ប្រជាពលរដ្ឋនៅខេត្តកំពង់ចាម ៤នាក់ ដែលបានស្លាប់ដោយគ្រោះថ្នាក់ចរាចរណ៍នៅប្រទេសថៃ ត្រូវបញ្ជូនមកស្រុកកំណើតវិញនៅថ្ងៃទី១៦ ខែមិថុនា។
គ្រួសារសពបានសម្ដែងភាពសោកសៅ និងភាពលំបាកជាខ្លាំងក្នុងការរៀបចំធ្វើពិធីបុណ្យនៅឯស្រុកកំណើត ពីព្រោះមិនមានថវិកាគ្រប់គ្រាន់ ហើយម្យ៉ាងរឹតតែលំបាកក្នុងគ្រួសារបន្ថែមទៀតសម្រាប់កូនប្រពន្ធដែលនៅរស់ ពីព្រោះបាត់បង់កម្លាំងដ៏សំខាន់នៅក្នុងគ្រួសារ។ អាជ្ញាធរខេត្តកំពុងតែខិតខំជួយដោះស្រាយបញ្ហាប្រឈមរបស់គ្រួសារសព និងពលករផ្សេងទៀតយ៉ាងយកចិត្តទុកដាក់។
ក្រុមគ្រួសារសព ៤នាក់នៅខេត្តកំពង់ចាម បានសម្ដែងអារម្មណ៍ដូចៗគ្នាជុំវិញការលំបាក នៅពេលទទួលដំណឹងថាសមាជិកក្រុមគ្រួសារខ្លួនស្លាប់ដោយគ្រោះថ្នាក់ចរាចរណ៍នៅប្រទេសថៃ។ សមាជិកក្រុមគ្រួសារសពទាំងនោះ បាននាំគ្នាទៅទទួលសាកសពពីទីក្រុងប៉ោយប៉ែត ដើម្បីយកធ្វើបុណ្យតាមប្រពៃណីនៅថ្ងៃទី១៦ មិថុនា។ សពទាំង ៤នាក់នោះ មានស្រីពីរនាក់ ហើយមានស្រុកកំណើតនៅស្រុកអូររាំងឪ ម្នាក់ និងស្រុកកងមាស ចំនួន ៣នាក់។
ប្រជាពលរដ្ឋរស់នៅភូមិថ្លុកជ្រៅ ឃុំខ្ចៅ ស្រុកកងមាស ខេត្តកំពង់ចាម លោក មាស យីម ដែលត្រូវជាបងថ្លៃរបស់ អ្នកស្រី ឈិន ស្រី ឱ្យដឹងថា អ្នកស្រី ឈិន ស្រី រួមនឹងកូនប្រុសឈ្មោះ ចេក បញ្ញា អាយុ ១៨ឆ្នាំ និងប្ដីឈ្មោះ យីម ឆន អាយុ ៤០ឆ្នាំ ត្រូវទទួលរងគ្រោះថ្នាក់ចរាចរណ៍នៅប្រទេសថៃ បណ្ដាលឱ្យស្លាប់ម្តាយ និងកូន ចំណែកឯឪពុកវិញរបួសធ្ងន់។ លោកបន្តថា គ្រួសារលោកបាននាំគ្នាទៅទទួលសាកសពម្តាយ និងកូនប្រុស ដើម្បីយកធ្វើបុណ្យតាមប្រពៃណីនៅផ្ទះរបស់ម្តាយ ហើយគ្រោងនឹងយកទៅបញ្ចុះនៅថ្ងៃទី១៧ ខែមិថុនា៖ «វាអ្នកដែលស្លាប់ទៅហើយ គឺស្លាប់ទៅហើយណា៎ ប៉ុន្តែសំខាន់អត់ដឹងថាឪពុកអត់ដឹងនៅឯណានេះ?»។
ប្រភពដដែលបន្តថា មូលហេតុដែលប្អូនថ្លៃលោកសម្រេចចិត្តចំណាកស្រុកទៅធ្វើជាកម្មករសំណង់នៅស្រុកថៃ នោះ ដោយសារតែជីវភាពនៅឯស្រុកកំណើតមានការលំបាកពេក និងម្យ៉ាងជំពាក់បំណុលគេផង។ លោកបន្ថែមថា ការធ្វើបុណ្យអាចជួបការខ្វះខាត ពីព្រោះជាគ្រួសារខ្សត់ខ្សោយមិនមានថវិកាគ្រប់គ្រាន់ ចំណែកប្ដីរបួសធ្ងន់ទៀត។ លោកបន្ថែមថា បញ្ហាបន្តទៀតចំពោះមុខរបស់គ្រួសារប្អូនថ្លៃលោកនោះ គឺកូនប្រុសស្រីពីរនាក់ ដែលនៅរស់ គឺកាន់តែលំបាកមិនខាន ពីព្រោះអត់ពីម្តាយទៅហើយ។
ប្រជាពលរដ្ឋម្នាក់ទៀតនៅភូមិចម្ការឪឡឹក ឃុំព្រែកក្របៅ ស្រុកកងមាស លោក ឆន ស្រស់ ត្រូវជាបងប្រុស អ្នកស្រី ឆន កំសត់ អាយុ ១៨ឆ្នាំ ដែលរងគ្រោះថ្នាក់ចរាចរណ៍នៅប្រទេសថៃ ដែរនោះ ឱ្យដឹងថា ប្អូនស្រីលោកទើបតែនឹងទៅធ្វើការនៅប្រទេសថៃ ប្រហែល ៥ខែ ប៉ុន្តែលោកមិនដឹងថា ប្អូនស្រីនោះធ្វើការអ្វីទេ៖ «ទាំងជនចេញប្រទេសក្រៅប្រទេសក៏ដោយ ចំណាកស្រុកក៏ដោយ ត្រូវស៊ើបព័ត៌មានឱ្យច្បាស់លាស់ ស្រុកខ្មែរយើងក៏មិនខ្វះការងារដែរលោកគ្រូ។ ហើយនៅពេលណាមួយ ពេលបែកចេញពីស្រុកបែកឆ្ងាយមួយៗទៅ មានបញ្ហាអ៊ីចឹង គេនឹងពិបាកដោះស្រាយឱ្យយើង អ៊ីចឹងលោកគ្រូ»។
ប្រភពដដែលបន្ថែមថា ការរៀបចំពិធីបុណ្យសពប្អូនស្រី គឺមិនអាចធ្វើអ្វីធំដុំបានឡើយ ពីព្រោះសូម្បីតែអង្ករក៏ស្ទើរតែគ្មានសម្រាប់ដាំបាយឱ្យអ្នកចូលរួមផង។ លោកចង់ឱ្យប្រជាពលរដ្ឋដែលជាសប្បុរសទាំងអស់ ជួយចូលរួមចំណែកបំពេញនូវការខ្វះខាតរបស់គ្រួសារសពទាំងនោះតាមដែលអាចធ្វើទៅបាន។
ទាក់ទងនឹងការលើកឡើងពីទុក្ខលំបាកចំពោះមុខរបស់គ្រួសារសពនេះ អភិបាលរងខេត្តកំពង់ចាម លោក ជីម លាវ មានប្រសាសន៍ថា អាជ្ញាធរខេត្តសហការយ៉ាងយកចិត្តទុកដាក់ចំពោះគ្រួសារសព ដែលរួមមានការបញ្ជូនរថយន្តដឹកសពរបស់មន្ទីរសុខាភិបាលខេត្តទៅទទួលសព ពីប៉ោយប៉ែត មកស្រុកកំណើត។ លោកបន្តថា ខាងខេត្តនឹងចាត់ចែងខាងស្រុក ដើម្បីឱ្យគិតគូរដោះស្រាយបញ្ហាចំពោះមុខរបស់គ្រួសារសពទាំងនោះ៖ «ខេត្តបានធ្វើសេចក្តីណែនាំទៅស្រុកឱ្យរៀបចំចូលរួមបុណ្យសព ហើយខេត្តក៏មានគម្រោងនឹងចូលរួមបុណ្យសពដែរ»។
លោកបញ្ជាក់ថា ក្រៅពីសពដែលស្លាប់ ខាងអាជ្ញាធរខេត្ត រួមនិងខាងមន្ទីរការងារ ខិតខំប្រឹងប្រែងធ្វើយ៉ាងណារៀបចំការងារឱ្យប្រជាពលករដែលបានវិលត្រឡប់ពីប្រទេសថៃ ដែលមានចំនួន ១.៤៤៩នាក់ ឱ្យមានការងារធ្វើល្អប្រសើរឡើងវិញ។
ទាក់ទងនឹងករណីគ្រោះថ្នាក់ចរាចរណ៍បណ្ដាលឱ្យពលករខ្មែរស្លាប់នៅប្រទេសថៃ នេះដែរ ក្រសួងការបរទេសខ្មែរ បានចេញសេចក្តីថ្លែងការណ៍មួយ នៅថ្ងៃ១៦ មិថុនា ឱ្យដឹងថា មានគ្រោះថ្នាក់ចរាចរណ៍បានកើតឡើងពីរករណី បណ្ដាលឱ្យមនុស្សចំនួន ៨នាក់ស្លាប់ ក្នុងនោះស្រី ៦នាក់។ ករណីទី១ គឺនៅយប់ថ្ងៃទី១៤ មិថុនា ឈានចូលថ្ងៃទី១៥ មិថុនា មានគ្រោះថ្នាក់ចរាចរណ៍មួយនៅខេត្តឆាក់ឆឹងសៅ ប្រទេសថៃ បណ្ដាលឱ្យពលករខ្មែរខុសច្បាប់ចំនួន ៦នាក់ស្លាប់ ក្នុងនោះស្រី ៥នាក់ និងរបួសចំនួន ១៣នាក់។ លិខិតដដែលបន្តថា អ្នករបួសស្រាល ៦នាក់ ត្រូវបញ្ជូនមកកម្ពុជា ចំណែកសាកសព ៦នាក់ ក៏បញ្ជូនមកកម្ពុជា នៅថ្ងៃទី១៥ មិថុនា ក្នុងនោះខេត្តកំពង់ចាម ៤នាក់ ខេត្តព្រៃវែង ១នាក់ និងខេត្តបន្ទាយមានជ័យ ម្នាក់។ ករណីទី២ គឺនៅព្រឹកថ្ងៃទី១៥ មិថុនា មានគ្រោះថ្នាក់ចរាចរណ៍មួយកើតឡើងក្នុងខេត្តឈុនបូរី ប្រទេសថៃ បណ្ដាលឱ្យមនុស្ស ២នាក់ស្លាប់ និងរងរបួសចំនួន ១៨នាក់ ដោយឡែក ៩នាក់ដែលរបួសស្រាល ត្រូវបានបញ្ជូនចេញពីមន្ទីរពេទ្យប្រទេសថៃ មកកម្ពុជា វិញហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។