មន្ត្រីជលផលនៅកំពង់ឆ្នាំងរងការរិះគន់ថាបង្ក្រាបបទល្មើសនេសាទមិនត្រឹមត្រូវ
2014.07.31
ប្រជាពលរដ្ឋ និងមន្ត្រីក្រុមប្រឹក្សាខេត្តនៃគណបក្សសង្គ្រោះជាតិ ប្រចាំខេត្តកំពង់ឆ្នាំង ថ្លែងរិះគន់ធ្ងន់ៗចំពោះនាយខណ្ឌរដ្ឋបាលជលផលខេត្តនេះថា អនុវត្តការងារបង្ក្រាបបទល្មើសនេសាទមិនបានត្រឹមត្រូវ។
ពួកគេអះអាងនៅថ្ងៃទី៣១ ខែកក្កដា ថា ខណៈដែលបទល្មើសកើតមានច្រើននៅក្នុងបឹងទន្លេសាប បង្ក្រាបពុំមានប្រសិទ្ធភាពនោះ បែរជាក្រុមមន្ត្រីជំនាញជលផលទៅកាប់ទម្លាយបែរចិញ្ចឹមត្រីប្រាស្របច្បាប់របស់ប្រជាពលរដ្ឋទៅវិញ។
ការថ្លែងរិះគន់នេះ គឺនៅបន្ទាប់ក្រុមមន្ត្រីជំនាញជលផលមានគ្នាប្រមាណជា ១០នាក់ ដឹកនាំដោយនាយខណ្ឌរដ្ឋបាលជលផល លោក សេង ប៊ុនឈឿន ហៅ តាហោ ចុះបង្ក្រាបបទល្មើសនេសាទនៅភូមិសាស្ត្រស្រុកជលគីរី និងបានកាប់បែរលែងត្រីប្រាជាច្រើនក្បាលរបស់អ្នកភូមិក្បាលកន្លង់ ឃុំពាមឆ្កោក កាលពីព្រឹកថ្ងៃទី២៩ ខែកក្កដា។
ប្រជាពលរដ្ឋ និងជាម្ចាស់បែរត្រី អ្នកស្រី ជួង សម មានប្រសាសន៍ថា កូនត្រីប្រាចំនួន ១ម៉ឺន ៥ពាន់ក្បាល ដែលគ្រួសារអ្នកស្រីខំចិញ្ចឹម ប៉ុន្តែត្រូវខាងជលផលលែងវិញនោះ គឺជាត្រីដែលបានមកពីការនេសាទខ្លួនឯងខ្លះ និងចងការប្រាក់គេជាង ១លានរៀល ដើម្បីទៅទិញកូនត្រីគេ ទើបបានមកចិញ្ចឹមនេះ។ អ្នកស្រីថា សកម្មភាពបង្ក្រាបនេះ គឺមានភាពអយុត្តិធម៌ខ្លាំងណាស់សម្រាប់គ្រួសារអ្នកស្រី និងស្នើឲ្យមន្ត្រីទាំងនោះ សងកូនត្រីប្រាគាត់វិញ៖ «ពេលគេកំពុងតែចាក់ហ្នឹង ខ្ញុំអង្វរគេ ពូឯងកុំចាក់របស់ខ្ញុំអី ខ្ញុំចិញ្ចឹមត្រីប្រាទេ ខ្ញុំមិនចិញ្ចឹមត្រីឆ្ដោរទេ អត់ខុសច្បាប់ទេ។ លេងគេស្រែកមកវិញ គេថារបស់ខ្ញុំហ្នឹងខុសច្បាប់ ត្រីប្រាក៏ដោយ គាត់ថាអ៊ីចឹងណាពូ»។
បន្ថែមលើនេះ សមាជិកក្រុមប្រឹក្សាខេត្តកំពង់ឆ្នាំង មកពីគណបក្សប្រឆាំង លោក ដួង ចន្ដ្រា ថ្លែងរិះគន់ថា ការនេសាទដោយប្រើរបាំងស្បៃមុងរាប់រយម៉ែត្រ កំពុងកើតមានយ៉ាងអនាធិបតេយ្យនៅតាមឃុំមួយចំនួន នៃស្រុកជលគីរី និងស្រុកកំពង់លែង មិនដែលឃើញបង្ក្រាបមានប្រសិទ្ធភាពឡើយ ប៉ុន្តែបែរជាមកបំពារបំពានលើប្រជាពលរដ្ឋដែលចិញ្ចឹមត្រីស្របច្បាប់ទៅវិញ៖ «ខ្ញុំបានទទួលព័ត៌មានជារៀងរាល់ថ្ងៃ ដែលគាត់តែងតែតេ (ទូរស័ព្ទ) ក្រើនរំឭក ឲ្យយើងធ្វើយ៉ាងម៉េចជួយអន្តរាគមន៍ ដើម្បីទប់ស្កាត់ល្មើសនេសាទនេះដែរ ហើយខ្ញុំក៏តែងតែព្យាយាមជូនដំណឹងនេះទៅអភិបាលខេត្តជារៀងរាល់ពេលនៃការប្រជុំផង ប៉ុន្តែមកដល់ពេលនេះឃើញថា នៅតាមមូលដ្ឋានហាក់ដូចជាធ្វើជាព្រងើយកន្តើយ មិនអើពើទៅនឹងការល្មើសនេសាទហ្នឹងឯង»។
ឆ្លើយតបបញ្ហានេះ នាយខណ្ឌរដ្ឋបាលជលផល លោក សេង ប៊ុនឈឿន ពន្យល់យ៉ាងខ្លីថា កូនត្រីប្រាដែលខាងលោកបានលែងនោះ គឺជាកូនត្រីដែលបានមកពីការនេសាទខុសច្បាប់ ដោយប្រើឧបករណ៍ស្បៃមុង។ ចំពោះការរិះគន់ថា មន្ត្រីជំនាញបង្ក្រាបបទល្មើសមិនត្រឹមត្រូវ ឬពុំមានប្រសិទ្ធភាពនោះ ត្រូវលោកឆ្លើយតបថា បទល្មើសនេសាទនៅទូទាំងខេត្តពុំមានការកើនឡើងនោះទេ ជាពិសេសក្នុងរដូវបិទនេសាទនេះ ប៉ុន្តែលោកទទូចសុំឲ្យការរិះគន់ និងការផ្ដល់ព័ត៌មាននានា ទាក់ទងនឹងបទល្មើស ត្រូវតែមានភាពច្បាស់លាស់ ដើម្បីឲ្យខាងលោកងាយស្រួលចុះបង្ក្រាប៖ «ខ្ញុំសូមបញ្ជាក់ អាត្រីប្រាក្នុងបែរ យើងអត់ទៅធ្វើអីបានទេបាទ បើសិនជាគេបានពីឧបករណ៍ស្របច្បាប់។ ខ្ញុំទៅចាក់នេះត្រី គឺលាក់នៅក្នុងព្រៃ ត្រីហ្នឹងបានមកពីឧបករណ៍នេសាទស្បៃមុង ហើយគាត់យកទៅដាក់ហាប៉ាៗ មិនមែនបែរទេ ហាប៉ា ជាឧបករណ៍មួយដែលគេសម្រាប់ប្រស់ត្រីនោះណា!»។
មន្ត្រីសម្របសម្រួលសហគមន៍ នៃអង្គការការពារ និងអភិរក្សធនធានជលផល ហៅកាត់ថា ហ្វេក (Fact) អ្នកស្រី នៅ សារឹម ថ្លែងគាំទ្រសកម្មភាពរបស់មន្ត្រីជំនាញជលផលនេះ ប៉ុន្តែអ្នកស្រីបញ្ជាក់ថា ក្នុងករណីដែលប្រជាពលរដ្ឋទិញកូនត្រីពីកន្លែងផ្សេងមកចិញ្ចឹម គឺមិនខុសច្បាប់នោះទេ លើកលែងតែក្នុងសកម្មភាពដងកូនត្រីប្រាដោយឧបករណ៍ផ្សេងៗ ដែលច្បាប់បានហាមឃាត់៕