អ្នកជំនាញវិជ្ជាជីវៈសារព័ត៌មានបានអំពាវនាវទៅដល់មន្ត្រីដឹកនាំក្រសួងមហាផ្ទៃ និងស្ថាប័នពាក់ព័ន្ធឲ្យចាត់វិធានការចំពោះនាយការិយាល័យនគរបាលការពារ និងអន្តរាគមន៍នៃស្នងការដ្ឋាននគរបាលខេត្តព្រះសីហនុ ដែលយកតួនាទីទៅគំរាមអ្នកយកព័ត៌មានទូរទស្សន៍ ស៊ី.ធី.អិន (CTN) ពេលចុះបំពេញការងាររបស់ខ្លួន។
ចំពោះរឿងនេះ លោក ខៀវ សុភ័គ មន្ត្រីនាំពាក្យក្រសួងមហាផ្ទៃ ថ្លែងថា នឹងពិនិត្យបញ្ហានេះ ហើយស្នើឲ្យមន្ត្រីប៉ូលិសគ្រប់ៗរូប ត្រូវអនុវត្តការងារឲ្យស្របតាមតួនាទី និងមិនត្រូវមានជម្លោះជាមួយអ្នកកាសែតទេ ព្រោះអាចនាំឲ្យមានរឿងអាស្រូវចំពោះខ្លួនធ្ងន់ធ្ងរ។
នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន លោក មឿន ឈានណារិទ្ធ សម្តែងការព្រួយបារម្ភដែលលោក ភ័ក្រ ភិរម្យ នាយការិយាល័យនគរបាលការពារ និងអន្តរាគមន៍នៃស្នងការដ្ឋាននគរបាលខេត្តព្រះសីហនុ បានយកតួនាទីទៅគំរាមអ្នកយកព័ត៌មានទូរទស្សន៍ ស៊ី.ធី.អិន ប្រចាំខេត្តព្រះសីហនុ។
សារអំពាវនាវរបស់អ្នកជំនាញព័ត៌មានរូបនេះ កើតឡើងក្រោយពេលលោក តិល សាមុត អ្នកយកព័ត៌មានទូរទស្សន៍ ស៊ី.ធី.អិន ប្រចាំខេត្តព្រះសីហនុ ត្រូវបានលោក ភ័ក្រ ភិរម្យ ប្រើកាយវិការ និងពាក្យសម្តីគំរាម នៅពេលរូបលោកចុះយកព័ត៌មានអំពីពលរដ្ឋរស់នៅសង្កាត់លេខ១ ធ្វើបាតុកម្មតវ៉ាបិទផ្លូវជាតិលេខ ៤ ប្រឆាំងអាជ្ញាធររុះរើផ្ទះចេញពីតំបន់ក្បាលឆាយ។
ផ្តើមពីបញ្ហានេះ លោក មឿន ឈានណារិទ្ធ បាទទទូចដល់លោក ស ខេង រដ្ឋមន្ត្រីក្រសួងមហាផ្ទៃ និងមន្ត្រីពាក់ព័ន្ធ ត្រូវតែពិនិត្យចំពោះសកម្មភាពមិនប្រក្រតីដែលលោក ភ័ក្រ ភិរម្យ មានអត្តលេខ ០៨៣០១ យកតួនាទីគំរាមទៅលើអ្នកកាសែត។
អ្នកយកព័ត៌មានទូរទស្សន៍ ស៊ី.ធី.អិន ប្រចាំខេត្តព្រះសីហនុ លោក តិល សាមុត បានអះអាងប្រាប់វិទ្យុអាស៊ីសេរីថា បានត្រៀមឯកសារប្តឹងលោក ភ័ក្រ ភិរម្យ ទៅកាន់ស្នងការនគរបាលខេត្តព្រះសីហនុ ដែលមន្ត្រីរូបនេះបានប្រើកាយវិការ និងពាក្យសម្តីគំរាមរូបលោកពេលចុះបំពេញការងារកាលពីថ្ងៃទី១ ខែវិច្ឆិកា ឆ្នាំ២០១៤។
បញ្ហានេះ លោកស្នើដល់លោក ស៊ាង កុសល ស្នងការនគរបាលខេត្តព្រះសីហនុ និងមន្ត្រីក្រសួងមហាផ្ទៃ ឲ្យមានវិធានការរដ្ឋបាល ឬឈានដល់ព្យួរតួនាទីលោក ភ័ក្រ ភិរម្យ ចំពោះការប្រើប្រាស់កាយវិការមិនបានសមរម្យក្នុងនាមជាមន្ត្រីអនុវត្តច្បាប់មួយរូប។
លោក ភ័ក្រ ភិរម្យ នាយការិយាល័យនគរបាលការពារ និងអន្តរាគមន៍នៃស្នងការដ្ឋាននគរបាលខេត្តព្រះសីហនុ បានច្រានចោលការចោទប្រកាន់របស់លោក តិល សាមុត អ្នកយកព័ត៌មានទូរទស្សន៍ ស៊ី.ធី.អិន និងចាត់ទុកអ្នកសារព័ត៌មានរូបនេះថាមិនមានវិជ្ជាជីវៈត្រឹមត្រូវ។ ចំណែក លោក ស៊ាង កុសល ស្នងការនគរបាលខេត្តព្រះសីហនុ មិនធ្វើអត្ថាធិប្បាយជុំវិញបញ្ហានេះទេ ដោយនិយាយខ្លីថាជាប់រវល់ប្រជុំ។
នាយកកម្មវិធីផ្សាយព័ត៌មានស្ថានីយទូរទស្សន៍ ស៊ី.ធី.អិន លោក នូវ សម្ផស្ស មានប្រសាសន៍ថា កំពុងពិនិត្យលើករណីដែលលោក ភ័ក្រ ភិរម្យ គំរាមកំហែង ឬការយកតួនាទីយកទៅប្រើប្រាស់មិនបានសមរម្យក្នុងនាមជាមន្ត្រីអនុវត្តច្បាប់មួយរូប។
ទាក់ទិនបញ្ហានេះ លោក ខៀវ សុភ័គ មន្ត្រីនាំពាក្យក្រសួងមហាផ្ទៃ មានប្រសាសន៍ថា លោកមិនទាន់បានដឹងរឿង លោក ភ័ក្រ ភិរម្យ នាយការិយាល័យនគរបាលការពារ និងអន្តរាគមន៍នៃស្នងការដ្ឋាននគរបាលខេត្តព្រះសីហនុនេះទេ។ ប៉ុន្តែលោកថា កងកម្លាំងគ្រប់រូបមិនគួរទៅមានជម្លោះជាមួយអ្នកកាសែតទេ ព្រោះនាំឲ្យចង្រៃដល់សកម្មភាពការងាររបស់ខ្លួន។
លោកសង្កត់ធ្ងន់ដល់ស្នងការដ្ឋាននគរបាលខេត្តព្រះសីហនុ ថាត្រូវសម្របសម្រួលបញ្ហាដែលកើតមានរវាងអ្នកកាសែត និងមន្ត្រីប៉ូលិសខេត្តព្រះសីហនុ ដោយស្មារតីទទួលខុសត្រូវខ្ពស់។ បញ្ហានេះដែរ សហព័ន្ធអ្នកកាសែតអន្តរជាតិ ហៅកាត់ថា អាយ.អេហ្វ.ជេ (IFJ) និងសហជីពអ្នកកាសែតអាស៊ី-អាគ្នេយ៍ ហៅកាត់ថា ស៊ីជូ (SEAJU) បានរួមគ្នាអំពាវនាវដល់រាជរដ្ឋាភិបាលកម្ពុជា ឱ្យបញ្ចប់និទណ្ឌភាព និងបន្តជំរុញការរកយុត្តិធម៌ជូនអ្នកកាសែតដែលគេសម្លាប់នៅក្នុងឆ្នាំ២០១៤ នេះ។
ការអំពាវនាវនេះ ធ្វើឡើងចំពេលដែលអង្គការសហប្រជាជាតិសម្ពោធទិវាអន្តរជាតិបញ្ចប់និទណ្ឌភាពចំពោះឧក្រិដ្ឋកម្មប្រឆាំងអ្នកកាសែត កាលពីថ្ងៃទី២ វិច្ឆិកា ឆ្នាំ២០១៤។
ក្នុងឱកាសសម្ពោធទិវាអន្តរជាតិជាលើកដំបូងនេះ សហព័ន្ធនិងសហជីពអ្នកកាសែតទាំងពីរចេញសេចក្ដីប្រកាសព័ត៌មានរបស់ខ្លួនមួយ ដោយសរសេរថា គ្មានជនល្មើសណាមួយត្រូវបាននាំខ្លួនមកផ្ដន្ទាទោសចំពោះអំពើសម្លាប់ទាំងនោះនៅឡើយទេ។ សហព័ន្ធនិងសហភាពទាំងពីរទទូចសុំឱ្យរដ្ឋាភិបាលកម្ពុជា បញ្ចេញសារខ្លាំងក្លាមួយថា នឹងមិនអត់ឱនចំពោះអ្នកប្រព្រឹត្តឱ្យមានការសម្លាប់ទាំងនេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។