ពលរដ្ឋនៅឃុំមៀន ស្រុកព្រៃឈរ ខេត្តកំពង់ចាម ដែលរស់នៅអាស្រ័យផលនេសាទនៅក្នុងបឹងធំ ត្អូញត្អែរពីការលំបាកក្នុងការនេសាទប្រចាំថ្ងៃ ដោយសារមានការនេសាទដោយឧបករណ៍អួនក្រឡាញឹកខ្នាតធំ នៅតែកើតមានឡើង។
ចំណែកប្រធានសហគមន៍នេសាទនិយាយថា នឹងតាមដានព័ត៌មាននេះឲ្យច្បាស់ ហើយនឹងផ្តល់ដំណឹងនេះដល់មន្ត្រីជំនាញ ដើម្បីចាត់វិធានការ។
ការបារម្ភនេះ កើតមានបន្ទាប់ពីសកម្មភាពបង្ក្រាបរបស់មន្ត្រីជំនាញកាលពីពេលកន្លងទៅ ចំពោះបទល្មើសនេសាទដោយអួនវង់ធំៗលើសពីច្បាប់អនុញ្ញាត បានចាប់ផ្ដើមកក្រើកបន្តទៀតនោះ។ ពលរដ្ឋថាការបង្ក្រាបរបស់មន្ត្រីជំនាញ ហាក់មិនមានប្រសិទ្ធភាពចំពោះអ្នកប្រព្រឹត្តិទាំងនោះឡើយ ហើយធ្វើឲ្យពលរដ្ឋយល់ថា អាចដោយសារតែមានការឃុបឃិតគ្នារវាងជនល្មើសជាមួយអាជ្ញាធរទាំងនោះទៀតផង។
ពលរដ្ឋម្នាក់នៅឃុំមៀន លោក យីម ទីត មានប្រសាសន៍ថា សកម្មភាពអូសអួនវង់ធំៗពីរវង់ ដែលមានប្រវែងចាប់ពី ២០០ម៉ែត្រទៅ ៣០០ម៉ែត្រ ដោយប្រើទូកកាណូត រួមនឹងម៉ាស៊ីនខ្យល់ដាក់ដល់បាតដីផងនោះ បានកើតមានឡើងដដែល។ លោកបន្តថា ការអូសអួននោះ ធ្វើឲ្យប៉ះពាល់ដល់ប្រជានេសាទជាលក្ខណៈគ្រួសារជាខ្លាំង និងធ្វើឲ្យត្រីយ៉ាងច្រើនត្រូវបាត់បង់៖ «ដោយសារតែការឃុបឃិតគ្នាដោយមន្ត្រីជំនាញមន្ត្រីជលផលឃុបឃិតគ្នា បានជាក្រុមហ្នឹងអូសដដែល»។
លោកចង់ឲ្យអាជ្ញាធរដែលពាក់ព័ន្ធ ជួយទប់ស្កាត់ឲ្យមានប្រសិទ្ធភាព ជៀសវាងនូវការបង្ក្រាប ហើយអ្នកប្រព្រឹត្តិនៅតែអាចរកស៊ីដោយខុសច្បាប់បាននោះ។
វិទ្យុអាស៊ីសេរី មិនអាចទាក់ទងមន្ត្រីជំនាញជលផលខេត្តកំពង់ចាម បានទេ នៅថ្ងៃទី២ ធ្នូ។
កាលពីថ្ងៃទី៨ វិច្ឆិកា មន្ត្រីជំនាញខណ្ឌជលផលខេត្ត រួមនឹងប្រជាសហគមន៍នេសាទបឹងធំ បានចុះបង្ក្រាបបានអួនក្រឡាញឹកវង់ធំលើសពីច្បាប់កំណត់ ដែលមានប្រវែងចាប់ពី ១៥០ម៉ែត្រ ទៅ ២០០ម៉ែត្រ ហើយមានសម្ភារៈមួយចំនួនដូចជា ទូកចំនួន ២គ្រឿង ម៉ាស៊ីនខ្យល់ចំនួន ២គ្រឿង និងមនុស្សប្រមាណ ១០នាក់ ក៏ប៉ុន្តែក្រោយមក សកម្មភាពនេសាទទ្រង់ទ្រាយធំបែបនេះ នៅតែកើតមានឡើង។
ប្រធានសហគមន៍នេសាទបឹងធំ លោក ម៉ុន ឆៃលាង មានប្រសាសន៍ថា លោកនៅមិនទាន់ទទួលបានដំណឹង ថាមានសកម្មភាពនេសាទដោយប្រើទូកម៉ាស៊ីនអូសអួនដូចអ្វីដែលពលរដ្ឋលើកឡើងនោះទេ។ ប៉ុន្តែ លោកថានឹងតាមដានព័ត៌មាននេះឲ្យច្បាស់ ដើម្បីរាយការណ៍ដល់មន្ត្រីជំនាញ ពីព្រោះលោកមើលឃើញថា ការអូសអួនទាំងនោះ គឺពិតជាបង្កផលប៉ះពាល់ដល់ប្រជានេសាទមែន៖ «បាទ! ខ្ញុំទាក់ទងទៅគាត់រហូតដែរ ប្រសិនបើជាអួនហ្នឹងគាត់នៅដឹកដដែល ខ្ញុំចង់សួរទៅក្រសួងមានសមត្ថកិច្ច ថាតើយើងគួរធ្វើម៉េចបើអួនហ្នឹងនៅដឹកដដែល? ហើយយើងគួរទប់ស្កាត់របៀបម៉េច?»។
លោកក៏ធ្លាប់មានប្រសាសន៍កាលពីពេលមុនថា ការបង្ក្រាបបទល្មើសនេសាទមិនមានប្រសិទ្ធភាពនោះ គឺអាចបណ្ដាលមកពីការត្រូវរ៉ូវគ្នារវាងអ្នកប្រព្រឹត្តិជាមួយអាជ្ញាធរនោះឯង។
ដោយឡែកខាងមន្ត្រីសម្របសម្រួលនៃអង្គការសម្ព័ន្ធភាព ដើម្បីអភិរក្សធនធានជលផល លោក ឯក ចំរើន យល់ថា ដើម្បីឲ្យការបង្ក្រាបបទល្មើសនេសាទមានប្រសិទ្ធភាពនោះ ជម្រើសចុងក្រោយ ខាងលោកអាចនឹងស្នើសុំឲ្យអង្គភាពប្រឆាំងអំពើពុករលួយចូលរួមក្នុងបញ្ហានេះតែម្តង ពីព្រោះបទល្មើសនេសាទនៅតែកើតមានឡើងកន្លងមក គឺអាចពាក់ព័ន្ធនឹងអំពើពុករលួយ។ លោកបារម្ភថា ប្រសិនបើមិនមានការទប់ស្កាត់បទល្មើសនេសាទឲ្យបានប្រសើរនោះទេ ទិន្នផលមច្ឆជាតិ នឹងកាន់តែថយចុះទៅៗ។
យ៉ាងណា ច្បាប់ជលផលឆ្នាំ២០០៦ មាត្រា៩៨ ចែងពីការផ្ដន្ទាទោសចំពោះបទល្មើសថ្នាក់ទី១ គឺត្រូវជាប់ពន្ធនាគារពី ៣ឆ្នាំ ទៅ ៥ឆ្នាំ និងត្រូវរឹបអូសវត្ថុតាងទាំងអស់ដាក់ជាសម្បត្តិរដ្ឋ ឬបំផ្លាញចោល។ បទល្មើសទាំងនោះរួមមាន ការនេសាទដោយប្រើឧបករណ៍ឆក់ គ្រឿងផ្ទុះ និងសារធាតុពុលគ្រប់ប្រភេទនៅក្នុងដែននេសាទ នេសាទដោយឧបករណ៍បូម បាចនៅផ្នែកណាមួយ ដែលបង្កមហន្តរាយដល់ធនធានជលផល នេសាទដោយប្រើឧបករណ៍ទំនើប ឬឧបករណ៍នេសាទបង្កើតឡើងថ្មី ឬជារបៀបនេសាទដែលគ្មានការកំណត់ក្នុងប្រកាសរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលនាំមកនូវការបំផ្លាញមច្ឆជាតិ ធនធានជលផល និងប្រព័ន្ធអេកូឡូស៊ីជលផលនោះ រួមនឹងចំណុចផ្សេងៗមួយចំនួនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។