លោកវរសេនីយ៍ទោ នេត វន្ថា ប្រធានការិយាល័យនគរបាលបង្ការ និងពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញ មានប្រសាសន៍ថា ម៉ោងប្រមាណ ២រសៀល ថ្ងៃទី២១ ឧសភា អគ្គីភ័យបានឆាបឆេះផ្ទះមួយខ្នង ដែលមានទំហំ ៣x៦ម៉ែត្រ បណ្ដាលឲ្យខូចខាតទាំងស្រុង។ លោកបន្តថា គិតមកដល់ពេលនេះ អគ្គីភ័យត្រូវបានពន្លត់ទាន់ពេលវេលា ពុំបានរាលដាលដល់លំនៅឋានជិតខាងនោះទេ។
លោក នេត វន្ថា បញ្ជាក់ថា មូលហេតុពិតប្រាកដដែលបណ្ដាលឲ្យអគ្គីភ័យឆាបឆេះនេះ គេនៅមិនទាន់រកមូលហេតុឃើញនៅឡើយ។ ទោះជាបែបណា លោកបញ្ជាក់ថា អគ្គីភ័យនេះទំនងអាចជាប់ទាក់ទងនឹងបុរសម្ចាស់ផ្ទះ ព្រោះបុរសរូបនេះមានជំងឺសម្ពាធបេះដូង ដែលមិនអាចព្យាបាលបាន។ ក្រោយពីអគ្គីភ័យត្រូវបានពន្លត់ទាំងស្រុង គេរកឃើញទ្វារត្រូវចងខ្សែពីខាងក្នុង ដែលជាហេតុធ្វើឲ្យពិបាកដល់មន្ត្រីជំនាញក្នុងការជួយសង្គ្រោះទាន់ពេលវេលា។
លោក នេត វន្ថា៖ «រឿងហ្នឹងវាស្មុគស្មាញដែរ ខ្ញុំមិនទាន់ហានថាវាមកពីមូលហេតុច្បាស់លាស់ទេ។ ប៉ុន្តែគ្រាន់ថាខ្ញុំសូមបើកវង់ក្រចកដាក់ថា កំពុងស្រាវជ្រាវសិន។ ខ្ញុំសូមអះអាងពាក់ព័ន្ធទៅលើមូលហេតុដែលបង្កនេះ គឺយើងឃើញពិនិត្យជារួមទៅ ពាក់ព័ន្ធនឹងខ្សែភ្លើងក៏ដូចជាមិនមាន ហើយពាក់ព័ន្ធទៅលើការផ្ទុះកំប៉ុងហ្គាស៍ ដូចជាមិនមាន។ ប៉ុន្តែពិនិត្យជារួមទៅ គឺបុគ្គលហ្នឹងដែលជាបុគ្គលិកមន្ទីរពេទ្យជប៉ុន ហ្នឹង គឺគាត់មានជំងឺប្រចាំកាយមួយ គឺជំងឺអាដែងសម្ពាធបេះដូង មិនអាចព្យាបាលបាន។ ហើយថ្ងៃកើតហេតុទៀតសោត គាត់ទទួលគ្រឿងសុរាស្រវឹង។ ពេលដែលកំពុងតែហូបស្រាហ្នឹង គាត់ដេញប្រពន្ធគាត់ទៅទិញមី ទិញស៊ុប មកឲ្យគាត់ដើម្បីហូបបន្ត។ អ៊ីចឹងពេលប្រពន្ធចេញទៅផុត គឺយើងឃើញមានចំណងចងពីខាងក្នុង ក្នុងផ្ទះមានខ្សែលួស។ ចងទ្វារមិនឲ្យចូលបាន ហើយអ៊ីចឹងក៏មានអគ្គីភ័យកើតឡើងតែម្ដងទៅ»។
គិតមកដល់ពេលនេះ សម្ភារៈត្រូវបាត់បង់ រួមមាន ម៉ូតូម៉ាកសង់ការ៉េមួយគ្រឿង គ្រែមួយ និងតូបលក់គ្រឿងទេសមួយកន្លែង និងផ្ទះទំហំ ៣x៦ម៉ែត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។