ថ្ងៃដំបូងនៃការប្រឡងសញ្ញាប័ត្រមធ្យមសិក្សាទុតិយភូមិ ឬប្រឡងបាក់ឌុប បញ្ចប់ទៅហើយ នៅរសៀលថ្ងៃទី៤ សីហា ដោយបេក្ខជនខ្លះពេញចិត្តចំពោះការប្រឡងនោះ ហើយខ្លះទៀតហាក់មិនសប្បាយចិត្តចំពោះការឹតបន្តឹងហួសហេតុពេករបស់ក្រសួងចំពោះការប្រឡងនៅឆ្នាំនេះទេ។
យ៉ាងណាមន្ត្រីក្រសួងអប់រំគិតថា នេះជាការកែទម្រង់ដ៏ល្អមួយសម្រាប់វិស័យអប់រំឲ្យប្រសើរឡើងវិញ ប៉ុន្តែការប្រឡងនៅថ្ងៃដំបូងនេះ មានភាពមិនប្រក្រតីខ្លះដែរ ដោយមានបេក្ខជនបន្លំ ២នាក់ ទៅប្រឡងជំនួសបងប្អូន ហើយត្រូវសមត្ថកិច្ចឃាត់ខ្លួនចាត់វិធានការតាមច្បាប់។
មន្ត្រីក្រសួងអប់រំ និងសមាគមគ្រូបង្រៀនកម្ពុជាឯករាជ្យ វាយតម្លៃស្រដៀងគ្នាថា ទិដ្ឋភាពទូទៅថ្ងៃដំបូងនៃការប្រឡងសញ្ញាប័ត្របាក់ឌុបឆ្នាំនេះ មានភាពល្អប្រសើរជាងរាល់ឆ្នាំ។
ស្ថាប័នទាំងពីរដែលធ្លាប់តែខ្វែងគំនិតគ្នាក្នុងវាយតម្លៃការប្រឡងរាល់លើកនោះ នៅឆ្នាំនេះហាក់មើលឃើញស្របគ្នាខ្លះ ដោយឃើញថា បេក្ខជនប្រឡងស្ទើរតែ ១០០ភាគរយនៅទូទាំងប្រទេស មិនបានលួចចម្លងគ្នាក្នុងបន្ទប់ប្រឡង គ្មានការលួចមើលប្រ៊ីយ៉ុង និងមិនមានការរៃអង្គាសប្រាក់សូកប៉ាន់មេប្រយោគ ឬគ្រូអនុរក្ស។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ឲ្យដឹងថា ការលួចយកប្រ៊ីយ៉ុង និងទូរស័ព្ទចូលក្នុងមណ្ឌលប្រឡងនៅតែមាន ប៉ុន្តែត្រូវបានគ្រូអនុរក្សឆែកដកហូតនៅតាមខ្លោងទ្វារចូលមណ្ឌលប្រឡង។ យ៉ាងណាការលួចចម្លងគ្នាពីមួយទៅមួយ និងការលួចចម្លងប្រ៊ីយ៉ុង មិនមានដូចរាល់ឆ្នាំទេ ពិសេសការសូកប៉ាន់មេប្រយោគក្នុងបន្ទប់ប្រឡងគឺគ្មានតែម្ដង។
ប៉ុន្តែអ្វីជាការកត់សម្គាល់របស់លោកនោះ គឺការបែកធ្លាយវិញ្ញាសានៅតែមាន ដូចជាការបែកធ្លាយវិញ្ញាសាគីមី និងវិញ្ញាសាប្រវត្តិវិទ្យានៅខេត្តព្រៃវែង និងតាមបណ្ដាញសង្គមហ្វេសប៊ុក និងមានបេក្ខជនប្រឡងជំនួស ២នាក់ ដែលករណីនេះកើតឡើងនៅខេត្តព្រៃវែង និងខេត្តកណ្ដាល៖ «សំឡេង»។
ជុំវិញបញ្ហានេះ អ្នកនាំពាក្យក្រសួងអប់រំ លោក រស់ សាលីន ទទួលស្គាល់ថា ពិតជាមានករណីបេក្ខជនប្រឡងជំនួសដូចខាងសមាគមគ្រូបង្រៀនកម្ពុជាឯករាជ្យ លើកឡើងមែន។ ប៉ុន្តែករណីនេះ ត្រូវបានក្រសួងអប់រំចាត់វិធានការភ្លាមៗ ដោយឃាត់ខ្លួនបេក្ខជនបន្លំទាំង ២នាក់នោះ ប្រគល់ឲ្យសមត្ថកិច្ចចាត់វិធានការតាមច្បាប់។ រីឯសាមីខ្លួន ឬបេក្ខជនត្រូវប្រឡង ២នាក់ ត្រូវធ្លាក់ដោយស្វ័យប្រវត្តិ។
ចំពោះការធ្លាយវិញ្ញាសាគីមីនិងប្រវត្តិវិទ្យាវិញ លោកក៏ទទួលស្គាល់ថា ពិតជាមានការបង្ហោះវិញ្ញាសាតាមបណ្ដាញសង្គមហ្វេសប៊ុក មែន។ ប៉ុន្តែក្រុមការងារនៅក្រសួងដែលធ្វើការផ្នែកព័ត៌មានវិទ្យា បានធ្វើកោសល្យវិច័យ អង្កេតវិញ្ញាសាដែលធ្លាយនោះហើយ គឺខុសទាំងស្រុងនឹងវិញ្ញាសាដែលក្រសួងចេញប្រឡង៖ «សំឡេង»។
លោក រស់ សាលីន បញ្ជាក់ថា មន្ត្រីជំនាញក្រសួងកំពុងពិនិត្យនិងស្វែងរកតាមលីញបន្តនៃការចែកចាយវិញ្ញាសានោះតាមបណ្ដាញសង្គមហ្វេសប៊ុក ដើម្បីរកអត្តសញ្ញាណជនដែលប្រព្រឹត្ត ដែលមានចរិតភូតកុហកអ្នកដទៃ និងបង្កឲ្យមានការជ្រួលច្របល់បោកប្រាស់ និងប៉ះពាល់ដល់ស្មារតីបេក្ខជនប្រឡង។
ថ្ងៃដំបូងនៃការប្រឡងឆ្នាំនេះ នៅតាមមណ្ឌលប្រឡងជាច្រើននៅតាមរាជធានីភ្នំពេញ ឃើញមានកម្លាំងសមត្ថកិច្ចប៉េអឹមប្រមាណ ២០ ទៅ ៣០នាក់ នៅប្រចាំការតាមមណ្ឌលប្រឡងដើម្បីការពារសុវត្ថិភាពបេក្ខជនប្រឡង និងសណ្ដាប់ធ្នាប់ចរាចរណ៍ ពិសេសការពារខ្លាចក្រែងមានការគប់ប្រ៊ីយ៉ុង ពីខាងក្រៅ។
ក្រោយបញ្ចប់ការប្រឡង បេក្ខជនប្រឡងភាគច្រើនដើរចេញពីមណ្ឌលប្រឡងដោយហេវហត់។ ពួកគេភាគច្រើនត្រូវទទួលប័ណ្ណផ្សព្វផ្សាយព័ត៌មានពីការជ្រើសរើសមហាវិទ្យាល័យជាច្រើនស្អេកស្កះ ដែលចែកនៅខ្លោងទ្វារចេញ។ ពួកគេហាក់ស្ទះស្ទើរមិនដឹងត្រូវទៅរៀននៅសកលវិទ្យាល័យណាបន្ត បើជោគវាសនាប្រឡងពួកគេលើកនេះមិនទាន់ច្បាស់យ៉ាងណានៅឡើយ។
យុវតីម្នាក់ជាបេក្ខជនប្រឡងនៅវិទ្យាល័យ ជា ស៊ីម សាមគ្គី កញ្ញា សុខ មាលតី គិតថា វិន័យប្រឡងលើកនេះតឹងរ៉ឹងខ្លាំងមិនអាចងាកឆ្វេងស្ដាំបាន។ ម្យ៉ាងប្រ៊ីយ៉ុងដែលនាងខំលាក់យ៉ាងសម្ងាត់មិនឲ្យគ្រូឆែកនៅខ្លោងទ្វារចូល បានទៅដល់បន្ទប់ប្រឡងហើយនោះ មិនអាចបើកមើលបានថែមទៀត៖ «សំឡេង»។
បេក្ខជនប្រឡងមួយរូបទៀត គឺយុវជន លឹម សុខវិទ្យា ឲ្យដឹងថា គ្រូចាំផ្ដើមដកហូតប្រ៊ីយ៉ុង និងទូរស័ព្ទតាំងពីខ្លោងទ្វារចូលមណ្ឌលប្រឡង ហើយក្នុងបន្ទប់ប្រឡងគ្មានសិស្សណាម្នាក់ហ៊ានចេញមុខជាមេខ្លោងដើរប្រមូលលុយឲ្យគ្រូងបន្ទប់ថ្នាក់ដូចសម័យប្រឡងមុនៗទេ។
មិនខុសគ្នាដែរ យុវតីមួយរូបទៀត គឺកញ្ញា លី យូងីញ គិតថា វិញ្ញាសាថ្ងៃដំបូងនេះមិនពិបាកពេកទេ នាងអាចធ្វើបាន។ ប៉ុន្តែនាងចាប់អារម្មណ៍ថា ទាំងអនុរក្ស ទាំងអ្នកស្ម័គ្រចិត្តសង្កេតការណ៍ប្រឡង និងគ្រូឃ្លាំមើលអាគារហាក់ស្រុះគ្នា រឹតបន្តឹងមិនឲ្យមានការចាក់អ៊ុតក្នុងបន្ទប់ប្រឡង។ សម្រាប់នាង នាងគិតថា អាចជាប់នៃការប្រឡងលើកនេះ តែសម្រាប់បេក្ខជនភាគច្រើនដែលមិនសូវចេះ អាចមានសង្ឃឹមតិច៖ «សំឡេង»។
ក្រសួងអប់រំយុវជននិងកីឡា ធ្វើការកែទម្រង់ប្រព័ន្ធអប់រំ លើការប្រឡងគ្រប់ប្រភេទ ដោយកំណត់ទិសស្លោកថា «អ្នកចេះគឺជាប់»។
សមាគមគ្រូបង្រៀនកម្ពុជាឯករាជ្យ លោក រ៉ុង ឈុន គិតថា ដើម្បីបានគុណភាពអប់រំឲ្យប្រសើរឡើងវិញនោះ មិនមែនកែប្រែឥរិយាបថនៃការប្រឡងនោះទេ គឺត្រូវកែប្រែប្រព័ន្ធអប់រំតាំងពីថ្នាក់ទី១ រហូតដល់ថ្នាក់ទី១២ និងបន្តរហូតដល់ឧត្ដមសិក្សា ទើបអាចទទួលបានគុណភាពនៃការសិក្សាពិតប្រាកដ។ យ៉ាងណារបត់ថ្មីនៃការប្រឡងបាក់ឌុប លើកនេះក៏អាចបញ្ជាក់ខ្លះដែរនៃការកែទម្រង់ប្រព័ន្ធអប់រំឲ្យប្រសើរ តែមិនទាន់គ្រប់គ្រាន់នៅឡើយ។
ថ្ងៃទី២ នៃការប្រឡងបាក់ឌុប មានមុខវិញ្ញាសា ៣សំខាន់ ដែលបេក្ខជនត្រូវត្រៀមធ្វើឲ្យបានត្រូវច្រើនដើម្បីធានាថា ពួកគេអាចទទួលសញ្ញាប័ត្រលើកនេះ រួមមានអក្សរសាស្ត្រខ្មែរគណិតវិទ្យា និងរូបវិទ្យា។
ថ្ងៃដំបូងនៃការប្រឡងបាក់ឌុបនេះដែរ សមត្ថកិច្ចបានឃាត់ខ្លួនមនុស្ស ២នាក់ នៅខេត្តតាកែវ នៅថ្ងៃទី៤ សីហា ដែលជាម្ចាស់បណ្ណាគាររបឹងតាកែវ ស្ថិតនៅទល់មុខសាកលវិទ្យាល័យបៀលប្រាយ តាកែវ។
គេហទំព័ររបស់អង្គភាពប្រឆាំងអំពើពុករលួយ ឲ្យដឹងថា មូលហេតុឃាត់ខ្លួននោះ ដោយសារតែពួកគេរឹងរូសមិនព្រមស្ដាប់បង្គាប់អាជ្ញាធរមូលដ្ឋាន និងនៅតែបន្តថតចម្លងវិញ្ញាសាប្រឡងបាក់ឌុបក្លែងក្លាយ និងបានលក់វិញ្ញាសាក្លែងក្លាយនេះ ៥មុខវិជ្ជា តម្លៃ ១០០ដុល្លារ។ សមត្ថកិច្ចបញ្ជូនពួកគេទៅស្នងការដ្ឋាននគរបាលខេត្តតាកែវ ដើម្បីចាត់វិធានការតាមនីតិវិធីច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។