ត្រីជាច្រើនតោនបានងាប់នៅតំបន់អភិរក្សបឹងទន្លេឆ្មា ជាប់បឹងទន្លេសាបក្នុងខេត្តកំពង់ធំ ដើមសប្ដាហ៍នេះ។ ក្រុមមន្ត្រីពាក់ព័ន្ធអះអាងថា ហេតុផលតែមួយគត់ដែលធ្វើឲ្យត្រីទាំងនោះងាប់ គឺបណ្ដាលមកពីខ្យល់ព្យុះកន្ត្រាក់។ ប៉ុន្តែពលរដ្ឋខេត្តកំពង់ធំ ស្នើដល់មន្ត្រីជំនាញពាក់ព័ន្ធ ឲ្យពិនិត្យត្រីងាប់ទាំងនេះឲ្យបានត្រឹមត្រូវ មុននឹងចេញសេចក្តីសន្និដ្ឋាន ដ្បិតគេសង្ស័យថា អាចមានការបំពុលត្រី។
អភិបាលខេត្តកំពង់ធំ លោក អ៊ុត សំអន បានបដិសេធថា ត្រីងាប់ជិត ១០០តោន នៅក្នុងបឹងអភិរក្សទន្លេឆ្មា ខេត្តកំពង់ធំ កាលថ្ងៃទី១០ ខែមិថុនា មិនមែនដោយសារជាតិពុលទេ គឺដោយសារខ្យល់ព្យុះកន្ត្រាក់ ព្រោះនៅតំបន់ត្រីងាប់នោះមានទឹករាក់ ហើយពេលជួបខ្យល់ព្យុះ ទឹកក៏បានប្រែទៅជាល្បាប់ភក់ ធ្វើឲ្យទឹកគ្មានអុកស៊ីហ្សែន។ បន្ថែមលើនេះ ត្រីដែលនៅពូនផ្តុំកន្លែងខ្យល់ព្យុះនោះ បានរុំព័ទ្ធដោយភក់ល្បាប់កខ្វក់ ហើយទំនងជាត្រីដកដង្ហើមមិនរួច ទើបងាប់ដ៏ច្រើនសន្ធឹកសន្ធាប់៖ «ខ្យល់ព្យុះកន្ត្រាក់ធ្វើឲ្យទឹកវារាក់ និងបូកលាយឡំជាមួយភក់កករទៅ វាទៅលើប្រហែលជាត្រីខ្វះទឹកក្នុងការដកដង្ហើម គួបផ្សំវាមានសារធាតុភក់ ឬមានសារធាតុអីក៏យើងមិនដឹង ធ្វើឲ្យងាប់តែម្តង»។
លោកបញ្ជាក់ថា ត្រីងាប់នៅតំបន់អភិរក្សបឹងទន្លេឆ្មា ពេលនេះមិនមែនជាលើកទី១ទេ គឺធ្លាប់កើតមានកាលពីឆ្នាំមុន ហើយឆ្នាំនេះបានកើតមានចំនួនពីរលើករួចមកហើយ ដោយសារខ្យល់ព្យុះកន្ត្រាក់ និងមានទឹករាក់។
ទាក់ទិនបញ្ហានេះ លោក ណៅ ធួក ប្រធានរដ្ឋបាលជលផល ឲ្យដឹងថា ត្រីងាប់ជិត ១០០តោន នៅតំបន់អភិរក្សបឹងទន្លេឆ្មា មានប្រភេទត្រីសណ្ដាយ ត្រីក្រពាត់ ត្រីឆ្លាំង ត្រីកែស និងត្រីស្រកាចម្រុះ ជាដើម។ លោកបញ្ជាក់ថា ត្រីងាប់នៅខេត្តកំពង់ធំ មិនមែនដោយសារជាតិពុលទេ ហើយត្រីដែលងាប់ទាំងនោះ ប្រជាពលរដ្ឋអាចស្រង់យកទៅប្រឡាក់ធ្វើប្រហុក ឬត្រីប្រឡាក់ ជាដើម។
យ៉ាងនេះក្តី ប្រជាពលរដ្ឋរស់នៅខេត្តកំពង់ធំ មួយចំនួន បានបានទទូចដល់មន្ត្រីជំនាញក្រសួងពាក់ព័ន្ធ ត្រូវអង្កេត និងរកមូលហេតុនាំឲ្យត្រីងាប់ជាបន្តបន្ទាប់ ក្នុងតំបន់អភិរក្សទន្លេឆ្មា ជាប់បឹងទន្លេសាប ឲ្យបានត្រឹមត្រូវ មុននឹងធ្វើសេចក្តីសន្និដ្ឋានចំពោះបញ្ហានេះ។
ពលរដ្ឋឈ្មោះ ចៀម ឡេង រស់នៅខេត្តកំពង់ធំ មានការព្រួយបារម្ភខ្លាចត្រីដែលងាប់នោះ ពុលថ្នាំ ឬមានសារធាតុគីមីផ្សេងៗ ព្រោះមានចំនួនច្រើនរហូតជិត ១០០តោន៖ «ជួនកាលពុលតាមរលកខ្យល់បក់ខ្លាំង ឬពុលរលក។ អាហ្នឹងជារឿងមួយ។ ប៉ុន្តែដល់ពុលងាប់ច្រើនពេករហូតដល់ជិត ៩០តោន វាខុសប្លែកពីធម្មតា។ បើថាក្នុងខ្យល់បក់កន្លះម៉ោងហ្នឹង បើពុលវាពុលតិចតួចទេ វាមិនពុលដល់ងាប់ហូរហែអ៊ីចឹងទេ។ នៅក្នុងទន្លេហ្នឹង បើថាត្រូវមុខខ្យល់វាទទឹងមុខខ្យល់យ៉ាងច្រើន ២គីឡូម៉ែត្រ ប៉ុន្តែនេះខ្ញុំសង្ស័យថា មានពុលជាតិគីមី ហើយមើលទៅ»។
ក្រសួងធនធានទឹក និងឧតុនិយម បានឲ្យដឹងថា ប្រទេសកម្ពុជា បានទទួលរងឥទ្ធិពលពីខ្យល់មូសុងនិរតីខ្លាំង បង្កឲ្យមានភ្លៀងផ្គរនៅតំបន់មួយចំនួន ចាប់ពីថ្ងៃទី៦ ដល់ថ្ងៃទី១៤ ខែមិថុនា។ សេចក្តីជូនដំណឹងមានចុះហត្ថលេខា លោក លឹម គានហោ រដ្ឋមន្ត្រីក្រសួងធនធានទឹក ចុះថ្ងៃទី៦ ខែមិថុនា បង្ហាញថា ឥទ្ធិពលខ្យល់មូសុងនិរតីនេះ បង្កឲ្យផ្ទៃមេឃនៅតំបន់លំហសមុទ្រកម្ពុជា មានពពកមីរដេរដាស មានភ្លៀងផ្គររន្ទះ និងខ្យល់កន្ត្រាក់បោកបក់ខ្លាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។