អតីតអ្នកបើកបររថយន្តឲ្យក្រុមហ៊ុនរថយន្តក្រុងកាពីតូល (CAPITOL) ប្រមាណ ៣០នាក់ នៅព្រឹកថ្ងៃទី២៣ ខែមេសា បន្តការតវ៉ារបស់ខ្លួនជាថ្មីទៀតនៅក្បែរក្រុមហ៊ុនជិតផ្សារអូរឫស្សី រាជធានីភ្នំពេញ។ ក្នុងពេលទាមទារនោះ ក្រុមសមត្ថកិច្ចបានរារាំងមិនឲ្យពួកគេមកមុខក្រុមហ៊ុន និងហាមមិនឲ្យលើកបដា។
អតីតអ្នកបើកបររថយន្តទាំងនោះ បន្តឈរកាន់បដាយ៉ាងស្ងៀមស្ងាត់ និងអំពាវនាវដល់សាធារណជនឲ្យផ្អាកប្រើប្រាស់សេវា ឬជិះរថយន្តក្រុងរបស់ក្រុមហ៊ុនកាពីតូល។
អតីតអ្នកបើកឡានម្នាក់ លោក ថេប វុទ្ធី ឲ្យដឹងថា ការទាមទារថ្ងៃនេះ គ្មានអ្វីក្រៅពីស្នើឲ្យក្រុមហ៊ុនទទួលក្រុមលោកចូលធ្វើការងារវិញនោះទេ។ លោកថា ក្រៅពីការតវ៉ានៅពេលនេះ លោកក៏ពឹងអ្នកច្បាប់អន្តរាគមន៍ទៅស្ថាប័នផ្សេងទៀត៖ «ខ្ញុំនៅតែបន្តការទាមទាររហូតក្រុមហ៊ុនមានដំណោះស្រាយ។ ពួកខ្ញុំបាត់មុខមួយរយៈដោយសារពួកខ្ញុំមានរបួស គេវាយបែកក្បាល។ ប៉ុន្តែទោះបីជាគេវាយបែកក្បាល ឬគេចាប់ដាក់គុក គេរារាំងយ៉ាងម៉េចក៏ពួកខ្ញុំនៅតែពុះពារ»។
នៅពេលការទាមទារគ្មានលទ្ធផល អតីតអ្នកបើកបរបានបំបែកគ្នាវិញ នៅថ្ងៃដដែល ហើយថា ពួកគេនឹងបន្តទាមទារតទៅទៀត។
អតីតអ្នកបើកបររថយន្តក្រុងកាពីតូល ត្រូវបានថៅកែបញ្ឈប់ពីការងារ កាលពីចុងឆ្នាំ២០១៥ ដោយសារពួកគេបង្កើតសហជីព និងចោទពីបទរំលោភកិច្ចសន្យាការងារជាមួយក្រុមហ៊ុន រំលោភបទបញ្ជាផ្ទៃក្នុងដែលបានលួចកិបកេងទ្រព្យសម្បត្តិក្រុមហ៊ុន និងរំលោភច្បាប់ការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។