៅតុលាការ។ លោកថា ភស្តុតាងស្នាមជាំច្រើនកន្លែងឃើញមាននៅលើខ្លួនជនជាប់ចោទ។ ដោយឡែកជនជាប់ចោទ ក៏បានអះអាងថា ប៉ូលិសបានវាយទាត់ធាក់លើរូបគេយ៉ាងធ្ងន់ធ្ងរ៖ «គោលការណ៍ច្បាប់ គឺត្រូវបានហាមឃាត់ពីការធ្វើទណ្ឌកម្ម បើទោះបីជាគាត់មានទោសក៏ដោយ។ ករណីនេះ យើងសំណូមពរឲ្យចាត់វិធានការតាមផ្លូវច្បាប់ដែរ»។
ទាក់ទិនករណីនេះដែរ ព្រះរាជអាជ្ញារងអមតុលាការខេត្តរតនគិរី លោក ជា សុភ័ក្រ មានប្រសាសន៍ថា មន្ត្រីសិទ្ធិមនុស្សអាចធ្វើរបាយការណ៍ស៊ើបអង្កេត និងរៀបចំលិខិតអន្តរាគមន៍ដាក់ជូនមន្ត្រីអយ្យការ ប្រសិនរកឃើញមានករណីធ្វើទារុណកម្មនេះមែន៖ «អាដហុកគាត់មកអ៊ីចឹង ខ្ញុំថាឲ្យគាត់ថតមើល បើថាមានភស្តុតាងគេវាយ។ ខ្ញុំថាឲ្យគាត់ធ្វើរបាយការណ៍ដាក់ចូលមក»។
យ៉ាងនេះក្តី ជនជាប់ចោទ ពៅ ពីសាន់ ត្រូវបានមន្ត្រីតុលាការសម្រេចឃុំខ្លួនក្នុងពន្ធនាគារកាលពីរសៀលថ្ងៃទី១៩ ខែមីនា ខេត្តរតនគិរី ពីបទចោរកម្ម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។