ប្រជាពលរដ្ឋខ្លះដែលរស់នៅភូមិមណ្ឌល៣ សង្កាត់ស្លក្រាម ក្រុងសៀមរាប បានប្រទះឃើញគ្រាប់បែក ១គ្រាប់ កាលពីម៉ោងជាង ៧ព្រឹកថ្ងៃអង្គារ ទី១៨ សីហា នៅចម្ងាយប្រមាណជាង ៥០ម៉ែត្រភាគខាងជើងពីកន្លែងលក់សំបុត្រឲ្យភ្ញៀវទេសចរបរទេសចូលទស្សនាអង្គរវត្ត។
សមត្ថកិច្ច និងអាជ្ញាធរជាច្រើនផ្នែក បានព្យាយាមមិនអធិប្បាយអំពីការប្រទះឃើញគ្រាប់បែកនោះយ៉ាងណាទេ ក៏ប៉ុន្តែអ្នកជំនាញខាងអាវុធជាតិផ្ទុះខ្លះ បានអះអាងក្រៅផ្លូវការថា គឺជាប្រភេទគ្រឿងផ្ទុះដែលផលិតនៅអតីតសហភាពសូវៀត។
មន្ត្រីជាន់ខ្ពស់របស់អាជ្ញាធរអប្សរា ទទួលបន្ទុកការពារ និងថែរក្សាប្រាសាទបុរាណ អះអាងថា ភ្ញៀវទេសចរបរទេសជាច្រើន នៅតែនាំគ្នាទិញសំបុត្រចូលទស្សនារមណីយដ្ឋាននានា មិនមានអ្វីគួរឲ្យភ្ញាក់ផ្អើល និងភ័យខ្លាចទេ។ ការថ្លែងបែបនេះ បន្ទាប់ពីគេបានប្រទះឃើញគ្រាប់បែក ១គ្រាប់ ដែលស្ថិតនៅមិនឆ្ងាយប៉ុន្មានពីកន្លែងលក់សំបុត្រឲ្យអ្នកទេសចរបរទេសចូលទស្សនាអង្គរមក។
អគ្គនាយកអាជ្ញាធរអប្សរា គឺលោក ប៊ុន ណារិទ្ធិ។ លោកមានប្រសាសន៍ក្នុងពេលដែលអញ្ជើញទៅចូលរួមពិធីសម្ពោធពិព័រណ៍ស្ត្រីខ្មែរ កាលពីព្រឹកថ្ងៃអង្គារ ទី១៨ សីហា ថា លោកសូមអំពាវនាវកុំឲ្យជនរួមជាតិ និងភ្ញៀវទេសចរបរទេស មានការភិតភ័យចំពោះហេតុការណ៍ដែលគេប្រទះឃើញគ្រាប់បែក ១គ្រាប់នោះឡើយ។ លោក ប៊ុន ណារិទ្ធិ បញ្ជាក់ថា គ្រាប់បែក ១គ្រាប់ ដែលគេប្រទះឃើញនៅក្បែរចិញ្ចើមផ្លូវ ចម្ងាយប្រមាណជាង ៥០ម៉ែត្រភាគខាងជើងពីកន្លែងលក់សំបុត្រឲ្យភ្ញៀវទេសចរបរទេសចូលទស្សនាអង្គរនោះ គឺមិនមានអ្វីគួរឲ្យភ័យខ្លាច និងអាចបង្កជាគ្រោះថ្នាក់ទេ ពីព្រោះអ្នកជំនាញផ្នែកដោះមីនស៊ីម៉ាក់ (CMAC) បានយកចេញដោយសុវត្ថិភាពហើយ ព្រមទាំងសមត្ថកិច្ចនៅតែបន្តស៊ើបអង្កេតថា តើហេតុអ្វីបានជាគ្រាប់បែកមានវត្តមាននៅទីនោះ?៖ «អាជ្ញាធរអប្សរាដឹងថាជាគ្រាប់បែកដៃ មិនដឹងថាមានអ្នកទម្លាក់ចោល ឬក៏អ្នកភ្លេចភ្លាំង ឬក៏មានចេតនាអ្វី យើងមិនដឹងទេ ប៉ុន្តែគ្រាប់បែកនោះមិនមានលក្ខណៈជាគ្រាប់បែកបង្កៃ ឬក៏មានដកគន្លឹះ និងខ្សែអ្វី ដែលត្រូវឲ្យផ្ទុះទេ»។
ប្រធានកងឯកភាពកម្ចាត់មីនទី៦ របស់មជ្ឈមណ្ឌលសកម្មភាពកម្ចាត់មីនកម្ពុជា ស៊ីម៉ាក់ ប្រចាំខេត្តសៀមរាប និងខេត្តឧត្តរមានជ័យ លោក រ័ត្ន ពុធណា បានបដិសេធមិនធ្វើការពន្យល់ថា គ្រាប់បែកប្រភេទនោះឈ្មោះអ្វី ហើយផលិតចេញពីប្រទេសណាទេ ដោយលោកជំរុញឲ្យសួររឿងនេះទៅ លោក ហេង រតនា ជាអគ្គនាយកនៃមជ្ឈមណ្ឌលសកម្មភាពកម្ចាត់មីនកម្ពុជា វិញ៖ «ឥឡូវនេះខាងខ្ញុំជំនាញកំពុងធ្វើការ ព្រោះខ្ញុំនៅប្រជុំខាងក្រៅ។ បើមិនអ៊ីចឹងអាចទាក់ទងទៅឯកឧត្តម ហេង រតនា ព្រោះជំនាញពួកខ្ញុំបានរាយការណ៍ជូនទៅគាត់អស់ហើយ»។
វិទ្យុអាស៊ីសេរី មិនអាចទាក់ទង លោក ហេង រតនា អគ្គនាយកនៃមជ្ឈមណ្ឌលសកម្មភាពកម្ចាត់មីនកម្ពុជា បានទេ ដោយសារតែលោកមិនទទួលទូរស័ព្ទសន្ទនា។
ទោះយ៉ាងណា អ្នកជំនាញខាងគ្រឿងផ្ទុះខ្លះ បានអះអាងក្រៅផ្លូវការថា គ្រាប់បែក ១គ្រាប់ដែលគេប្រទះឃើញកាលពីម៉ោងជាង ៧ព្រឹកថ្ងៃទី១៨ សីហា នោះ គឺជាប្រភេទគ្រាប់បែកធុន អូ.ហ្សិត.អឹម ៤ (OZM4) ដែលផលិតនៅអតីតសហភាពសូវៀត។
អធិការនគរបាលក្រុងសៀមរាប លោក ទិត្យ ណារ៉ុង មានប្រសាសន៍ថា តាមការសន្និដ្ឋាន គឺគ្រាប់បែកនោះទំនងជាមានអ្នកជ្រុះ ពីព្រោះវានៅថ្មី ហើយត្រូវបានគេខ្ចប់នឹងក្រដាសដែលមានខ្លាញ់គោ ដើម្បីការពារជាតិច្រែះ។ វាមិនត្រូវបានរៀបចំដាក់បង្កៃ ឬក៏មានចេតនាធ្វើឲ្យផ្ទុះអ្វីឡើយ។ មន្ត្រីនគរបាលខេត្តសៀមរាប ក៏សន្និដ្ឋានប្រហាក់ប្រហែលគ្នាថា គ្រាប់បែកដៃនោះទំនងជាទាហានណាម្នាក់ជ្រុះ ពីព្រោះផ្លូវមួយខ្សែដែលគេប្រទះឃើញគ្រាប់នោះ គឺជាផ្លូវដែលចូលទៅកាន់ទីបញ្ជាការរបស់កងវរៈសេនាតូចវិស្វកម្ម នៃកងយោធពលខេមរភូមិន្ទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។