ប្រជាសហគមន៍នេសាទនៅស្រុកឯកភ្នំ ខេត្តបាត់ដំបង កំពុងព្រួយបារម្ភបញ្ហាអ្នកមានទ្រព្យធន ជីកអណ្ដូងទឹកកៀកបឹងនៅតំបន់អភិរក្ស ដើម្បីទាញយកផលប្រយោជន៍ត្រីនៅរដូវវស្សា។ ការព្រួយបារម្ភនេះ ដោយសារអ្នកស្រុកប្រទះឃើញគេយកគ្រឿងចក្រទៅជីកអណ្ដូងទឹកតំបន់អភិរក្សដោយសេរី ហើយពុំមានអាជ្ញាធរណាមានវិធានការទប់ស្កាត់នៅឡើយ។
សហគមន៍នេសាទត្រីនៅស្រុកឯកភ្នំ ស្នើឲ្យអាជ្ញាធរពាក់ព័ន្ធ មានវិធានការរារាំងកុំឲ្យមានការជីកអណ្ដូងទឹកនៅតំបន់អភិរក្សបន្តទៅទៀត។
ប្រធានសហគមន៍នេសាទភូមិអន្សងសក ឃុំព្រែកនរិន្ទ ស្រុកឯកភ្នំ លោក លេន សារ៉េត ឲ្យដឹងនៅថ្ងៃទី២០ មេសា ថា ពលរដ្ឋអ្នកមានទ្រព្យធនយកគ្រឿងចក្រអេស្កាវ៉ាទ័រមួយគ្រឿង ទៅជីកអណ្ដូងនៅចំណុចបឹងអាផ្ទូល នៃភូមិអន្សងសក ក្បែរតំបន់អភិរក្ស ដើម្បីទាញយកផលប្រយោជន៍មច្ឆជាតិនៅរដូវទឹកឡើង។ លោកអះអាងថា ការជីកអណ្ដូងនេះ បានប៉ះពាល់ជាខ្លាំងដល់តំបន់អភិរក្សរបស់សហគមន៍ ហើយធ្វើឲ្យហិនហោចត្រីនៅថ្ងៃខាងមុខ។ លោកបន្ថែមថា អាជ្ញាធរពាក់ព័ន្ធក្នុងមូលដ្ឋាន សុទ្ធតែបានដឹងឮបញ្ហានេះដូចគ្នា ប៉ុន្តែពុំបានទប់ស្កាត់ពលរដ្ឋទាំងនោះឲ្យបញ្ឈប់ការជីកអណ្ដូងទឹកនោះឡើយ៖ « បាទ ! កាលណាគេជីកអណ្ដូងទៅ គឺបានប៉ះពាល់ដល់ប្រជាពលរដ្ឋច្រើនណាស់ ពីព្រោះម្ចាស់អណ្ដូង គេនឹងបិទផ្លូវទឹកឲ្យត្រីចូលក្នុងអណ្ដូងរបស់គេ »។
ឆ្លើយតបនឹងបញ្ហានេះ នាយសង្កាត់រដ្ឋបាលជលផលព្រែកកញ្ច្រែង នៃស្រុកឯកភ្នំ លោក អ៊ុង យួង មានប្រសាសន៍ថា កន្លងទៅ លោកបានហាមឃាត់ពលរដ្ឋដែលជីកអណ្ដូងទឹកនោះ ឲ្យផ្អាកសកម្មភាពម្ដងរួចមកហើយកាលពីមុនពេលបុណ្យចូលឆ្នាំប្រពៃណីជាតិ។ លោកអះអាងថា ការបន្តសកម្មភាពជាថ្មី លោកពុំទាន់ទទួលដំណឹងនៅឡើយ។ ទោះបីជាយ៉ាងនេះក្ដី លោកថា អណ្ដូងទឹកដែលសហគមន៍អះអាងថាគេលួចជីកនោះ គឺជាការស្ដារអណ្ដូងចាស់ដែលមានស្រាប់ជាយូរឆ្នាំមកហើយ៖ « ចុះសហគមន៍ម៉េចបានជាគាត់មិនទប់ស្កាត់ទៅ បើឃើញគេជីកអណ្ដូងនៅដែនដីរបស់មើលការខុសហើយនោះ »។
មន្ត្រីសម្របសម្រួលនៃអង្គការសម្ព័ន្ធភាព ដើម្បីអភិរក្សធនធានជលផលតំបន់បឹងទន្លេសាប អ្នកស្រី នូ សារឹម មានប្រសាសន៍ថា ការជីកអណ្ដូងនៅក្បែរតំបន់អភិរក្ស បើទោះបីជាតូច ឬធំក្ដី គឺជារឿងខុសច្បាប់ ហើយអាជ្ញាធរពាក់ព័ន្ធ ត្រូវបញ្ឈប់សកម្មភាពនេះជាបន្ទាន់។ អ្នកស្រីកត់សម្គាល់ទៀតថា ការជីកអណ្ដូងក្បែរបឹងតំបន់អភិរក្ស គឺជាចេតនាមួយរបស់ម្ចាស់អណ្ដូង ដើម្បីទាញយកផលប្រយោជន៍ត្រីធ្វើជាកម្មសិទ្ធិផ្ទាល់ខ្លួន ហើយប៉ះពាល់ដល់ផលប្រយោជន៍រួមសាធារណៈ៖ « សហគមន៍នេសាទគាត់មិនអាចមានតួនាទីទៅចាប់ ឬរឹបអូសយកវត្ថុតាងបានដូចសមត្ថកិច្ច ឬអាជ្ញាធរពាក់ព័ន្ធនោះទេ គឺគាត់បានត្រឹមតែឃើញហេតុការណ៍ ហើយរាយការណ៍ឲ្យទៅសមត្ថកិច្ចប៉ុណ្ណោះ »។
អ្នកភូមិអះអាងថា តំបន់បឹងអភិរក្សមច្ឆជាតិជាច្រើនកន្លែងនៅស្រុកឯកភ្នំ ជាពិសេសនៅឃុំព្រែកនរិន្ទ និងឃុំព្រែកហ្លួង ត្រូវបានពលរដ្ឋមួយចំនួនដែលភាគច្រើនជាសាច់ញាតិរបស់មន្ត្រីមានអំណាចក្នុងមូលដ្ឋានផងនោះ បានជីកអណ្ដូងទឹកដើម្បីឲ្យត្រីចូលក្នុងរដូវវស្សា កើតមានជាហូរហែ។ បញ្ហានេះ ធ្វើឲ្យប្រជាពលរដ្ឋមួយចំនួនធំ មិនអាចចូលទៅរកត្រីជាលក្ខណៈគ្រួសារបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។