លោកនាយករដ្ឋមន្ត្រី ហ៊ុន សែន មានប្រសាសន៍នៅក្នុងកិច្ចប្រជុំគណៈរដ្ឋមន្ត្រីបំបូង នៅថ្ងៃទី២៥ ខែកញ្ញា នាវិមានសន្តិភាពថា រាជរដ្ឋាភិបាលគ្មានគោលការណ៍បិទហ្វេសប៊ុក នោះទេ។ ផ្ទុយទៅវិញ រដ្ឋាភិបាលបានលើកទឹកចិត្តឲ្យមនុស្សទូទៅប្រើបណ្ដាញសង្គម ហ្វេសប៊ុក ដើម្បីទាញយកផលប្រយោជន៍ផ្សេងៗពីបណ្ដាញសង្គមនេះ។
លោក ហ៊ុន សែន បញ្ជាក់ថា រដ្ឋាភិបាលគ្មានភាពចាំបាច់ណាមួយដែលរដ្ឋាភិបាលបិទហ្វេសប៊ុក មិនឲ្យប្រើប្រាស់ទេ ប៉ុន្តែលោកស្នើដល់អ្នកប្រើប្រាស់កុំប្រើប្រាស់ហ្វេសប៊ុក បង្កឲ្យមានអស្ថិរភាពនៅក្នុងសង្គមជាតិ។
ទោះយ៉ាងណា ប្រមុខដឹកនាំបានរិះគន់ចំពោះអ្នកប្រើប្រាស់ហ្វេសប៊ុក ខ្លះ ដែលកន្លងមកបានប្រើបណ្ដាញហ្វេសប៊ុក ប្រមាថព្រះមហាក្សត្រ។
យុវជន សាលេះ គ្រីយ៉ា ជានិស្សិតមកពីសាកលវិទ្យាល័យអន្តរជាតិ ឬហៅថា អាយ.យូ (IU) បានចាត់ទុកបណ្តាញសង្គម ហ្វេសប៊ុក ថាមានសារសំខាន់ដល់ប្រជាពលរដ្ឋគ្រប់រូប ពិសេសយុវជន ជុំវិញការធ្វើទំនាក់ទំនង និងផ្ដល់ព័ត៌មានឲ្យគ្នាបានទាន់ពេល។ យុវជនរូបនេះឲ្យដឹងថា យុវជន ឬនិស្សិតពេលសព្វថ្ងៃនេះ ពួកគេត្រូវការបណ្ដាញសង្គម ឬហ្វេសប៊ុក ចាំបាច់បំផុតសម្រាប់ធ្វើទំនាក់ទំនងផ្សេងៗជាមួយគ្នា។ ទន្ទឹមគ្នានេះ យុវជន គ្រីយ៉ា ក៏ទទួលស្គាល់ថា មានអ្នកប្រើប្រាស់បណ្ដាញសង្គមមួយចំនួនបានប្រើពាក្យពេចន៍គ្មានក្រមសីលធម៌ផងដែរ។
មិនខុសគ្នាទេ យុវជន អ៊ុយ សាមៀន បានស្នើទៅមេដឹកនាំគ្រប់គណបក្សនយោបាយ ទោះក្នុងកាលៈទេសៈណាក៏ដោយមិនត្រូវបិទបណ្ដាញសង្គម ហ្វេសប៊ុក នោះទេ ព្រោះហ្វេសប៊ុកនេះ បានដើរតួជាអ្នកនាំសារដ៏មានសារសំខាន់របស់ប្រជាពលរដ្ឋក្នុងការបញ្ចេញមតិ។
ចំណែកកញ្ញា ទិន លក្ខិណា ជានិស្សិតរៀននៅសកលវិទ្យាល័យន័រតុន (Norton) បានឲ្យដឹងថា រូបនាងក៏ជាអ្នកលេងហ្វេសប៊ុកម្នាក់ដែរ។ កញ្ញាឲ្យដឹងថា អ្នកប្រើប្រាស់ហ្វេសប៊ុក មានទាំងផលវិជ្ជមាននិងអវិជ្ជមាន។ ប៉ុន្តែកញ្ញាបានឲ្យតម្លៃបណ្ដាញសង្គមមួយនេះថា មានសារសំខាន់បំផុតសម្រាប់ក្រុមយុវជនសម័យបច្ចុប្បន្នសម្រាប់បញ្ចេញមតិ ឬទទួលបានព័ត៌មានផ្សេងៗបានឆាប់រហ័ស។
មិនខុសគ្នាទេ យុវជននិងយុវតីផ្សេងទៀតក៏បានគាំទ្រឲ្យមានបណ្ដាញសង្គមហ្វេសប៊ុក នៅក្នុងសង្គមកម្ពុជា សម្រាប់ទាក់ទងបញ្ហាផ្សេងៗជាមួយពិភពលោកនេះដែរ។
អ្នកស្រាវជ្រាវសង្គមបានឲ្យដឹងថា នៅក្នុងប្រទេសកម្ពុជា អាចមានអ្នកប្រើប្រាស់បណ្ដាញសង្គមហ្វេសប៊ុក ប្រមាណ ១លាននាក់សម្រាប់ធ្វើទំនាក់ទំនងគ្នាពេលបច្ចុប្បន្ន។
ទាក់ទិនបញ្ហានេះដែរ លោក វីល្លៀម ថត (William E. Todd) ឯកអគ្គរដ្ឋទូតសហរដ្ឋអាមេរិក មានប្រសាសន៍តាមរយៈអ្នកបកប្រែភាសាកាលពីថ្ងៃច័ន្ទ ទី៩ ខែកញ្ញា នាស្ថានទូតសហរដ្ឋអាមេរិក ក្នុងពិធីអបអរអ្នកចូលរួមក្នុងហ្វេសប៊ុក (Facebook) របស់ស្ថានទូត ឲ្យដឹងថា ហ្វេសប៊ុកស្ថានទូតសហរដ្ឋអាមេរិក មានអ្នកចូលលេងកើនចំនួនដល់ជាង ១សែននាក់ (១០០.០០០)។
ទំព័រហ្វេសប៊ុក របស់ស្ថានទូតអាមេរិក បានផ្តល់ឲ្យប្រជាជនកម្ពុជា នូវឱកាសអាចទាក់ទងដោយផ្ទាល់ជាមួយស្ថានទូតអាមេរិក ដោយទទួលបានព័ត៌មានថ្មីៗ ស្តីពីព្រឹត្តិការណ៍ កម្មវិធី និងឱកាសនានា និងដោយសរសេរមតិ និងសំណួរស្ដីពីរឿងដែលគេមានការចាប់អារម្មណ៍។
ទំព័រហ្វេសប៊ុកនេះ ថែមទាំងធ្វើជាវេទិកាមួយសម្រាប់ឲ្យប្រជាជនកម្ពុជា លើកឡើងនូវបញ្ហាផ្សេងៗជាមួយស្ថានទូតសហរដ្ឋអាមេរិក ដោយផ្ទាល់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។