កម្មករ​រោងចក្រ​វីន​ស៊ីងតិច​ធ្វើ​បាតុកម្ម​ទាមទារ​សំណង​រំលាយ​កិច្ចសន្យា​ការងារ​មុន​កំណត់

ដោយ ចេង ម៉េងជូ
2016-03-21
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
កម្មករ​រោងចក្រ​កាត់​ដេរ វីន ស៊ីងតិច (Win Shingtex) នៅ​សង្កាត់​ចោមចៅ ខណ្ឌ​ដង្កោ តវ៉ា​ទាមទារ​សំណង​បន្ទាប់​ពី​ថៅកែ​រោងចក្រ​សម្រេច​រំលាយ​កិច្ចសន្យា​ការងារ​មុន​កាល​កំណត់ នៅ​ព្រឹក​ថ្ងៃ​ទី​២១ ខែ​មីនា ឆ្នាំ​២០១៦។ RFA/Phan Yasy
កម្មករ​រោងចក្រ​កាត់​ដេរ វីន ស៊ីងតិច (Win Shingtex) នៅ​សង្កាត់​ចោមចៅ ខណ្ឌ​ដង្កោ តវ៉ា​ទាមទារ​សំណង​បន្ទាប់​ពី​ថៅកែ​រោងចក្រ​សម្រេច​រំលាយ​កិច្ចសន្យា​ការងារ​មុន​កាល​កំណត់ នៅ​ព្រឹក​ថ្ងៃ​ទី​២១ ខែ​មីនា ឆ្នាំ​២០១៦។ RFA/Phan Yasy
RFA/Phan Yasy

កម្មករ​ជាង ៣០០​នាក់​នៃ​រោងចក្រ​កាត់​ដេរ វីន ស៊ីងតិច (Win Shingtex) នៅ​សង្កាត់​ចោមចៅ ខណ្ឌ​ដង្កោ នៅ​ព្រឹក​ថ្ងៃ​ទី​២១ ខែ​មីនា ប្រមូល​ផ្ដុំ​គ្នា​តវ៉ា​ទាមទារ​សំណង បន្ទាប់​ពី​ថៅកែ​រោងចក្រ​សម្រេច​រំលាយ​កិច្ចសន្យា​ការងារ​មុន​កាល​កំណត់។

មន្ត្រី​នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ ដែល​សម្រប​សម្រួល​វិវាទ​នេះ ថ្លែង​ថា ការ​ចរចា​រវាង​ភាគី​ពាក់ព័ន្ធ​មិន​ទាន់​ទទួល​ដំណោះស្រាយ​នៅ​ឡើយ ព្រោះ​មិន​មាន​តំណាង​ថៅកែ​រោងចក្រ​ចូលរួម។ មន្ត្រី​នៃ​ក្រសួង​បញ្ជាក់​ថា ការ​ចរចា​រក​ដំណោះស្រាយ នឹង​បន្ត​ធ្វើ​នៅ​ព្រឹក​ថ្ងៃ​ទី​២២ ខែ​មីនា ទៀត​ដោយ​មាន​វត្តមាន​មេធាវី​រោងចក្រ។

បាតុកម្ម​របស់​កម្មករ​រោងចក្រ វីន ស៊ីងតិច (Win Shingtex) ជាង ៣០០​នាក់​ក្នុង​ចំណោម​កម្មករ​សរុប​ជាង ៥០០​នាក់ ធ្វើ​ឡើង​ដោយ​ហែ​ក្បួន​ចេញ​ពី​ខាង​មុខ​រោងចក្រ ស្ថិត​នៅ​ភូមិ​ជម្ពូវ័ន សង្កាត់​ចោមចៅ ខណ្ឌ​ពោធិ៍សែនជ័យ ឆ្ពោះ​មក​ក្រសួង​ការងារ និង​បណ្ដុះបណ្ដាល​វិជ្ជាជីវៈ ប៉ុន្តែ​ត្រូវ​បាន​មន្ត្រី​នៃ​ក្រសួង​នេះ​មក​សម្រប​សម្រួល នៅ​ពេល​ពួក​គេ​ហែ​ក្បួន​មក​ដល់​ខាង​មុខ​វត្ត​ជម្ពូវ័ន។

ការ​តវ៉ា​របស់​កម្មករ ធ្វើ​ឡើង​បន្ទាប់​ពី​រោងចក្រ វីន ស៊ីងតិច ប្រកាស​រំសាយ​កម្មករ​ទាំងអស់​កាល​ពី​ថ្ងៃ​ទី​៥ ខែ​មីនា ដោយ​លើក​មូលហេតុ​ថា រោងចក្រ​ពុំ​អាច​ដំណើរ​ការ​ត​ទៅ​ទៀត ព្រោះ​មិន​ទទួល​បាន​ការ​បញ្ជា​ទិញ​ពី​បរទេស​សម្រាប់​ឆ្នាំ​២០១៦។

ភាគី​កម្មករ​អះអាង​ថា ថៅកែ​រោងចក្រ​បាន​រំលាយ​កិច្ចសន្យា​ការងារ​របស់​ពួក​គេ​ដោយ​មិន​បាន​ជូន​ដំណឹង​ជា​មុន និង​មិន​បាន​ផ្ដល់​សំណង​សមរម្យ​ដល់​ក្រុម​កម្មករ​ដែល​ត្រូវ​បាន​បញ្ឈប់​ឡើយ។

លេខាធិការ​នៃ​សហព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ស៊ីខៅឌូ (CCAWDU) លោក ផាន ធា លើក​ឡើង​ថា ថៅកែ​រោងចក្រ​ហាក់​មិន​មាន​ឆន្ទៈ​ផ្ដល់​សំណង​ជូន​កម្មករ​ឡើយ។ លោក​ជំរុញ​ឲ្យ​ភាគី​ថៅកែ​រោងចក្រ ផ្ដល់​សំណង​ឲ្យ​បាន​ឆាប់​រហ័ស ខណៈ​កម្មករ​កំពុង​ប្រឈម​នឹង​ភាព​ខ្វះខាត​ក្នុង​ជីវភាព៖ «រំលាយ​កិច្ច​សន្យា​តាំង​ពី​ថ្ងៃ​ទី​៥ មក។ ឥឡូវ​មក​ដល់​ថ្ងៃ​នេះ វា​ច្រើន​ថ្ងៃ​មក​ហើយ​ដែរ តែ​អត់​ទាន់​ឃើញ​មាន​ដំណោះ​ស្រាយ។ អ៊ីចឹង​យើង​មាន​តែ​ជំរុញ​ ឲ្យ​ខាង​អ្នក​កាសែត និង​បងៗ​ខាង​សមត្ថកិច្ច​ដែល​ពាក់ព័ន្ធ ខាង​ក្រសួង​ការងារ​ហ្នឹង​ឲ្យ​ជួយ​ជំរុញ​ទៅ​ខាង​និយោជក​វិញ»

ឆ្លើយ​តប​នឹង​ការ​បារម្ភ​របស់​កម្មករ ប្រធាន​រដ្ឋបាល​រោងចក្រ វីន ស៊ីងតិច អ្នកស្រី ម៉ី ស៊ីលីនដា ដែល​មាន​វត្តមាន​ក្នុង​ការ​ចរចា​កាល​ពី​ព្រឹក​ថ្ងៃ​ទី​២១ ខែ​មីនា ឲ្យ​ដឹង​ថា ថៅកែ​រោងចក្រ​កំពុង​ចាត់ចែង​ការ​ទូទាត់​សំណង​ជូន​កម្មករ​ទាំងអស់៖ «ចាស​បង! យើង​នឹង​រក​ដំណោះ​ស្រាយ​ទៀត។ រោងចក្រ​នេះ Head Office (ការិយាល័យ​កណ្ដាល) នៅ​ហុងកុង។ គាត់​មាន​តំណាង​មេធាវី​របស់​គាត់​ជា​អ្នក​ដោះស្រាយ ដល់​អ៊ីចឹង ខាង​ខ្ញុំ​ជា​ប្រធាន​រដ្ឋបាល​ពិត​មែន តែ​ខ្ញុំ​អត់​អាច​ឆ្លើយ​អី​បាន​ទេ​បង»

អគ្គលេខាធិការ​រង​នៃ​គណៈកម្មការ​សម្រាប់​ដោះស្រាយ​បញ្ហា​កូដកម្ម​បាតុកម្ម​នៅ​តាម​គ្រប់​មុខ​សញ្ញា នៃ​ក្រសួង​ការងារ លោក វង្ស សុវណ្ណ ដែល​សម្រប​សម្រួល​ក្នុង​វិវាទ​នេះ មាន​ប្រសាសន៍​ថា ក្រសួង​នឹង​បន្ត​ដោះស្រាយ​ជាមួយ​ភាគី​ពាក់ព័ន្ធ​បន្ត​ទៀត នៅ​ព្រឹក​ថ្ងៃ​ទី​២២ ខែ​មីនា ដោយ​មាន​មេធាវី​តំណាង​រោងចក្រ​ចូលរួម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល