ថ្វីត្បិតតែថ្មីៗនេះ ក្រុមប្រឹក្សាការងារបានសម្រេចផ្ដល់ប្រាក់ខែអប្បបរមាចំនួន ១២៨ដុល្លារ សម្រាប់ឆ្នាំ២០១៥ ដែលតួលេខនេះមើលទៅហាក់ខ្ពស់ជាងឆ្នាំមុនៗក្ដី ក៏សកម្មភាពនៃការតវ៉ារបស់កម្មករនៅតាមរោងចក្រ នៅតែមិនថមថយឡើយ។
ទាក់ទិនរឿងនេះ កម្មករជាង ២.០០០នាក់នៅរោងចក្រ ជីម លី (Ghim Li) បានផ្ទុះការតវ៉ាប្រឆាំងលក្ខខណ្ឌការងារ និងប្រាក់អត្ថប្រយោជន៍ផ្សេងៗទៀត ជាពិសេសជំរុញឲ្យភាគីរោងចក្រ ត្រូវឲ្យបុគ្គលិកផ្នែកជាងម៉ាស៊ីនម្នាក់ដែលបានបញ្ឈប់ចូលធ្វើការឡើងវិញ។
កម្មករប្រមាណ ២.០០០នាក់ បានប្រមូលផ្ដុំគ្នានៅខាងមុខរោងចក្រ ជាទីដែលពួកគេកំពុងបំពេញការងារក្នុងវិស័យកាត់ដេរ ដើម្បីជំរុញឲ្យភាគីរោងចក្រផ្ដល់អត្ថប្រយោជន៍មួយចំនួន ដែលក្រុមកម្មករចាត់ទុកថា រហូតមកដល់ពេលនេះ ខាងរោងចក្រនៅមិនទាន់បានឆ្លើយតបតាមច្បាប់ការងារនៅឡើយទេ។
រោងចក្រឈ្មោះ ជីម លី ដែលកម្មករធ្វើបាតុកម្មនៅពេលនេះ គឺមានទីតាំងស្ថិតនៅស្របតាមបណ្ដោយផ្លូវជាតិលេខ៤ ក្នុងសង្កាត់កំបូល ខណ្ឌពោធិ៍សែនជ័យ ផ្នែកខាងលិចជាយរាជធានីភ្នំពេញ។
បាតុកម្មផ្ទុះឡើងដែលមានទ្រង់ទ្រាយធំជាលើកដំបូងនៅពេលនេះ គឺកើតឡើងក្រោយពីកិច្ចប្រជុំរបស់គណៈកម្មការប្រឹក្សាការងារ ទើបតែបានបញ្ចប់ការខ្វែងគំនិតគ្នា ពាក់ព័ន្ធការដំឡើងប្រាក់ខែកម្មករក្នុងឆ្នាំ២០១៥ កាលពីពេលថ្មីៗនេះ។
លោកស្រី សួស លាព ដែលជាកម្មការិនីម្នាក់ក្នុងចំណោមកម្មករប្រមាណ ២ពាន់នាក់នៃរោងចក្រ ជីម លី ឲ្យដឹងថា មូលហេតុដែលពួកគេតវ៉ានេះ ដោយសារភាគីរោងចក្រខកខានក្នុងការអនុវត្តតាមច្បាប់ការងាររបស់ប្រទេសកម្ពុជា។ លោកស្រីបន្តថា ភាគីរោងចក្រក្រៅពីមិនបានឆ្លើយតបទៅតាមច្បាប់ការងារហើយ ថែមទាំងបានបញ្ឈប់បុគ្គលិកផ្នែកជាងម៉ាស៊ីនដោយគ្មានហេតុផលទៀតផង៖ «តវ៉ាឃើញថារោងចក្រគេនៅជិតហ្នឹងគេមានលុយបាយថ្ងៃត្រង់ ហើយនិងមានលុយឡានអីលុយធ្វើដំណើរហ្នឹងលើសពីរោងចក្រខ្ញុំ ហើយនិងតវ៉ាមួយទៀត តាំងពីដូររដ្ឋបាលថ្មីនេះមក ច្បាប់កែប្រែរហូត។ តាំងពីអ្នកមានផ្ទៃពោះ តាំងពីការកោតកាត់ ហូបអាហារពេលព្រឹកតឹងតែងពេលមុនឆ្ងាយណាស់។ ឥតដូចរដ្ឋបាលមុនទេ។ អ៊ីចឹងហើយពួកខ្ញុំមានការឈឺចាប់ មានការតវ៉ា ធ្វើកូដកម្មនៅមុខរោងចក្រ ជីម លី ហ្នឹង»។
បន្ថែមពីលើនេះ ការតវ៉ាកាលពីព្រឹកថ្ងៃទី១៧ វិច្ឆិកា បើទោះជាដឹងថាឋិតក្រោមកម្ដៅថ្ងៃក៏ដោយ ក៏ក្រុមកម្មករបានក្រាញននៀលមិនចាកចេញដែរ រហូតដល់ម៉ោងរំសាយជិតបាយថ្ងៃត្រង់។ លក្ខខណ្ឌមួយចំនួនដែលកម្មករទាមទារ ក្នុងនោះរួមមាន ស្នើឲ្យភាគីរោងចក្រទទួលយក លោក សេស ពិសី ជាជាងម៉ាស៊ីននៅក្នុងរោងចក្រ ដែលក្រុមហ៊ុនបានបញ្ឈប់មុនបុណ្យអុំទូកបានចូលធ្វើការវិញ ទាមទារឲ្យក្រុមហ៊ុនផ្ដល់លុយបាយថ្ងៃត្រង់ម្នាក់ ៤ពាន់រៀល ហើយស្នើឲ្យរោងចក្រផ្ដល់លុយថ្លៃធ្វើដំណើរ ឬថ្លៃស្នាក់នៅចំនួន ១៥ដុល្លារក្នុងមួយខែ ស្នើឲ្យរោងចក្រផ្ដល់លុយព្រីមចំនួន ១៨ដុល្លារក្នុងមួយខែ និងស្នើឲ្យបើកប្រាក់ ៥ភាគរយដល់កម្មករនិយោជិតណាចប់កិច្ចសន្យាការងារ។ លើសពីនេះ ទាមទារឲ្យក្រុមហ៊ុនបើកលុយ ៥០ភាគរយបីខែមុនដល់ស្ត្រីដែលដាក់ច្បាប់ឈប់សម្រាកសម្រាលកូន។ ជាងនេះទៀត ស្នើសុំឲ្យរោងចក្ររៀបចំទីតាំងដាក់កង់ និងម៉ូតូឲ្យបានសមរម្យ ជាពិសេសជំរុញឲ្យក្រុមហ៊ុនអនុវត្តម៉ោងធ្វើការតាមគោលការណ៍ចាស់។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ព្រមានថា បើសំណើនេះមិនត្រូវបានភាគីរោងចក្រដោះស្រាយទេ លោកនឹងដឹកនាំចលនាកម្មករធ្វើយុទ្ធនាការតវ៉ា លុះត្រាមានដំណោះស្រាយ៖ «ខ្ញុំគាំទ្រពួកគាត់ទាំងស្រុង។ បើទោះបីការទាមទាររបស់ពួកគាត់មានលក្ខណៈប្រសើរជាងច្បាប់ក៏ដោយ ហើយខ្ញុំនឹងចូលរួមជាមួយពួកគាត់ លុះត្រាដល់ទីបញ្ចប់។ ហើយប្រសិនបើមិនមានការដោះស្រាយឲ្យពួកគាត់ទេ នោះខ្ញុំនឹងដឹកនាំបងប្អូនកម្មករជាង ២ពាន់នាក់នេះទៅស្រែកនៅមុខក្រសួងការងារ ដើម្បីឲ្យរដ្ឋមន្ត្រីក្រសួងការងារ មកអន្តរាគមន៍»។
ឆ្លើយតបរឿងនេះ ប្រធានរដ្ឋបាលរោងចក្រ ជីម លី លោក សោម ពិសិដ្ឋ ឲ្យដឹងថា ខាងភាគីរោងចក្របានបញ្ជូនសំណុំរឿងទៅក្រសួងសាមី ដែលតំណាងដោយរដ្ឋាភិបាលដោះស្រាយរួចហើយ។ ជាងនេះទៀត សំណើដែលកម្មករបានទាមទារ ក៏ត្រូវបានរៀបចំរួចហើយដែរនៅក្នុងរបាយការណ៍ដែលបានបញ្ជូននៅពេលនេះ៖ «យើងបានបិទបញ្ជីអីហ្នឹងរីផត (Report) រួចទៅហើយ។ ខាងក្រសួង អ៊ីចឹងយើងឲ្យខាងមន្ទីរការងារគេអ្នកធ្វើការងារហ្នឹងណា»។
យ៉ាងណា ការតវ៉ាកាលពីព្រឹកថ្ងៃទី១៧ ខែវិច្ឆិកា ពុំមានការបង្ក្រាបដែលឈានទៅដល់ការអំពើហិង្សាកើតឡើងទេ។
សព្វថ្ងៃនេះ ប្រាក់ឈ្នួលគោលរបស់កម្មករក្នុងវិស័យកាត់ដេរទទួលបានចំនួន ១០០ដុល្លារក្នុងមួយខែ។ ការដំឡើងប្រាក់ឈ្នួលអប្បបរមាចំនួន ១២៨ដុល្លារសម្រាប់ឆ្នាំ២០១៥ នៅពេលនេះ គឺហាក់ផ្ទុយពីការរកឃើញដោយរដ្ឋាភិបាលកាលពីឆ្នាំ២០១២ ដែលកាលណោះរដ្ឋាភិបាលរកឃើញថា ប្រាក់ខែដែលកម្មករអាចរស់នៅបានសមរម្យ គឺនៅក្នុងចន្លោះពី ១៥៧ដុល្លារ ទៅ ១៧៧ដុល្លារក្នុងមួយខែ។
ដោយឡែកអនុប្រធានគណៈកម្មការប្រឹក្សាការងារ និងជាតំណាងឲ្យរោងចក្រ លោក ណាង សុធី ព្រមានថា បើប្រាក់ឈ្នួលរបស់កម្មករពិតជាត្រូវបានដំឡើងយ៉ាងគំហុកដូចនៅពេលនេះ រោងចក្រពី ៣០ ទៅ ៥០រោងចក្រ អាចនឹងត្រូវបិទទ្វារមិនដំណើរការ ហើយនឹងធ្វើឲ្យកម្មករយ៉ាងតិច ៥ម៉ឺននាក់គ្មានការងារធ្វើនៅឆ្នាំក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។