ការប្រើប្រាស់ឧបករណ៍នេសាទខុសច្បាប់ចាប់ត្រី នៅក្នុងទឹកបឹងទន្លេសាប នៅរដូវហាមឃាត់នេះ នៅតែកើតមាន។ បញ្ហានេះ បានបង្កឲ្យមានការប្រឈមមុខដាក់គ្នារវាងអាជ្ញាធរចម្រុះ ដែលជាអ្នកចុះទៅបង្ក្រាប និងក្រុមអ្នកភូមិដែលជាអ្នកប្រើប្រាស់ឧបករណ៍នេសាទខុសច្បាប់ នៅឃុំព្រៃចាស់ ស្រុកឯកភ្នំ ខេត្តបាត់ដំបង។
ប្រធានគណៈកម្មការកណ្ដាលសហគមន៍នេសាទ លោក ភី ហឿត ថ្លែងនៅថ្ងៃទី១៤ ខែកញ្ញា ថា យ៉ាងហោចណាស់មានអ្នកភូមិព្រៃចាស់ ចំនួន ៧០នាក់ បានជិះកាណូតចំនួន ២០គ្រឿង ទៅការពារឧបករណ៍ល្មើសនេសាទស្បៃមងក្រឡាល្អិត ដែលពួកគេបានដាក់ចាប់ត្រីនៅក្នុងទឹកបឹងទន្លេសាប៖ «មានគ្នាយ៉ាងតិចចំនួន ៧០នាក់ ហើយមានកាណូតយ៉ាងតិចចំនួន ២០គ្រឿង គាត់មករំខានការងារសមត្ថកិច្ច និងសហគមន៍នេសាទ ដែលបានសហការគ្នាមកបង្ក្រាបបទល្មើសនេសាទ បរណរ៉ាវ នៅចំណុចភូមិព្រៃចាស់ ឃុំព្រៃចាស់។ អ៊ីចឹង ធ្វើឲ្យកងកម្លាំងសហការមានអារម្មណ៍មិនស្រួលចិត្តក្នុងការ ពេលខ្ញុំឈប់ គាត់ឈប់ដែរ ពេលកម្លាំងខ្ញុំមក គាត់បើកមកដែរ»។
ទោះយ៉ាងណា ការលើកគ្នាទៅការពារបទល្មើសនេសាទរបស់អ្នកភូមិនោះ ពុំបានបង្កឲ្យមានអំពើហិង្សាកើតឡើងនោះទេ ដោយសារតែកងកម្លាំងមានសមត្ថកិច្ច មន្ត្រីជំនាញជលផល និងសហគមន៍នេសាទ បានប្រាប់ឲ្យអ្នកភូមិទាំងនោះរុះរើឧបករណ៍នេសាទខុសច្បាប់ទាំងនោះចេញដោយខ្លួនឯង។
មេភូមិព្រៃចាស់ លោក ម៉ក់ ទី បញ្ជាក់ថា ក្រុមអ្នកភូមិទាំងនោះបានលើកគ្នាជិះកាណូតទៅ ដើម្បីសុំរុះរើឧបករណ៍នេសាទល្មើសច្បាប់ទាំងនោះដោយខ្លួនឯង។ ការធ្វើដូច្នេះ ដោយសារពួកគេមិនចង់ឲ្យក្រុមអាជ្ញាធរចម្រុះ រុះរើយកឧបករណ៍ស្បៃមងក្រឡាល្អិតនោះ យកទៅដុតបំផ្លាញ។ ម្យ៉ាងវិញ អ្នកភូមិនៅតំបន់នោះ មានតែមុខរបរនេសាទ៖ «អ៊ីចឹង នៅក្នុងដែនសហគមន៍មានការលួចលាក់បទល្មើស ដូចជាបរដៃ ដើម្បីរកជាលក្ខណៈតិចតួច ដោះស្រាយជីវភាព នៅក្នុងថ្ងៃនេះ បងប្អូនមិនមកធ្វើអី គឺថា មកចូលទៅចំណុចណាបងប្អូនសុំសាយកផង ដើម្បីបានខ្លះមិនបានបង្កលក្ខណៈរឿងរ៉ាវកើតឡើងទេ»។
នាយរងផ្នែកជលផលព្រែកទាល់ លោក សៀង ដារិទ្ធ ថ្លែងថា សកម្មភាពចុះបង្ក្រាបបទល្មើសនេសាទនៅតំបន់នោះ គឺជំនាញជលផល កងកម្លាំងចម្រុះ និងសហគមន៍នេសាទ បានចុះធ្វើសកម្មភាពចាប់តាំងពីថ្ងៃទី១៣ ខែកញ្ញា ប៉ុន្តែនៅថ្ងៃទី១៤ ខែកញ្ញា ស្រាប់តែក្រុមអ្នកភូមិទាំងនោះបានចុះសកម្មភាពអុកឡុករំខានដល់សមត្ថកិច្ច។ លោកបន្តថា ដើម្បីបញ្ចៀសបញ្ហាកុំឲ្យកើតមានឡើង សមត្ថកិច្ចចម្រុះអនុញ្ញាតឲ្យក្រុមអ្នកភូមិទាំងនោះចុះរុះរើឧបករណ៍ល្មើសនេសាទស្បៃមងក្រឡាល្អិតនោះដោយខ្លួនឯង៖ «បើគេមិនសា យើងចាត់វិធានការ។ អ៊ីចឹងបានថា បញ្ហានេះធម្មតាទេ ប្រជាជនតែងតែមានការលួចលាក់ នេះបើនិយាយឲ្យចំ មិនមែនអាជ្ញាធរ ឬជំនាញអនុញ្ញាតទេ នេះគឺការលួចលាក់ដាក់ក្នុងព្រៃកន្លែងណាយើងឃើញ យើងធ្វើទៅ កន្លែងខ្លះនៅក្នុងព្រៃជ្រៅដែលយើងមិនអាចឃើញ ទាល់គេរាយការណ៍»។
កាលពីថ្ងៃទី១៣ កញ្ញា ជំនាញជលផលកងកម្លាំងសមត្ថកិច្ច រួមទាំងសហគមន៍នេសាទ មានគ្នាសរុបចំនួន ៥២នាក់ បានចុះទៅបង្ក្រាបបទល្មើសនេសាទបានឧបករណ៍ស្បៃមងក្រឡាល្អិតប្រវែង ១.៥០០ម៉ែត្រ បង្គោល ១០០ដើម និងឡុកចាប់ត្រីចំនួន ៤គ្រឿង។ ប៉ុន្តែ នៅថ្ងៃទី១៤ កញ្ញា ស្រាប់តែមានក្រុមអ្នកភូមិលើកគ្នាទៅការពារឧបករណ៍ល្មើសនេសាទ។ មន្ត្រីជំនាញ និងសហគមន៍នេសាទបញ្ជាក់ថា ក្រុមអ្នកភូមិទាំងនោះបាននាំគ្នាចុះរុះរើឧបករណ៍នេសាទល្មើសច្បាប់នោះហើយ ក្រោយពីមានការជជែកគ្នារួចមក។
យ៉ាងក៏ដោយ ការប្រើប្រាស់ឧបករណ៍នេសាទខុសច្បាប់ទាំងនោះ គឺក្រុមអ្នកភូមិបាននាំគ្នាលួចលាក់ធ្វើនៅក្នុងរដូវដែលច្បាប់ហាមឃាត់ ហើយរដូវនេសាទដែលច្បាប់ហាមឃាត់នេះ បានចាប់ផ្ដើមឡើងតាំងពីខែមិថុនា រហូតដល់ខែតុលា ទើបរដ្ឋាភិបាលអនុញ្ញាតឲ្យមានការនេសាទជាធម្មតាឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។