ក្រសួងវប្បធម៌ និងវិចិត្រសិល្បៈ បានអំពាវនាវឲ្យយុវជនកម្ពុជា កុំប្រព្រឹត្តទង្វើខុសឆ្គង ឬភ្លើតភ្លើននៅក្នុងថ្ងៃ "ទិវានៃក្ដីស្រឡាញ់ ១៤ កុម្ភៈ" ដែលជាការជាន់ឈ្លីធ្ងន់ធ្ងរដល់វប្បធម៌ ប្រពៃណី និងទំនៀមទម្លាប់របស់ជាតិខ្មែរ។ ចំណែកឯសង្គមស៊ីវិលដែលធ្វើការពាក់ព័ន្ធនឹងយុវជន និងស្ត្រីយល់ថា វិធានការនេះ គ្រាន់តែធ្វើអោយល្អមើល និងហាក់ដូចជាយឺតយ៉ាវពេកនៅឡើយ។
ក្រសួងវប្បធម៌ និងវិចិត្រសិល្បៈ យល់ថា យុវវ័យនៅយល់ច្រឡំទៅលើអត្ថន័យនៃថ្ងៃបុណ្យនៃក្ដីស្រឡាញ់ ដែលពួកគេនិយមហៅថា ជាថ្ងៃបុណ្យសង្សារនោះ ថាជាការភ្លើតភ្លើនភ្លេចខ្លួន ឆ្លក់វង្វេង និងបានជ្រួលជ្រើមខ្លាំង ភ្លេចគិតពីអនាគត និងការរៀនសូត្រ។
នៅក្នុងសេចក្ដីអំពាវនាវរបស់ក្រសួងវប្បធម៌ និងវិចិត្រសិល្បៈ ដែលបានផ្សព្វផ្សាយនៅថ្ងៃទី១៣ ខែកុម្ភៈ លើកឡើងថា ទិវានៃក្ដីស្រឡាញ់នៅកម្ពុជា គួរជាឱកាសនៃការចែកចាយ និងធានាថា ក្ដីស្រឡាញ់ដ៏ទូលំទូលាយមួយត្រូវបានធ្វើឡើងក្នុងសន្តានចិត្តដ៏ស្មោះសរចំពោះមនុស្សដែលនៅជុំវិញខ្លួន មានជាអាទិ៍ ក្រុមគ្រួសារ ឪពុកម្ដាយ ប្ដីប្រពន្ធ កូនចៅ និងចំពោះអ្នកដែលនៅក្នុងសង្គមជាមួយគ្នា ដូចជាជនពិការ កុមារកំព្រា និងអ្នកដែលខ្សត់ខ្សោយជាងខ្លួន។
ក្រៅពីអំពាវនាវឲ្យយុវជនកុំឲ្យភ្លើតភ្លើនខុសឆ្គង ក្រសួងក៏អំពាវដល់អាណាព្យាបាល សមត្ថកិច្ចគ្រប់ជាន់ថ្នាក់ ត្រូវចូលរួមដាក់ចេញនូវវិធានការនានា ដើម្បីទប់ស្កាត់ទង្វើខុសឆ្គងរបស់យុវជន ដែលបានប្រព្រឹត្តនៅក្នុងថ្ងៃ "ទិវានៃក្ដីស្រឡាញ់ ១៤ កុម្ភៈ" នេះ។
ទាក់ទិននឹងទិវានេះដែរ ក្រសួងអប់រំយុវជន និងកីឡា ក៏បានអំពាវនាវឲ្យយុវវ័យកុំភ្លើតភ្លើនភ្លេចការសិក្សា បាត់បង់កិត្តិយស សេចក្ដីថ្លៃថ្នូររបស់ខ្លួន និងគ្រួសារផងដែរ ប្រាសចាកវប្បធម៌ និងប្រពៃណីជាតិដ៏ផូរផង់របស់ខ្មែរទៀតផង។ ជាងនេះទៀត ក្រសួងក៏បានបញ្ជាក់ឲ្យគ្រឹះស្ថានសាធារណៈ និងឯកជន ត្រូវតែរឹតបន្តឹងឲ្យបានម៉ឺងម៉ាត់នៅក្នុងទិវានេះ។
ករណីនេះត្រូវបាននាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា អ្នកស្រី រស់ សុភាព យល់ថា វិធានការនេះមិនសូវមានប្រសិទ្ធភាពនោះទេ ព្រោះគ្រាន់តែរត់តាមបញ្ហាប៉ុណ្ណោះ មិនមែនមានឆន្ទៈគ្រប់គ្រាន់ក្នុងការដោះស្រាយបញ្ហាប៉ុណ្ណោះ។ អ្នកស្រីយល់ថា វិធានការដែលមានប្រសិទ្ធភាព រដ្ឋាភិបាល និងក្រសួងពាក់ព័ន្ធគួរកសាងសមត្ថភាព និងអប់រំយុវជនចាប់ពីថ្នាក់ក្រោម៖ «ក្នុងនាមរដ្ឋាភិបាលគួរតែគិតមុន ដោយដោះស្រាយបញ្ហាមុនសភាពការណ៍ ជាជាងធ្វើការព្យាបាលវា។ ខ្ញុំគិតថា មានប្រសិទ្ធភាពមែន តែវាយឺតពេលទៅហើយ អ៊ីចឹងមានតែអប់រំ ប្រុស និងស្ត្រី ពីភាពជាម្ចាស់ការរបស់គាត់ទៅវិញទេ»។
ទន្ទឹមគ្នានេះ នាយកអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ដែរថា ការអំពាវនេះ គ្រាន់តែជាចេតនានយោបាយ។ លោកថា វិធានការនេះគួរតែបានផ្សព្វផ្សាយតាំងពី ១ខែមុន មិនមែនមុនមួយថ្ងៃទើបផ្សព្វផ្សាយនោះទេ។ លោកថា ក្រសួងគួរតែចាត់វិធានការចំពោះម្ចាស់ផ្ទះសំណាក់ និងសណ្ឋាគារ ទើបមានប្រសិទ្ធភាពជាង៖ «នេះគ្រាន់តែចេតនានយោបាយ និងគ្រាន់តែជាការឃោសនាមួយ ដែលមិនសូវមានប្រសិទ្ធភាពប៉ុន្មាននោះទេ។ យើងចង់ឲ្យរដ្ឋាភិបាលពង្រឹងឲ្យមានការចូលរួមពីបណ្ដាអ្នក ពាក់ព័ន្ធ ក្នុងនោះមានម្ចាស់ផ្ទះសំណាក់ និងសណ្ឋាគារទៅវិញទើបល្អ ធ្វើយ៉ាងឲ្យម្ចាស់ផ្ទះសំណាក់ និងសណ្ឋាគារទាំងផ្ដល់សារអប់រំល្អជួយដល់យុវជន ទើបអាចកាត់បន្ថយការខុសឆ្គងបានខ្លះ»។
ទិវាបុណ្យនៃក្ដីស្រឡាញ់ ១៤ កុម្ភៈ ពិតមែនតែមានការព្រួយបារម្ភចំពោះភាពភ្លើតភ្លើនរបស់យុវវ័យនៅថ្ងៃបុណ្យនៃក្ដីស្រឡាញ់ក៏ដោយ ក៏នៅតែមិនមានស្ថាប័នណាមួយមានតួលេខជាក់លាក់ថា ក្នុងថ្ងៃបុណ្យនៃក្ដីស្រឡាញ់នោះមានបុរស ឬនារីប៉ុន្មាននាក់ដែលបានបាត់បង់ភាពបរិសុទ្ធនោះនៅឡើយ។
ដោយមើលឃើញពីបញ្ហានេះ ក្រៅពីក្រសួងអប់រំ និងក្រសួងវប្បធម៌ នៅថ្ងៃទី១៤ កុម្ភៈ បណ្ដាក្រុមហ៊ុនឯកជនមួយចំនួននៅកម្ពុជា បានសហការជាមួយគណៈកម្មាធិការជាតិអូឡាំពិកកម្ពុជា នឹងរៀបចំពិធីរត់ប្រណាំងដើម្បីក្ដីស្រឡាញ់នៅកោះពេជ្រ ដើម្បីប្រមូលថវិកាពីកម្មវិធីនេះ សម្រាប់ជួយដល់ស្ត្រីក្រីក្រនៅទីជនបទ។
ចំណែកមជ្ឈមណ្ឌលជាតិផ្ដល់ឈាមក៏រៀបចំការជួបជុំនិស្សិតពីតាមបណ្ដាសាកលវិទ្យាល័យនានា អោយចូលរួមផ្ដល់ឈាមនៅមជ្ឈមណ្ឌលនេះ នៅព្រឹកថ្ងៃទី១៤ ខែកុម្ភៈ។ ជាងនេះទៀត ក្រុមអង្គការសង្គមស៊ីវិលក៏រៀបចំយុទ្ធនាការមួយរយកោដិសំឡេងនៅកម្ពុជា ដើម្បីចូលរួមបញ្ចប់អំពើហិង្សាលើស្ត្រី និងកុមារ នៅពហុកីឡាដ្ឋានជាតិអូឡាំពិក និងសាកវិទ្យាល័យភូមិន្ទភ្នំពេញ។
ក្រុមអង្គការសង្គមស៊ីវិល និងបណ្ដាក្រុមហ៊ុនទាំងនេះ យល់ថា សកម្មភាពនេះ នឹងជួយបង្វែរការចាប់អារម្មណ៍របស់យុវជនឲ្យគេចចេញពីទង្វើភ្លើនភ្លើននានា ដើម្បីជាប្រយោជន៍ដល់សង្គមជាតិ ជាជាងការជូនដំណឹង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។