រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន បានចូលបំភ្លឺអំពីរឿងថវិកាជាតិនៅសភា តាមការស្នើសុំរបស់គណៈកម្មការជំនាញទី២។ សមាជិកសភាមកពីគណបក្សកាន់អំណាចនិងគណបក្សប្រឆាំង មិនមានការជំទាស់ ឬខ្វែងគំនិតគ្នាឡើយ ហើយច្បាប់ថវិកាជាតិសម្រាប់ឆ្នាំ២០១៥ នឹងត្រូវរដ្ឋសភាអនុម័តនៅចុងខែវិច្ឆិកានេះ។
តាមគម្រោងនៃគណៈកម្មការជំនាញទីពីរនៃរដ្ឋសភា បានកំណត់ថ្ងៃទី២៤វិច្ឆិកា គឺជាការឆ្លើយតបនិងពន្យល់បង្ហាញរបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា ស្ដីពីច្បាប់ថវិកាជាតិសម្រាប់ចំណាយនៅឆ្នាំ២០១៥ទៅលើការព្យាករណ៍លម្អិតនៃស្ថានភាពម៉ាក្រូសេដ្ឋកិច្ច រួមទាំងហិរញ្ញវត្ថុសាធារណៈ។
រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន បានបំភ្លឺនៅចំពោះមុខគណៈកម្មការជំនាញទីពីរនៃរដ្ឋសភា អំពីស្ថានភាពអភិវឌ្ឍសេដ្ឋកិច្ចកម្ពុជា និងកត្តាអវិជ្ជមានមួយចំនួនដែលអាចរាំងស្ទះដល់ការអភិវឌ្ឍសេដ្ឋកិច្ចជាតិនៅឆ្នាំ២០១៥នោះ មានដូចជា អស្ថិរភាពទីផ្សារពលកម្ម ការធ្លាក់ចុះនៃថ្លៃកសិផលនៅលើទីផ្សារអន្តរជាតិ។ ប៉ុន្តែស្ថានភាពសេដ្ឋកិច្ចកម្ពុជាប្រចាំឆ្នាំ២០១៤ បន្តរីកចម្រើន ក្នុងកម្រិតល្អប្រសើរ តាមរយៈការរៀបចំគោលនយោបាយស្ថិរភាពម៉ាក្រូសេដ្ឋកិច្ច ទាន់ពេលវេលា។
តាមការប៉ាន់ស្មានដោយក្រសួងសេដ្ឋកិច្ច និងហិរញ្ញវត្ថុ សេដ្ឋកិច្ចកម្ពុជាសម្រេចបានក្នុងកំណើន៧%ប្រចាំឆ្នាំ ក្នុងនោះ កំណើនពីវិស័យឧស្សាហកម្ម១០% សេវាកម្ម៧% និងវិស័យកសិកម្មប្រមាណ៣%។ ប៉ុន្តែការចង់បានរបស់ សមាជិកសភាមកពីគណបក្សប្រឆាំងវិញគឺចង់ក្រសួងសេដ្ឋកិច្ចនិងហិរញ្ញវត្ថុបង្ហាញអំពីឯកសារលម្អិតនៃចំណូលចំណាយថ្នាក់ជាតិនិងថ្នាក់ក្រោមជាតិ។
អនុប្រធានទីមួយនៃគណៈកម្មការជំនាញទីពីរនៃរដ្ឋសភា លោក សុន ឆ័យ មានប្រសាសន៍ថាព័ត៌មានស្ដីពីចំណូលចំណាយរដ្ឋបាល គឺជាឯកសារចាំបាច់បំផុតសម្រាប់ធ្វើជាមូលដ្ឋានសម្រាប់វាយតម្លៃ ការរៀបចំច្បាប់ថវិកាជាតិសម្រាប់ឆ្នាំ២០១៥។ ប៉ុន្តែកិច្ចប្រជុំនៅព្រឹកថ្ងៃទី២៤វិច្ឆិកានៅវិមានរដ្ឋសភា ភាគីខាងក្រសួងសេដ្ឋកិច្ច និងហិរញ្ញវត្ថុ មិនបានផ្ដល់ព័ត៌មានបន្ថែមអំពីឯកសារលម្អិតទាំងនោះឡើយ ។ សំឡេង
ការបញ្ជាក់របស់រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន បានអះអាងថា ក្រសួងមិនមានឯកសារលម្អិតស្ដីពី របាយការណ៍ចំណូលចំណាយថ្នាក់ក្រោមជាតិនោះទេ ដោយសារតែការរៀបចំច្បាប់ថវិកាជាតិកន្លងមក គឺរៀបចំបែបមជ្ឈការ មានន័យថា កញ្ចប់ថវិកាចំណាយទាំងអស់គឺរដ្ឋាភិបាលជាអ្នកកំណត់ទៅតាមក្រសួងមន្ទីរនៅតាមថ្នាក់ខេត្ត ។ ម្យ៉ាងវិញទៀត រាល់ការចំណាយទាំងអស់ រាជរដ្ឋាភិបាល ហាក់មិនដែលទាមទារឯកសារលម្អិតពីថ្នាក់ក្រោមជាតិនោះទេ។
ទោះជាយ៉ាងណាក៏ដោយច្បាប់ថវិកាជាតិសម្រាប់ឆ្នាំ២០១៥ ដែលមានទឹកប្រាក់ប្រមាណ៤ពាន់លានដុល្លារអាមេរិក សភាគ្រោងនឹងអនុម័តនៅចុងខែវិច្ឆិកាដោយគ្មាន ការតវ៉ាពីគណបក្សប្រឆាំងឡើយ។ ការអនុម័តដោយរលូននេះ ដោយសារតែក្រសួងសេដ្ឋកិច្ច បានប្ដេជ្ញាចិត្តថា នឹងពង្រឹងលើការប្រមូលពន្ធបន្ថែម និងកំណែទម្រង់ច្បាប់ថវិកាជាតិប្រកបដោយប្រសិទ្ធភាពបំផុត រួមទាំងបង្កើតឲ្យមានបទដ្ឋានរួមគ្នា សម្រាប់រៀបចំច្បាប់ថវិកាជាតិឲ្យបាន នៅឆ្នាំ២០២០៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។