ក្រុមអ្នកតាមដានសង្គមរិះគន់ការប្រកាសរបស់លោក ហ៊ុន សែន ដែលសន្យាថា នឹងដំឡើងប្រាក់ខែបន្ថែមទៀតឲ្យប្រពន្ធ និងកូនរបស់មន្ត្រីរាជការ ព្រមទាំងកងកម្លាំងប្រដាប់អាវុធ។ លោកនាយករដ្ឋមន្ត្រីបានប្ដេជ្ញាថា ការដំឡើងប្រាប់ខែទៅឲ្យប្រពន្ធ និងកូនមន្ត្រីរាជការនេះ រដ្ឋាភិបាលសន្យាថា បើមិនអាចដំណើរការបានក្នុងឆ្នាំ២០១៦ នេះទេ នៅឆ្នាំ២០១៧ ខាងមុខ នឹងត្រូវអនុវត្តឲ្យបាន។
ថ្វីបើលោក ហ៊ុន សែន បានប្ដេជ្ញាចិត្តរួចហើយថា រដ្ឋាភិបាលរបស់លោកនឹងផ្ដល់ប្រាក់ខែសម្រាប់ប្រពន្ធ និងកូនរបស់កងកម្លាំងប្រដាប់អាវុធ រួមទាំងមន្ត្រីរាជការផង បញ្ហានេះត្រូវបានក្រុមអ្នកឃ្លាំមើលសង្គមយល់ឃើញថា នេះជាការសម្រេចចិត្តតាមបែបចាប់ច្រវាសម្លឹងត្រើយ ក្នុងហេតុផលដើម្បីចំណេញនយោបាយ ខណៈការបោះឆ្នោតជ្រើសរើសក្រុមប្រឹក្សាឃុំសង្កាត់ និងបោះឆ្នោតជាតិ កាន់តែខិតជិតមកដល់។
នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ហៅការដាក់ចេញយុទ្ធសាស្ត្រថ្មីរបស់លោក ហ៊ុន សែន នេះថា មិនខុសពីអនុវត្តគោលនយោបាយតាមបែបដំណើរគីង្គក់នោះឡើយ។
លោកបន្តថា អ្វីដែលលោក ហ៊ុន សែន ធ្វើសេចក្ដីសម្រេចនៅពេលនេះ ដែលសន្យាថា នឹងប្រឹងប្រែងក្នុងការផ្ដល់ប្រាក់ខែសម្រាប់ប្រពន្ធ និងកូនមន្ត្រីរាជការ រួមទាំងកងកម្លាំងប្រដាប់អាវុធទៀតនោះ វាគឺជាយុទ្ធសាស្ត្រនយោបាយសុទ្ធសាធ៖ «ជាផែនការសម្រាប់២០១៧ ហ្នឹង កុំវាក្លាយជារបៀបវារៈមួយសម្រាប់ឆ្នាំ២០១៨ទៀត។ អ៊ីចឹងបើគិតថា ឡើងឲ្យបានគ្រប់គ្រាន់សម្រាប់តម្រូវការមន្ត្រីរាជការហ្នឹង គួរធ្វើឲ្យបានចប់សព្វគ្រប់នៅឆ្នាំ២០១៧ ហ្នឹងទៅ។ វាប្រសើរជាជាងដើមឆ្នាំ២០១៨»។
ទាក់ទិនការសន្យារបស់លោកនាយករដ្ឋមន្ត្រីនេះ លោក ហ៊ុន សែន នៅពុំទាន់អាចបញ្ជាក់អំពីទំហំទឹកប្រាក់ក្នុងការដំឡើងកាំប្រាក់បន្ថែមលើប្រាក់ខែមន្ត្រីរាជការ និងកម្លាំងប្រដាប់អាវុធដែលមានស្រាប់ចំនួនប៉ុន្មានទៀតនៅឡើយទេ។ លោកបញ្ជាក់ថា ត្រូវរង់ចាំការពិគ្រោះយោបល់ជាមួយក្រសួងសេដ្ឋកិច្ច និងមុខងារសាធារណៈឲ្យបានល្អិតល្អន់បន្ថែមទៀតសិន។ក្រៅពីនេះ លោកនាយករដ្ឋមន្ត្រីមានប្រសាសន៍ថា ចំពោះប្រាក់ខែក្របខ័ណ្ឌមន្ត្រីរាជការវិញ អាចនឹងឡើងបានខ្ពស់នៅក្នុងខែមេសា ខាងមុខនេះហើយដែរ។
លោក សន ជ័យ បន្ថែមទៀតថា តាមពិតរដ្ឋាភិបាលតាមរយៈរដ្ឋសភាបានអនុវត្តច្បាប់គ្រប់គ្រងថវិកាជាតិ សម្រាប់ឆ្នាំ២០១៦ រួចហើយ។ ហេតុនេះ មិនចាំបាច់អ្វីដែលរដ្ឋាភិបាលសម្រេចដំឡើងប្រាក់ខែដល់ប្រពន្ធ កូនមន្ត្រីរាជការ និងកងកម្លាំងប្រដាប់អាវុធមួយជាន់ទៀតនោះទេ។ ម្យ៉ាងលោក ហ៊ុន សែន គួរបូករួមឲ្យហើយស្រេចក្នុងកញ្ចប់ថវិកាជាតិតែម្ដង គឺចប់បញ្ហាទៅហើយ បើសិនមានចេតនាគិតគូរក្នុងការដំឡើងប្រាក់ខែដូច្នេះមែន។
ច្បាប់គ្រប់គ្រងថវិកាជាតិសម្រាប់ឆ្នាំ២០១៦ ត្រូវបានរដ្ឋសភាអនុវត្តក្នុងការចំណាយប្រចាំឆ្នាំប្រមាណជាង ១៧លានលានរៀល ឬស្មើប្រមាណជាង ៤.២០០លានដុល្លារអាមេរិក ដែលបែងចែកទៅតាមស្ថាប័ននីមួយៗ។
ការថ្លែងដូចនេះរបស់លោក ហ៊ុន សែន ធ្វើឡើងក្នុងពេលដែលលោកចូលរួមទិវាសិទ្ធិសិទ្ធិនារីអន្តរជាតិ នៅវិមានសន្តិភាព នៅថ្ងៃទី៨ ខែមីនា។ លោកនាយករដ្ឋមន្ត្រីបានសន្យាថា ការដំឡើងប្រាក់ខែនេះ យ៉ាងយូរនឹងចេញនៅឆ្នាំ២០១៧ ខាងមុខនេះហើយ។
លោក ហ៊ុន សែន បន្តថា៖ «ដោយសារឆ្នាំនេះយើងបានខិតខំបង្កើនហើយយើងវិភាគថវិការួចស្រេចទៅហើយ។ ក៏ប៉ុន្តែខ្ញុំសង្ឃឹមថា យ៉ាងណាក៏ដោយ បើទោះបីជាមិនអាចបង្កើតបានដំឡើងជាបៀវត្សបានសម្រាប់ភរិយារបស់មន្ត្រីរាជការ កងកម្លាំងប្រដាប់អាវុធ និងកូនក៏អាចមានចំណែកខ្លះនៅក្នុងពេលភ្ជុំជាដើម ដើម្បីជាកាដូរសម្រាប់ភរិយារបស់ស្ត្រី និងកូនមន្ត្រីរាជការ និងកងកម្លាំងប្រដាប់អាវុធរបស់យើង»។
បៀវត្សមន្ត្រីរាជការដែលជាមន្ត្រីជាប់កិច្ចសន្យា ក្រុមប្រឹក្សា រាជធានី ខណ្ឌ ក្នុងនោះ ចៅសង្កាត់ ៧៥ម៉ឺនរៀល។ ចៅសង្កាត់រង ៥៥ម៉ឺនរៀល និងក្រុមប្រឹក្សាចំនួន ៤៨ម៉ឺនរៀល។ដោយឡែកសម្រាប់មន្ត្រីនគរបាល និងគ្រូបង្រៀន កងកម្លាំងប្រដាប់អាវុធផ្សេងទៀត ប្រាក់ខែជាមធ្យម បូករួមទាំងប្រាក់បំណាចមួយចំនួនផង ក្នុងមួយខែប្រមាណ ៨០ម៉ឺននាក់។ ទន្ទឹមនឹងនោះ ចំពោះកូន និងប្រពន្ធរបស់ក្របខ័ណ្ឌមន្ត្រីរាជការ ទទួលបានប្រាក់បំណាច់ប្រចាំខែចន្លោះពី ៥ ទៅ ៦ពាន់រៀល ក្នុងមួយខែ។
មន្ត្រីនាំពាក្យគណបក្សសង្គ្រោះជាតិលោក យឹម សុវណ្ណ ថ្លែងកាលពីថ្ងៃទី៦ ខែមីនា ថា អ្វីដែលរដ្ឋាភិបាលព្យាយាមកែទម្រង់នៅពេលនេះ គឺជាលទ្ធផលពីការតស៊ូមតិរបស់អ្នកប្រជាធិបតេយ្យ ជាពិសេសឥទ្ធិពលរបស់បក្សប្រឆាំង៖ «ឆន្ទៈប្រជាពលរដ្ឋក្រោយឆ្នាំ២០១៣ បានបង្ខំឲ្យគណបក្សកាន់អំណាចដែលពីមុននេះ ធ្វើព្រងើយកន្តើយទៅលើបញ្ហាជាតិសំខាន់ៗ បែរមកធ្វើការកែទម្រង់ស្របតាមឆន្ទៈប្រជាពលរដ្ឋ។ នេះក៏ជាជោគជ័យរបស់អ្នកប្រជាធិបតេយ្យ នៃការតស៊ូរបស់យើងផងដែរ»។
ដោយឡែកលោកនាយករដ្ឋមន្ត្រី ហ៊ុន សែន វិញធ្លាប់ចំអកឲ្យបក្សប្រឆាំងថា នេះការឆ្លៀតកេងចំណេញនយោបាយ ដោយព្យាយាមយកសមិទ្ធផលរាល់សេចក្ដីសម្រេចនានារបស់រដ្ឋាភិបាល ធ្វើជាកម្មសិទ្ធិរបស់ខ្លួន។ មិនតែប៉ុណ្ណោះ ថែមទាំងភូតកុហកពលរដ្ឋនៅតាមវេទិកាសាធារណៈថា ជាការទាមទាររបស់បក្សប្រឆាំង ទើបរដ្ឋាភិបាលកែទម្រង់ដូច្នេះ។
អ្នកស្រាវជ្រាវការអភិវឌ្ឍសង្គម លោក មាស នី យល់ឃើញថា លោកកម្រឃើញរដ្ឋាភិបាលមានគោលការណ៍ក្នុងការដំឡើងប្រាក់ខែ ឬគិតគូរឲ្យបានស៊ីជម្រៅណាស់ លុះត្រាមានការរិះគន់ពីបក្សនយោបាយផ្សេង ឬមានសម្ពាធអ្វីមួយ ទើបរដ្ឋាភិបាលធ្វើសេចក្ដីសម្រេចភ្លាមដែរ។
លោក មាស នី៖ «សេចក្ដីប្រកាសហ្នឹងធ្វើឡើងនៅមុនពេលបោះឆ្នោត ឬមានសម្ពាធពីគណបក្សប្រឆាំង ដែលគណបក្សប្រឆាំងប្រកាសនឹងដំឡើងប្រាក់ខែឲ្យមន្ត្រីរាជការប៉ុណ្ណេះៗ ហើយគណបក្សអះអាងថា គេនឹងអាចរកលុយបាន និងអាចរកគ្រប់។ ដល់អ៊ីចឹងទៅ រដ្ឋាភិបាលក៏ចាប់ប្រកាសដំឡើងប្រាក់ខែទៅតាមហ្នឹងដែរ»។
ក្រុមអង្គការសង្គមស៊ីវិល នៅតែអះអាងថា រដ្ឋាភិបាលអាចមានលទ្ធភាពក្នុងការដំឡើងប្រាក់ខែដល់មន្ត្រីរាជការ និងកងកម្លាំងប្រដាប់អាវុធ បានច្រើនជាងបច្ចុប្បន្ន បើសិនរដ្ឋាភិបាលចេះគ្រប់គ្រង និងប្រមូលពន្ធដោយតម្លាភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។