ប៉ូលិសប៉ុស្តិ៍រដ្ឋបាលឃុំខ្ចាស់ នៃស្រុកសូទ្រនិគម កំពុងស៊ើបអង្កេតរកមុខអ្នកពាក់ព័ន្ធក្នុងការដាក់បង្កៃគ្រាប់បែកដៃ ១គ្រាប់ ដើម្បីប៉ុនប៉ងសម្លាប់សកម្មជនគណបក្សសង្គ្រោះជាតិ ម្នាក់។
ការស៊ើបអង្កេតនេះ ធ្វើឡើងបន្ទាប់ពីគេប្រទះឃើញគ្រាប់បែកដៃ ១គ្រាប់ផលិតនៅប្រទេសចិន ត្រូវជនមិនស្គាល់មុខលួចដាក់បង្កៃនៅលើទូករបស់សកម្មជននៃគណបក្សសង្គ្រោះជាតិ ម្នាក់ ដែលដាក់ទុកចោលនៅតំបន់ព្រៃលិចទឹកសម្រាប់នេសាទត្រី។
មន្ត្រីប៉ូលិសឃុំខ្ចាស់ មួយរូប ដែលទៅពិនិត្យហេតុការណ៍មានប្រសាសន៍កាលពីព្រឹកថ្ងៃសុក្រ ទី៦ ខែកុម្ភៈ ថា គ្រាប់បែកដៃដែលជនមិនស្គាល់មុខដាក់បង្កៃលើទូក ដោយមានចងខ្សែអំបោះនោះ គឺពិតជាគម្រោងប៉ុនប៉ងធ្វើឃាតមនុស្ស ពីព្រោះនៅតំបន់នោះពុំដែលមានគ្រាប់ដែលនៅសេសសល់ពីសម័យសង្គ្រាមទេ៖ «កន្លែងនោះមិនដែលមានគ្រាប់សេសសល់ពីសង្គ្រាមទេ ទាល់តែគេដាក់បានមាន។ កន្លងមកមិនដឹងថាគាត់មានរឿងនឹងអ្នកណា ប៉ុន្តែតាមការស្រាវជ្រាវ គាត់មិនដែលមានទំនាស់ជាមួយអ្នកណាទេ»។
លោក កុយ សារៀន អាយុ ៦៣ឆ្នាំនៅភូមិយាងទេស ឃុំខ្ចាស់ គឺជាសកម្មជនគណបក្សសង្គ្រោះជាតិ ប្រចាំឃុំនោះអះអាងថា លោកបានប្រទះឃើញគ្រាប់បែកដៃ ១គ្រាប់ ដែលជនមិនស្គាល់មុខលួចបង្កៃក្នុងទូករបស់លោក កាលពីវេលាម៉ោង ៣រសៀលថ្ងៃទី៥ ខែកុម្ភៈ កន្លងទៅ នៅពេលលោករុញទូកបម្រុងចេញទៅនេសាទត្រី។ លោក កុយ សារៀន បញ្ជាក់ថា លោកមិនដែលមានទំនាស់ជាមួយអ្នកណាទេ ក៏ប៉ុន្តែលោកមានអតីតភាពជាសកម្មជនគណបក្សប្រជាជនកម្ពុជា នៅក្នុងសហគមន៍នេសាទប្រចាំភូមិ ហើយលោកទើបតែចាកចេញទៅចូលរួមជាមួយគណបក្សសង្គ្រោះជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។