ពលរដ្ឋរស់នៅក្រុងស្ទឹងត្រែង បារម្ភល្បែងចាក់កន្ទុយលេខនៅក្រុងស្ទឹងត្រែង កើតមានយ៉ាងអនាធិបតេយ្យ។ ក្តីបារម្ភនេះ បន្ទាប់ពីមានពលរដ្ឋជាច្រើនសម្រុកលេងល្បែងនេះ ហើយការទប់ស្កាត់ និងបង្ក្រាបរបស់សមត្ថកិច្ច ហាក់មានតិចតួចណាស់។ ចំណែកមន្ត្រីសង្គមស៊ីវិល រិះគន់យ៉ាងខ្លាំងចំពោះភាពព្រងើយកន្តើយរបស់ស្នងការខេត្ត និងកងរាជអាវុធហត្ថខេត្តស្ទឹងត្រែង ដែលបណ្តោយឲ្យករណីនេះកើតឡើងដដែលៗ។
ពលរដ្ឋរស់នៅសង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង នៅថ្ងៃទី១ វិច្ឆិកា អំពាវនាវរដ្ឋាភិបាល ឲ្យពង្រឹងយន្តការភូមិ-ឃុំមានសុវត្ថិភាព ដែលក្រសួងមហាផ្ទៃ បានប្រកាស ៩ចំណុច ក្នុងនោះល្បែងកន្ទុយលេខ ក៏ឋិតក្នុងចំណោម ៩ចំណុចនោះដែរ ដែលបណ្ដាលឲ្យពលរដ្ឋមួយចំនួនងប់ងុលល្បែងនេះរហូតដល់លក់ទ្រព្យសម្បត្តិ ខ្ចីបុលគេ ហើយអាចឈានដល់កើតអំពើហិង្សាក្នុងគ្រួសារទៀតផង។
ពលរដ្ឋរស់នៅក្រុងស្ទឹងត្រែង ម្នាក់ក្នុងចំណោមពលរដ្ឋជាច្រើនទៀត ថ្លែងក្នុងលក្ខខណ្ឌមិនបញ្ចេញឈ្មោះ ឲ្យដឹងថា លោកពុំមានជំនឿចំពោះការបង្ក្រាបរបស់សមត្ថកិច្ចខេត្តនេះឡើយ ដោយសារអ្នកបើកល្បែងធំក្នុងខេត្តនេះ ភាគច្រើនសុទ្ធតែមានលុយមានអំណាច។ លោកបន្តថា ទីតាំងល្បែងកន្ទុយលេខធំក្នុងក្រុងស្ទឹងត្រែង ចំនួន ៣កន្លែង ឈ្មោះ សុខឡាង ងី ហៅ ងីកំប៉ោង និងឈ្មោះ វិម៉ាំងសា ហៅតាម៉ាំង ព្រមទាំងមានកូនកញ្ច្រែងតូចៗជាច្រើនទៀតក្នុងខេត្តនេះ។ លោកថា មានពលរដ្ឋខ្លះបានចំណាយប្រាក់ចាប់ពី ៦០ម៉ឺនរៀលទៅ ១លានរៀលក្នុង ១ថ្ងៃ សម្រាប់ធ្វើដើមទុនលេងល្បែងនេះ៖ «ប្រសិនជាគាត់ងុបនឹងល្បែងគាត់អាចយកទ្រព្យសម្បត្តិផ្ទាល់ខ្លួន ហើយនឹងប៉ះពាល់ដល់ក្រុមគ្រួសារមានការទាស់ទែងគ្នា។ អ្នកគេចាក់ធំៗមួយថ្ងៃ ៥០ម៉ឺនទៅ ៦០ម៉ឺន អាចដល់ ១ថ្ងៃមួយលានទៅ ១លានជាង»។
បុរសដដែលបន្ថែមថា ល្បែងកន្ទុយលេខ គឺជាល្បែងហាក់មានប្រភពអាថ៌កំបាំងពីប្រទេសវៀតណាម ដែលគេមិនឃើញទីតាំងបង្វិលឆ្នោត ដើម្បីឲ្យប្រាកដថា ឆ្នោតនោះចេញដោយវិធីណានោះទេ។ តែគេឃើញចេញលទ្ធផលតាមរយៈសារតាមទូរស័ព្ទដៃ និងម៉ាស៊ីនអេឡិចត្រូនិកមាន ៦ប៉ុស្តិ៍ទៅ ៧ប៉ុស្តិ៍ចេញពីរដងក្នុងមួយថ្ងៃ។ ម្យ៉ាងទៀត ល្បែងនេះមានលទ្ធភាពប្រមូលប្រាក់ប្រជាពលរដ្ឋរាប់ម៉ឺនដុល្លារក្នុងមួយសប្ដាហ៍។
ឆ្លើយតបការចោទប្រកាន់នេះ លោក ងី ហៅ ងីកំប៉ោង ចាត់ទុកការចោទប្រកាន់របស់ពលរដ្ឋថា ជាការយល់ច្រឡំ ដោយលើកហេតុផលថា ទីតាំងឆ្នោតរបស់លោកជាឆ្នោតរបស់ក្រុមហ៊ុនខ្មែរឈ្មោះថា ឌ្រីម វីន (Dream Win Corporations) និងឆ្នោតនាគនាំសំណាង មានច្បាប់អនុញ្ញាតពីរដ្ឋាភិបាលត្រឹមត្រូវ៖ «បងអាចអញ្ជើញមកផ្ទាល់ក៏បាន ឬក៏ចង់យ៉ាងម៉េច? ខ្ញុំមានឯកសារគ្រប់គ្រាន់ដែលបង្ហាញគាត់ថា ខ្ញុំលក់ឆ្នោតស្របច្បាប់ ព្រោះការចោទរបស់ប្រជាពលរដ្ឋដោយសារមានការឈ្នានីស។ ខ្ញុំព្យាយាមរកប្រាក់ចំណូលដល់រដ្ឋាភិបាល។ កន្លងមក ដោយសារខ្ញុំអត់មាន សម័យណាក៏មានឆ្នោតខុសច្បាប់ដែរ»។
ករណីនេះដែរ ស្នងការខេត្តស្ទឹងត្រែង លោក ម៉ៅ តារា បដិសេធថា បច្ចុប្បន្នពុំមានកន្លែងលេងល្បែងកន្ទុយលេខទេ ព្រោះនគរបាលធ្លាប់បង្ក្រាបរួចហើយ គឺមានតែឆ្នោតនាគនាំសំណាង ដែលមានអាជ្ញាប័ណ្ណពីរដ្ឋាភិបាលប៉ុណ្ណោះ៖ «បងប្អូនប្រជាពលរដ្ឋមួយចំនួន គាត់មិនយល់ ឃើញតែគេមានកន្លែងគេកត់។ គេមានម៉ាស៊ីន មិនមែនទៅកត់ដៃដូចឆ្នោតកន្ទុយលេខវៀតណាម ទេ អាណាមិនស្របច្បាប់ គឺយើងបិទអស់ហើយ»។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តស្ទឹងត្រែង លោក ហូ សំអុល ថ្លែងបញ្ជាក់ថា ល្បែងកន្ទុយលេខបានកើតមានឥតឈប់ឈរ ទោះបីជាអាជ្ញាធរអះអាងពីការបង្ក្រាបនេះក្ដី ហើយសមត្ថកិច្ចខេត្តនេះហាក់ដូចជាត្រូវថ្នាំសណ្ដំរបស់ឈ្មួញ។ លោកថា ជាក់ស្តែងសមត្ថកិច្ចក្នុងខេត្តនេះ ហាក់ធ្វើមិនដឹងមិនឮចំពោះការទប់ស្កាត់ល្បែងស៊ីសងដែលកំពុងរីកដូចផ្សិត៖ «បង្ក្រាបហើយលែងវិញ ដោយមិនមានចំណាត់ការណាមួយឲ្យខ្លាំង ជាពិសេស គឺលោកព្រះរាជអាជ្ញា គាត់គួរតែបើកការស៊ើបអង្កេតឲ្យមែនទែន ព្រោះអីយើងឃើញល្បែងស៊ីសងឡើងដល់ពីរកន្លែងទៀតហើយ»។
ទោះយ៉ាងណា ព្រះរាជអាជ្ញាអមសាលាដំបូងខេត្តស្ទឹងត្រែង លោក ជា ពេជ្រ មានប្រសាសន៍ថា តំណាងអយ្យការ និងសមត្ថកិច្ចជំនាញ បានពិភាក្សាពីគោលការណ៍ទប់ស្កាត់ករណីនេះ ដោយជូនដំណឹងទៅអ្នកពាក់ព័ន្ធឲ្យបញ្ឈប់ តែបើមិនបញ្ឈប់នោះទេ នឹងមានវិធានការចុះបង្ក្រាប និងចាប់ជនល្មើសយកមកផ្ដន្ទាទោសតាមផ្លូវច្បាប់។
ច្បាប់ស្ដីពីការបង្ក្រាបល្បែងស៊ីសងឆ្នាំ១៩៩៦ មាត្រា៥ ចែងថា ចំពោះអ្នកបើកល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែង និងភ្នាក់ងារស៊ីសង ត្រូវផ្ដន្ទាទោសពិន័យជាប្រាក់ពី ៥លានរៀលដល់ ២០លានរៀល និងដាក់គុកពី ១ឆ្នាំដល់ ៥ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។