មន្ត្រីទទួលបន្ទុកពន្លត់អគ្គិភ័យ និងមន្ត្រីធ្វើការពាក់ព័ន្ធនឹងចរាចរណ៍លើកឡើងថា គ្រោះថ្នាក់ចរាចរណ៍ និងគ្រោះអគ្គិភ័យឆេះផ្ទះនេះ ដោយសារតែប្រជាពលរដ្ឋខ្វះការប្រុងប្រយ័ត្ន។ មន្ត្រីទទួលបន្ទុកពន្លត់ អគ្គិភ័យ និងមន្ត្រីធ្វើការពាក់ព័ន្ធនឹងចរាចរណ៍លើកឡើងថា គ្រោះថ្នាក់ចរាចរណ៍ និងគ្រោះអគ្គិភ័យឆេះផ្ទះនេះដោយសារតែប្រជាពលរដ្ឋខ្វះការប្រុងប្រយ័ត្ន។
មន្ត្រីទទួលបន្ទុកពន្លត់អគ្គិភ័យនៃអគ្គស្នងការដ្ឋាននគរបាលជាតិឲ្យដឹងនៅថ្ងៃទី១៥ មេសា ថា ក្នុងពិធីចូលឆ្នាំខ្មែរប្រពៃណីជាតិរយៈពេល ៣ថ្ងៃ មានភ្លើងឆេះផ្ទះអស់ជាង ៦០ខ្នងនៅខែត្រក្រុងចំនួន៤។
ប្រធាននាយកដ្ឋាននគរបាលបង្ការពន្លត់អគ្គិភ័យសង្គ្រោះនៃអគ្គស្នងការនគរបាលជាតិ លោកឧត្ដមសេនីយ៍ត្រី នេត វន្ថា មានប្រសាសន៍ថា គិតពីថ្ងៃទី១៣ ដល់ថ្ងៃទី១៥ មេសា មានភ្លើងឆេះផ្ទះ ៤ករណីក្នុងនោះមាននៅខែត្រក្រចេះ ឆេះ ៦ខ្នង ខែត្រមណ្ឌលគិរី ១ខ្នង និងនៅរាជធានីភ្នំពេញ ឆេះផ្ទះ នៅសង្កាត់ចាក់អង្រែលើកាលពីរាត្រីថ្ងៃទី១៤ មេសា អស់ផ្ទះ ៥៥ខ្នង។ លោកបញ្ជាក់ថា ករណីឆេះផ្ទះ នៅចាក់អង្រែលើនេះ សមត្ថកិច្ចពុំទាន់រកពីមូលហេតុឃើញច្បាស់លាស់នៅឡើយ៖ «នៅខែត្រគាត់ដុតស្មៅក្បែរផ្ទះខ្វះការប្រុងប្រយ័ត្ន សម្ដេចក្រឡាហោម អគ្គស្នងការតែងតែណែនាំឲ្យប្រុងប្រយ័ត្ន តែប្រជាពលរដ្ឋដូចជាពឹងផ្អែកលើមន្ត្រីជំនាញទាំងស្រុង»។
រីឯគ្រោះថ្នាក់ចរាចរណ៍វិញ អនុប្រធាននាយកដ្ឋានកណ្ដាលសណ្ដាប់ធ្នាប់ នៃអគ្គស្នងការនគរបាលជាតិ ក្រសួងមហាផ្ទៃ លោកឧត្ដមសេនីយ៍ទោ ទី ឡុង បញ្ជាក់ថា ខាងលោកមិនទាន់បូកសរុបរបាយការណ៍ក្នុងរយៈពេល ៣ថ្ងៃនេះនៅឡើយទេ ម្យ៉ាងលោកកំពុងរវល់រៀបចំសណ្ដាប់ធ្នាប់ខែត្រសៀមរាប ក្នុងកម្មវិធីអង្គសង្ក្រាន្ត។ ទោះជាយ៉ាងនេះក្ដី លោកឲ្យដឹងថា កាលពីថ្ងៃទី១៤ មេសា គ្រោះថ្នាក់ចរាចរណ៍នៅទូទាំងប្រទេសធ្វើឲ្យមនុស្សស្លាប់ ៨នាក់៖ «យើងរាយការណ៍ពីគ្រោះថ្នាក់ ១ថ្ងៃៗជូន តែពេលបូកសរុបប្រចាំថ្ងៃបញ្ចប់ប្រហែលថ្ងៃទី១៧ (មេសា) អីឯណោះ»។
នាយកវិទ្យាស្ថានសុវត្ថិភាពចរាចរណ៍ លោក អ៊ា ចរិយា មានប្រសាសន៍ថា ខាងលោកក៏មិនទាន់បូកសរុបរបាយការណ៍គ្រោះថ្នាក់ចរាចរណ៍នេះនៅឡើយ រង់ចាំរហូតដល់ពិធីចូលឆ្នាំបញ្ចប់។ លោកសម្ដែងការព្រួយបារម្ភថា ករណីគ្រោះថ្នាក់ចរាចរណ៍នឹងអាចកើតមានឡើងច្រើនដដែល នាឱកាសពិធីបុណ្យចូលឆ្នាំខ្មែរនេះ ដោយសារសមត្ថកិច្ចហាក់ដូចជាមិនរឹតបន្តឹងនៅតាមផ្លូវនានាដូចខ្លួនធ្លាប់បានប្រកាសនៅមុនពិធីចូលឆ្នាំបានមកដល់នោះទេ។ លោកបញ្ជាក់ថា ករណីនេះអាចថាសមត្ថកិច្ច ឬ នគរបាលចរាចរប្រមូលគ្នាទៅរៀបចំនៅក្នុងកម្មវិធីអង្គរសង្ក្រាន្តនាខែត្រសៀមរាប។
ចំពោះបញ្ហាអគ្គិភ័យវិញ លោក នេត វន្ថា អំពាវនាវឲ្យប្រជាពលរដ្ឋទាំងអស់មានការប្រុងប្រយ័ត្ន ដើម្បីជៀសផុតពីបញ្ហាអគ្គិភ័យនេះ។ លោកបញ្ជាក់ថា នៅពេលខាងមុខប្រសិនបើប្រជាពលរដ្ឋ និងសមត្ថកិច្ចពន្លត់អគ្គិភ័យនឹងត្រូវប្រឈមមុខការដាក់ទោសទណ្ឌ បើសិននៅតែធ្វេសប្រហែសទៀត។
លោកពន្យល់ថា ភ្លើងឆេះផ្ទះនៅចាក់អង្រែលើដែលបង្កឲ្យឆេះផ្ទះជាង ៥០ខ្នងនោះ ដោយសារតែនៅតំបន់នោះ ជាតំបន់សំណង់មិនរៀបរយ ហើយគ្មានផ្លូវសម្រាប់ឲ្យរថយន្តអគ្គិភ័យចូលទៅពន្លត់បាន។ លោកបន្ថែមថា រដ្ឋាភិបាលនឹងចេញអនុក្រឹត្យស្ដីពីការសាងសង់លំនៅឋានឲ្យមាននិយាម ឬស្តង់ដារនៅពេលខាងមុខ៖«ការងារ សាងសង់សំណង់ មុនសាងសង់ត្រូវមានអ្នកជំនាញត្រួតពិនិត្យ និងមានការអនុញ្ញាតត្រឹមត្រូវ ហើយការសាងសង់ ហើយបើមិនមានបំពាក់បំពង់ ឬឧបករណ៍ពន្លត់អគ្គិភ័យទេ យើងនឹងមិនអនុញ្ញាត។ ទី២ ការដឹកជញ្ជូន ឬកន្លែងស្តុកប្រេងឥន្ធនៈ លុះត្រាតែមានការអនុញ្ញាតត្រឹមត្រូវ»។
លោក នេត វន្ថា អះអាងរថយន្តពន្លត់អគ្គិភ័យនៅទូទាំងប្រទេសមានចំនួន ១១៨គ្រឿង ក្នុងនោះនៅរាជធានីភ្នំពេញ មាន ៤៨គ្រឿង ហើយរដ្ឋាភិបាលបានទិញរថយន្តពន្លត់អគ្គិភ័យនេះ បន្ថែមជាង ១០០គ្រឿង (១១៣គ្រឿង) ទៀត ដែលនឹងយកមកដល់កម្ពុជា ក្នុងពេលឆាប់ៗខាងមុខនេះ។
នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ បង្ហាញថា គ្រោះអគ្គីភ័យអំឡុងពេលចូលឆ្នាំចិន-វៀតណាម មានចំនួន ១៤លើកនៅទូទាំងប្រទេស បណ្ដាលឲ្យខូចខាតផ្ទះចំនួន ១២០ខ្នង។
រីឯរបាយការណ៍របស់អគ្គស្នងការដ្ឋាននគរបាលជាតិ បង្ហាញថា គ្រោះថ្នាក់ចរាចរណ៍ទូទាំងប្រទេសក្នុងឱកាសពិធីបុណ្យចូលឆ្នាំចិន-វៀតណាម រយៈពេល ៤ថ្ងៃ ចាប់ពីថ្ងៃទី៧ ដល់ទី១០ ខែកុម្ភៈ បានកើតឡើងចំនួន ៨០លើក សម្លាប់មនុស្ស ៤១នាក់ និងរបួសចំនួន ១៣៤នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។