ប្រជានេសាទសហគមន៍ត្រើយកោះ ក្នុងខេត្តកំពត នៅថ្ងៃទី២៨ វិច្ឆិកា ចោទអ្នកនេសាទខុសច្បាប់ដែលប្រើឧបករណ៍ឆក់ស្ថិតនៅខេត្តកែប ថាបានបុកទូកពួកគាត់ដែលកំពុងនេសាទ ប៉ុនប៉ងពន្លិចទឹកឲ្យស្លាប់នៅកណ្ដាលសមុទ្រ ដើម្បីសងសឹក។ ពួកគាត់អះអាងថា បានផ្តល់ដំណឹងទៅមន្ត្រីសមត្ថកិច្ចដែរ ប៉ុន្តែពុំឃើញមានអន្តរាគមន៍។
អ្នកនេសាទសហគមន៍ត្រើយកោះ បានសម្ដែងការព្រួយបារម្ភអំពីសុវត្ថិភាពផ្ទាល់ខ្លួន ខ្លាចមានការសងសឹកណាមួយពីសំណាក់ក្រុមអ្នកនេសាទខុសច្បាប់ ដែលពួកគាត់ធ្លាប់ចេញបង្ក្រាបកន្លងមក។
លោក ឌល់ ម៉ាត់ អាយុជាង ៣០ឆ្នាំ ជាអ្នកនេសាទម្នាក់ក្នុងចំណោមប្រជានេសាទត្រើយកោះដទៃទៀតអះអាងថា កាលពីយប់ថ្ងៃទី២៧ វិច្ឆិកា ទូកគាត់ត្រូវបានទូកអ្នកនេសាទប្រើឧបករណ៍ឆក់ ព្រួតគ្នាដេញបុក តែសំណាងល្អពួកគាត់បាននាំគ្នាបើកទូករត់គេចផុតពីគ្រោះថ្នាក់ គ្រាន់តែខូចខាតទូកបន្តិចបន្តួច៖ «ទូកវាគ្នាវាទូកមួយបីនាក់ៗ វាដេញបុកយើង យើងកំពុងអូសៗ វាដេញបុកណា ពួកហ្នឹងស្គាល់ទូកយើង បុកទូកពួកខ្ញុំបែកអស់ទូកអស់បាក់ថាត់ឆេ បាក់ដងង៉ាងហ្នឹងផង។ វាបុកហើយវានាំគ្នារត់អស់ ឆក់នៅខាងលិចលោកកាម៉យ វាបុកហើយវានាំគ្នារត់ ហើយវានាំអាអូសគូវាហៅអាអូសគូមកដេញបុកពួកខ្ញុំ នាំគ្នារត់ចូលផ្ទះអស់ហើយយប់មិញ»។
អ្នកនេសាទសហគមន៍ត្រើយកោះ មិនបានឲ្យដឹងឈ្មោះអ្នកនេសាទដែលដេញបុកទូកពួកគាត់នោះទេ តែឲ្យដឹងថា ពួកគេរស់នៅភូមិតានេន ស្ថិតក្នុងស្រុកដំណាក់ចង្អើរ ខេត្តកែប។
លោក ឌល់ ម៉ាត់ បន្តថា ក្រោយកើតហេតុភ្លាមៗ ពួកគាត់បានទាក់ទងមន្ត្រីជលផលខេត្ត ដើម្បីសុំអន្តរាគមន៍ដែរ តែមិនមានមន្ត្រីណាចេញមុខជួយ។
វិទ្យុអាស៊ីសេរី មិនអាចទាក់ទងអ្នកនេសាទនៅភូមិតានេន និងនាយខណ្ឌជលផលខេត្តកំពត លោក ស សូរិន បានភ្លាមៗទេនៅរសៀលថ្ងៃទី២៨ វិច្ឆិកា ដើម្បីសុំការឆ្លើយតបចំពោះការចោទប្រកាន់នេះ។
ក៏ប៉ុន្តែ មន្ត្រីជលផលខេត្តកែប លោក ចក់ ស៊ីនាថ ឆ្លើយថា ការចោទប្រកាន់នេះមិនពិតទេ ហើយក៏មិនមានហេតុការណ៍ទូកបុកគ្នាដែរកាលពីយប់ថ្ងៃទី២៧ វិច្ឆិកា ព្រោះថា មន្ត្រីជលផលខេត្តកែប និងខេត្តកំពត ដែលចុះបង្ក្រាបបទល្មើសនៅសមុទ្រជាមួយគ្នានាយប់នោះ មិនបានទទួលសេចក្ដីរាយការណ៍រឿងគ្រោះថ្នាក់នេះទេ។
ទោះយ៉ាងណា សហគមន៍នេសាទនៅខេត្តកែប និងខេត្តកំពត នៅតែអះអាងថា ការនេសាទខុសច្បាប់នៅសមុទ្រនៃខេត្តទាំងពីរនេះ កំពុងកើតកាន់តែច្រើនឡើងៗ ចំណែកការបង្ក្រាបរបស់អាជ្ញាធរវិញ ហាក់មិនមានប្រសិទ្ធភាពសោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។