ក្រុមយុវជននៃអង្គការសប្បុរសធម៌កុលបុត្រកម្ពុជា ធ្វើដំណើរមកដល់ខេត្តរតនគិរី ហើយ ក្នុងយុទ្ធនាការរៃអង្គាសប្រាក់ពីប្រជាពលរដ្ឋទូទៅជួយដល់មន្ទីរពេទ្យគន្ធបុប្ផា សម្រាប់ព្យាបាលជំងឺដល់កុមារ និងជួយដល់អង្គការសប្បុរសធម៌កុលបុត្រសម្រាប់សាងសង់អគារស្នាក់នៅរបស់កុមារកំព្រា។
ប្រជាពលរដ្ឋជាអាជីវករ មន្ត្រីរាជការ កម្មករ សិប្បករ និងកសិករជាច្រើននាក់នាំគ្នាបរិច្ចាគប្រាក់រៀងៗខ្លួននៅថ្ងៃទី២៧ ខែមករា ក្នុងយុទ្ធនាការរៃអង្គាសប្រាក់សម្រាប់ជួយកុមារកម្ពុជា។
ក្រុមយុវជននៃអង្គការសប្បុរសធម៌កុលបុត្រកម្ពុជា ប្រមាណ ១០នាក់ បានធ្វើដំណើរដោយជិះកង់ចាកចេញពីខេត្តស្ទឹងត្រែង កាលពីថ្ងៃទី២៦ ខែមករា ឆ្ពោះមកខេត្តរតនគិរី ដែលជាខេត្តទី១១ ដើម្បីរួមគ្នាជាមួយក្រុមយុវជនយុវនារីនៃសហភាពសហព័ន្ធយុវជន និងយុវជនកាកបាទក្រហមខេត្តរតនគិរី ជាង ១០០នាក់ ដើររៃអង្គាសប្រាក់ជាលើកទីពីរនៅទីផ្សារក្រុងបានលុង ដើម្បីប្រមូលថវិកាផ្ដល់ទៅឲ្យមន្ទីរពេទ្យគន្ធបុប្ផា ជួយកុមារកំពុងព្យាបាលជំងឺក្នុងមន្ទីរពេទ្យនេះ និងអង្គការសប្បុរសធម៌កម្ពុជាកុលបុត្រ សម្រាប់សាងសង់អគារស្នាក់នៅរបស់កុមារកំព្រាផងដែរ។
ក្រុមយុវជនស្ម័គ្រចិត្តដើររៃអង្គាសប្រាក់ អ្នកខ្លះកាន់បដារូបភាពមានអត្ថន័យ កង់គន្ធបុប្ផាគ្មានស្រា កង់គន្ធបុប្ផា ១លានដុល្លារ និងកង់គន្ធបុប្ផា ២៥ខេត្តក្រុង។ ក្រៅពីបដាពាក្យស្លោកអ្នកស្ម័គ្រចិត្តខ្លះទៀតកាន់ហិបប្រមូលវិភាគទាន ខ្លះកាន់ឧបករណ៍បំពងសំឡេងអំពាវនាវឲ្យសប្បុរសជនចូលរួមជាមួយយុទ្ធនាការសប្បុរសធម៌នៅទូទាំង ២៥ ខេត្ត ក្រុងនៃប្រទេសកម្ពុជា។
អាជីវករលក់ដូរនៅផ្សារបានលុង អ្នកស្រី ព្រំ នី បានចូលរួមចំណាយប្រាក់សប្បុរស ខណៈក្រុមអ្នករៃអង្គាសបានកាន់ហិបប្រាក់សុំជំនួយសប្បុរសធម៌នៅព្រឹកថ្ងៃទី២៧ ខែមករា នេះ។ អ្នកស្រីមានទឹកមុខរីករាយ និងសម្ដែងមោទនភាពដែលបានចូលរួមបរិច្ចាគសម្រាប់សកម្មភាពមនុស្សធម៌នេះ៖ «ខ្ញុំរំភើបថា បងប្អូនខ្មែរបានជួយខ្មែរគ្នាឯងណា! ខ្ញុំថ្លែងអំណរគុណបានក្មួយជួយអ៊ីចឹង»។
សំឡេងអំពាវនាវតាមឧបករណ៍បំពងសំឡេងដាស់អារម្មណ៍ប្រជាពលរដ្ឋក្រុងបានលុង មិនថាមនុស្សចាស់ ឬមនុស្សវ័យកណ្ដាលនោះទេ សូម្បីកុមារក៏បានចូលរួមបរិច្ចាគប្រាក់ក្នុងហិបប្រាក់មនុស្សធម៌ជាហូរហែពេញមួយថ្ងៃនៃយុទ្ធនាការជិះកង់ប្រមូលថវិកាសប្បុរសនៅខេត្តរតនគិរី នេះ។
អនុប្រធានក្រុមយុវជននៃអង្គការសប្បុរសធម៌កម្ពុជាកុលបុត្រ លោក ធុល វិសាល ថ្លែងថា យុទ្ធនាការសប្បុរសធម៌នេះគឺមានគោលបំណងប្រមូលប្រាក់ជួយកុមារកម្ពុជា ហើយថវិកាដែលប្រមូលបាននោះ ៥០% ជួយមន្ទីរពេទ្យគន្ធបុប្ផា និង ៥០% ជួយអង្គការសប្បុរសធម៌កម្ពុជាកុលបុត្រ ដើម្បីកសាងមណ្ឌលកុមារកំព្រា និងធ្វើអគារស្នាក់នៅឲ្យកុមារកំព្រា។ លោកបន្តថា យុទ្ធនាការនេះគ្រោងប្រមូលថវិកាឲ្យបាន ១លានដុល្លារសម្រាប់ដំណើរជិះកង់នៅខេត្តក្រុងចំនួន២៥៖ «ជួយកុមារកម្ពុជា នេះជាលើកទីពីរហើយ កាលពីលើកទី១ យើងប្រមូលថវិកាបាន ដប់ប្រាំមួយម៉ឺនបីរយសាមសិបដុល្លារ កាលពីឆ្នាំ២០១៤»។
យុទ្ធនាការជិះកង់ ២៥ខេត្ត-ក្រុងនេះ បានឆ្លងកាត់ខេត្តចំនួន ១០ រួមមានខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប កំពង់ធំ ព្រះវិហារ និងខេត្តស្ទឹងត្រែង។ ខេត្តដែលប្រមូលថវិកាបានច្រើនជាងគេគឺខេត្តប៉ៃលិន ប្រមូលថវិកាបានជាង ១ម៉ឺនដុល្លារ។
សមាជិកសហភាពសហព័ន្ធយុវជនខេត្តរតនគិរី លោក សេង វឌ្ឍនា កត់សំគាល់ថា សកម្មជនកាកបាទក្រហម និងសកម្មជនសហភាពសហព័ន្ធយុវជនកម្ពុជា ខេត្តរតនគិរី ជាង ១០០នាក់ បានចូលរួមប្រមូលប្រាក់នៅខេត្តរតនគិរី ជាមួយយុវជនជិះកង់ប្រមូលថវិកាសប្បុរសនេះ។ លោកថា នេះជាសកម្មភាពមនុស្សធម៌ដ៏សំខាន់ដែលយុវជននៅខេត្តភាគឦសានសម្រេចចិត្តចលនាមហាជនឲ្យបរិច្ចាគប្រាក់ដើម្បីប្រយោជន៍សង្គម៖ «សមាជិករបស់យើងជាង ១០០នាក់ ចូលរួមរៃអង្គាសទាំងអស់គ្នាណា!»។
កាលពីឆ្នាំ២០១៤ ក្រុមយុវជននៃអង្គការសប្បុរសធម៌កុលបុត្រ បានធ្វើយុទ្ធនាការជិះកង់ប្រមូលថវិកា ២៥ខេត្ត-ក្រុង ទទួលបានប្រាក់ជាង ១៦ម៉ឺនដុល្លារ។ ដោយឡែកយុទ្ធនាការជិះកង់ដែលប្រារព្ធនៅឆ្នាំ២០១៧ នេះ ពួកគេមានផែនការជិះគង់ជាង ៤ពាន់គីឡូម៉ែត្រដើម្បីប្រមូលថវិកាឲ្យបាន ១លានដុល្លារក្នុងរយៈពេល ៦០ថ្ងៃ។
នៅថ្ងៃទី២៨ ខែមករា អាជ្ញាធរខេត្តនឹងរៀបចំពិធីស្វាគមន៍ក្រុមយុវជនជិះកង់នៅបរិវេណសាលាខេត្ត និងធ្វើពិធីរៃអង្គាសប្រាក់ពីមន្ត្រីរាជការជុំវិញសាលាខេត្តបន្ថែមទៀតដើម្បីគាំទ្រសកម្មភាពមនុស្សធម៌នេះ។
កាលពីថ្ងៃទី២៥ ខែមករា យុទ្ធនាការជិះកង់រៃអង្គាសប្រាក់បានប្រមូលថវិកាសប្បុរសធម៌បានចំនួនជាង ២.៦០០ដុល្លារអាមេរិក ធ្វើឲ្យតួលេខថវិកាដែលប្រមូលបានកើនឡើងសរុបជិត ៦ម៉ឺនដុល្លារអាមេរិក។
តាមការគ្រោងទុក នៅថ្ងៃទី២៨ ខែមករា ក្រុមយុវជនជិះកង់ប្រមូលថវិកាសប្បុរសនឹងបន្តដំណើរទៅស្រុកកោះញែក ដែលជាដំណើរជិះកង់ឆ្ពោះទៅខេត្តមណ្ឌលគិរី ជាខេត្តទី១២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។