ថ្នាក់ដឹកនាំគណបក្សនយោបាយទាំងពីរនៅតែស្នើបន្តឲ្យក្រុមហ៊ុនប្រេងឥន្ធនៈនៅកម្ពុជា ទាំងអស់ត្រូវតែស្វែងរកលទ្ធភាពបញ្ចុះតម្លៃប្រេងសាំងជាបន្តទៀត។ ប៉ុន្តែបញ្ហានៃការបញ្ចុះតម្លៃប្រេងសាំងនេះ មេដឹកនាំគណបក្សកាន់អំណាច និងគណបក្សប្រឆាំង ក៏បានបញ្ចូលសារនយោបាយដើម្បីស្វែងរកការគាំទ្រពីប្រជាពលរដ្ឋ រៀងៗខ្លួន ឬមានន័យថា ក្រោមការដឹកនាំរបស់ពួកគេ ធ្វើឲ្យសាំងធ្លាក់ថ្លៃ។
ទាំងលោកនាយករដ្ឋមន្ត្រី ហ៊ុន សែន មកពីបក្សកាន់អំណាច គឺគណបក្សប្រជាជនកម្ពុជា និងលោក សម រង្ស៊ី មេដឹកនាំបក្សប្រឆាំងមកពីគណបក្សសង្គ្រោះជាតិ បានស្នើឲ្យក្រុមហ៊ុនផ្គត់ផ្គង់ប្រេងឥន្ធនៈ ដែលកំពុងប្រតិបត្តិការអាជីវកម្មនៅកម្ពុជា ចំនួន ៧ក្រុមហ៊ុន ត្រូវបញ្ចុះតម្លៃប្រេងសាំងរបស់ខ្លួន ស្របពេលដែលតម្លៃប្រេងនៅទីផ្សារអន្តរជាតិធ្លាក់ថ្លៃយ៉ាងគំហុក។
ប៉ុន្តែលោក សម រង្ស៊ី ហាក់បន្ទោសចំពោះវិធានការរបស់រាជរដ្ឋាភិបាលកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន ថាមានឆន្ទៈតិចតួចក្នុងការស្វែងរកលទ្ធភាពបញ្ចុះតម្លៃប្រេងសាំងនៅកម្ពុជា។
លោកសម រង្ស៊ី មានប្រសាសន៍នៅក្នុងវេទិកាសាធារណៈនៅថ្ងៃទី១៨ មករា ថា ការបញ្ចុះតម្លៃប្រេងសាំងមិនបាននោះ ដោយសារតែម្ចាស់ក្រុមហ៊ុនប្រេងឥន្ធនៈភាគច្រើនស្និទ្ធនឹងថ្នាក់ដឹកនាំរាជរដ្ឋាភិបាល ឬមានន័យថា រាជរដ្ឋាភិបាលកម្ពុជា ទុកឱកាសឲ្យម្ចាស់ក្រុមហ៊ុនប្រេងឥន្ធនៈទាំងនោះ ស្វែងរកលទ្ធភាពរកប្រាក់ចំណេញខ្ពស់តាមដែលពួកគេអាចធ្វើទៅបាន៖ «រដ្ឋាភិបាលអត់រវល់ទេ ប្រហែលជាគ្នាគេ ក្រុមហ៊ុនប្រេងសាំងជារបស់គ្នាគេ ហើយគេ (រដ្ឋាភិបាល) មិនចង់យករឿងហ្នឹងមកនិយាយ»។
ឆ្លើយតបទៅនឹងការលើកឡើងនេះ លោកនាយករដ្ឋមន្ត្រី ហ៊ុន សែន ធ្លាប់បានអះអាងថា ការបញ្ចុះតម្លៃប្រេងសាំងមិនបាន ដោយសារតែការទិញស្តុកពីមុនវាមិនមានតម្លៃខ្ពស់ តែនៅពេលនេះ លោក ហ៊ុន សែន បានស្នើឲ្យក្រុមហ៊ុនប្រេងឥន្ធនៈទាំងអស់ មិនអាចយកលេសនេះមកកំណត់តម្លៃលក់ទៀតនោះទេ ព្រោះនិន្នាការនៃតម្លៃលក់ប្រេងសាំងនៅលើពិភពលោក បានបន្តធ្លាក់ថ្លៃអស់រយៈពេលជាច្រើនខែ។ លោកទទូចឲ្យក្រុមហ៊ុនប្រេងឥន្ធនៈ គួរបញ្ចុះតម្លៃលក់ប្រេងសាំងរបស់ខ្លួនដោយកុំលក់យកចំណេញកប់ក្ដោងពេក ជាពិសេសក្រុមហ៊ុនវិនិយោគប្រេងឥន្ធនៈមកពីបរទេស៖ «ក្នុងស្រុកក៏ដោយ ក្រៅស្រុកក៏ដោយ សូមមេត្តាពិនិត្យមើលលទ្ធភាពបញ្ជុះតម្លៃប្រេងសាំងឡើងវិញ ព្រោះសាំងទិញមកមុន វាល្មមអស់ហើយ កុំលក់យកចំណេញច្រើនពេក»។
បញ្ហានេះ ក្រុមហ៊ុនប្រេងសាំងបរទេសមួយចំនួនបានបដិសេធផ្ដល់ព័ត៌មានបន្ថែមលើលទ្ធភាពបញ្ចុះតម្លៃសាំង ដោយសារក្រុមហ៊ុនទាំងនោះអះអាងថា ពួកគេកំពុងជាប់រវល់បិទបញ្ជីចំណូលចំណាយរបស់ក្រុមហ៊ុនប្រចាំឆ្នាំ២០១៤។
ទោះជាយ៉ាងណាក៏ដោយ ការស្នើសុំរបស់លោកនាយករដ្ឋមន្ត្រី ហ៊ុន សែន និង លោក សម រង្ស៊ី កន្លងទៅ ក៏បានជំរុញឲ្យថ្លៃសាំងនៅកម្ពុជា ធ្លាក់ថ្លៃជាង ២០% ដោយគិតចាប់តាំងពីខែតុលា ឆ្នាំ២០១៤ រហូតដល់ខែមករា ឆ្នាំ២០១៥ ស្របពេលតម្លៃប្រេងឆៅនៅលើទីផ្សារអន្តរជាតិ ធ្លាក់ថ្លៃជាង ៥០%។
ការធ្លាក់ថ្លៃប្រេងសាំងប្រមាណ ២០% ពេលបច្ចុប្បន្ន អ្នកនយោបាយតែងយកលេសថា ដោយសារតែបទអន្តរាគមន៍របស់គេរៀងខ្លួន ឬគេចង់បង្ហាញគណបក្សនយោបាយកាន់អំណាច និងគណបក្សប្រឆាំងធ្វើការងារដើម្បីផលប្រយោជន៍ប្រជាពលរដ្ឋ និងសេដ្ឋកិច្ចជាតិ។ ប៉ុន្តែអ្នកវិភាគនយោបាយមួយចំនួនយល់ឃើញថា ប្រេងនៅលើពិភពលោកចុះថោក ហើយថ្លៃសាំងនៅកម្ពុជា ចុះថោកដែរ វាគឺជារឿងធម្មតា។ ប៉ុន្តែ ប្រសិនបើមេដឹកនាំគណបក្សនយោបាយណាមួយអាចធ្វើឲ្យសាំងនៅកម្ពុជា លក់ថោក នៅពេលដែលថ្លៃសាំងពិភពលោកឡើងថ្លៃវិញ ទើប ចាត់ទុកថា គណបក្សនយោបាយនោះស្រឡាញ់ជាតិ និងប្រជាពលរដ្ឋពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។