ប្រមុខដឹកនាំរដ្ឋាភិបាលកម្ពុជា ប្រកាសថ្កោលទោសចំពោះសកម្មភាពរបស់ក្រុមឥស្លាម នៃអ៊ីរ៉ាក់ និងស៊ីរី ដែលហៅថា អាយស៊ីស (ISIS = Islamic State of Iraq and Syria) ដែលបានសម្លាប់អ្នកកាសែតសហរដ្ឋអាមេរិក ម្នាក់ឈ្មោះ ជេម ហ្វូលី (James Foley) កាលពីថ្ងៃទី២០ ខែសីហា នៅក្នុងប្រទេសអ៊ីរ៉ាក់។
លោកនាយករដ្ឋមន្ត្រី ហ៊ុន សែន ក៏បានអំពាវនាវឲ្យមេដឹកនាំនៅទូទាំងពិភពលោក ត្រូវចូលរួមថ្កោលទោសចំពោះឃាតកម្មនេះឲ្យបានធ្ងន់ធ្ងរ។ ព្រមគ្នានេះ លោក ហ៊ុន សែន ក៏សម្ដែងការសោកស្ដាយ និងចូលរួមរំលែកទុក្ខជាមួយក្រុមគ្រួសារសពអ្នកកាសែតអាមេរិករូបនេះ។
លោក ហ៊ុន សែន៖ «បើកទូរទស្សន៍ស៊ី.អ៊ិន.អ៊ិន (CNN) វាចេញរឿងកាត់កអ្នកកាសែតនៅប្រទេសអ៊ីរ៉ាក់។ នេះជារឿងមួយធ្ងន់ធ្ងរណាស់។ ខ្ញុំសូមយកឱកាសនេះចូលរួមជាមួយលោកប្រធានាធិបតី បារ៉ាក់ អូបាម៉ា (Barack Obama) ចូលរួមជាមួយប្រជាជនអាមេរិក ក៏ដូចជាចូលរួមជាមួយប្រជាជន ដែលស្នេហាសន្តិភាពនៅលើពិភពលោកទាំងអស់ ថ្កោលទោសចំពោះអំពើឃោរឃៅរបស់ពួកអាយស៊ីស និងចូលរួមរំលែកទុក្ខចំពោះគ្រួសារ លោក ជេម ហ្វូលី។ អំពើនេះជាព្រៃផ្សៃពេក»។
លោក ជេម ហ្វូលី អ្នកកាសែតអាមេរិក ត្រូវក្រុមឧទ្ទាមឥស្លាម ចាប់ខ្លួននៅក្នុងប្រទេសស៊ីរី កាលពីឆ្នាំ២០១២។ ហើយទើបត្រូវក្រុមឧទ្ទាមឥស្លាមនិយមអាយស៊ីស បង្ហាញវីដេអូឃ្លីបកាត់ក្បាលនៅតាមបណ្ដាញផ្សព្វផ្សាយសង្គម កាលពីថ្ងៃពុធ ទី២០ ខែសីហា ដែលបង្កឲ្យមានការភ្ញាក់ផ្អើលជាថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។