កម្មកររោងចក្រហ្រ្គេនធ្វីន (Grand Twins) ប្រមាណ ៣.០០០នាក់ បិទផ្លូវជាតិលេខ៤ បំណងសុំអោយក្រុមហ៊ុនផ្ដល់ប្រាក់ថ្លៃបាយ ទូទាត់សំណង និងផ្លាស់ប្ដូរលក្ខខណ្ឌការងារចំនួនជាង ១០ចំណុច។
ផ្លូវជាតិលេខ៤ ត្រង់ចំណុចមុខវិទ្យាល័យជម្ពូវ័ន ឋិតក្នុងសង្កាត់ចោមចៅ ខណ្ឌពោធិ៍សែនជ័យ ត្រូវកកស្ទះមួយរយៈពេល កាលពីព្រឹកម៉ោង១០ ថ្ងៃទី២៤ ខែតុលា។ ប៉ុន្តែក្រុមកម្មករ បានសម្រេចបើកផ្លូវភ្លាមៗដែរ នៅពេលដែលអាជ្ញាធរសង្កាត់ចោមចៅ ព្យាយាមសម្របសម្រួលអោយកម្មកររង់ចាំដោះស្រាយជាមួយក្រុមហ៊ុន។
ក្រុមកម្មករអះអាងប្រហាក់ប្រហែលគ្នាថា ពួកគេទាមទារប្រាក់ថ្លៃបាយប្រចាំថ្ងៃចំនួន ២.០០០រៀល និងបន្ថែម ១.០០០រៀលទៀតពេលថែមម៉ោង។ ស្របគ្នានេះ កម្មករទាមទារអោយរោងចក្រទូទាត់សំណងចាស់អោយកម្មករ គឺសំណងដែលរោងចក្របានប្ដូរឈ្មោះពីរោងចក្រ ឃ្យូអិមអាយ (QMI) មកជារោងចក្រ ហ្រ្គេនធ្វីន ដោយពុំបានផ្ដល់សំណងដល់កម្មករ រួមនិងលក្ខខណ្ឌការងារមួយចំនួនទៀត។
តំណាងសហព័ន្ធសហជីពសំឡេងកម្មករកម្ពុជា លោក ឃិន ណាំហោ មានប្រសាសន៍ថា កម្មករទាំងអស់នឹងបន្តការតវ៉ាទៀតរហូតមានដំណោះស្រាយ៖ «ការធ្វើកូដកម្មហ្នឹង អត់មានអីគួរកត់សម្គាល់ គឺអត់ទាន់មានការដោះស្រាយ ទើបប្រកាសអោយកម្មកររំសាយសម្រាកសិន ហើយស្អែកយើងបន្តតវ៉ាទៀត»។
ក្រុមកម្មករនៃរោងចក្រ ហ្រ្គេនធ្វីន បានតវ៉ាសុំកែប្រែលក្ខខណ្ឌការងារនេះមានរយៈពេល ៤ថ្ងៃមកហើយ ប៉ុន្តែនៅពុំទាន់បានការឆ្លើយតបថាយ៉ាងណាពីភាគីរោងចក្រនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។