ប្រជាពលរដ្ឋរស់នៅស្រុកកំពង់ត្រឡាច ខេត្តកំពង់ឆ្នាំង ចោទនាយសង្កាត់រដ្ឋបាលជលផល និងប្រធានសហគមន៍នេសាទ ថាបានបើកដៃឲ្យមានបទល្មើសនេសាទកាន់តែច្រើនឡើង និងប្រព្រឹត្តអំពើពុករលួយក្នុងសកម្មភាពចុះបង្ក្រាបបទល្មើសនេសាទ។
ប៉ុន្តែ មន្ត្រីជំនាញរដ្ឋបាលជលផល ច្រានចោលការចោទប្រកាន់នេះ ដោយបញ្ជាក់ថា ពលរដ្ឋដែលចោទមកលើមន្ត្រីជលផល និងតំណាងសហគមន៍នោះ គឺគ្មានមូលដ្ឋាន ឬភស្តុតាងច្បាស់លាស់ឡើយ។
តំណាងពលរដ្ឋម្នាក់អះអាងថា សកម្មភាពចិញ្ចឹមត្រីឆ្ដោរ និងដាក់លូស្បៃមុងកាន់តែកើតមានច្រើនក្នុងមូលដ្ឋានរបស់លោក នៅភូមិខ្លាគ្រហឹម ឃុំអំពិលទឹក ស្រុកកំពង់ត្រឡាច។ លោកថា បញ្ហានេះ គឺបណ្ដាលមកពីមានមេខ្យល់ក្នុងភូមិឈ្មោះ ជា សាវ័ន ដើរប្រមូលលុយពីក្រុមជនល្មើសក្នុង ១មាត់ស្បៃមុង ចំនួន ១៥ម៉ឺនរៀល ទៅឲ្យទៅឈ្មោះ សេន យូ ដែលជាប្រធានសហគមន៍នេសាទក្នុងតំបន់នោះ។
លោក កែវ សារ៉ាត់ មានប្រសាសន៍ថា បទល្មើសស្បៃមុងជាច្រើនមាត់នៅក្នុងបឹងជំនីកមន ឋិតក្នុងភូមិខ្លាគ្រហឹម គឺជាភស្តុតាងមួយក្នុងការបើកដៃឲ្យមានបទល្មើស។ ចំណែករឿងពុករលួយវិញ គឺកាលពីព្រឹកថ្ងៃទី៣០ ខែកញ្ញា ឆ្នាំ២០១៤ នៅក្នុងសកម្មភាពចុះបង្ក្រាបលូស្បៃមុង ដែលមានប្រធានសហគមន៍ លោក សេន យូ និងនាយសង្កាត់ជលផលស្រុកកំពង់ត្រឡាច លោក គឹម ហេង មិនបានបង្ក្រាបស្បែមុងរបស់បក្ខពួក ឬអ្នកដែលបង់ប្រាក់ឲ្យខ្លួននោះទេ តែបែរជាជួយបន្លិចស្បៃមុងនោះចូលក្នុងទឹក ដើម្បីលាក់បាំងបទល្មើសទៀតផង៖ «អូ! ពីមុនតិចទេ ដល់ឥឡូវតាំងពីឈ្មោះ ជា សាវ័ន ដើរឃោសនាមកគេថាអស់ ១លានអីរកតែមួយអាទិត្យ (១សប្ដាហ៍) ទេ រួចដើមវិញហើយ ប៉ុន្តែឥឡូវច្រើនមែនទែនលោកគ្រូ ខ្ញុំចង់បាននរណាមកថត កុំឲ្យគេដឹងតែម្ដង។ គេមកដឹង គឺអត់បានសូម្បីតែថ្ងៃទី៣០ ខែ១០ ហ្នឹង អភិបាលរងចុះមក គេប្រាប់ឲ្យពន្លិចអស់។ សេន យូ ហ្នឹងជាអ្នកតេប្រាប់មក ជា សាវ័ន ឲ្យពន្លិចស្រយឺល ហើយនិងកៀរត្រីឆ្ដោរលាក់ទុក»។
ទាក់ទងនឹងការចោទប្រកាន់នេះ ប្រធានសហគមន៍នេសាទ លោក សេន យូ និយាយបែបហំថា លោកធ្វើការមានមេមានកើយ។ ដូច្នេះ លោកមិនអាចបំភ្លឺអ្វីបាននោះទេ ដោយជំរុញឲ្យទៅសួរ លោក គឹម ហេង ដែលជានាយសង្កាត់រដ្ឋបាលជលផលស្រុកកំពង់ត្រឡាច។ ប៉ុន្តែ លោក គឹម ហេង បានចុចផ្ដាច់ទូរស័ព្ទនៅពេលដែលវិទ្យុអាស៊ីសេរី សាកសួរទាក់ទងនឹងការចោទប្រកាន់របស់ពលរដ្ឋនេះ។
យ៉ាងណា នាយខណ្ឌរដ្ឋបាលជលផលខេត្តកំពង់ឆ្នាំង លោក សេង ប៊ុនឈឿន ថ្លែងបញ្ជាក់ថា ករណីបទល្មើសនេសាទនៅស្រុកកំពង់ត្រឡាច នេះ ខាងលោកបានទទួលចំណារមួយពីអភិបាលខេត្តកំពង់ឆ្នាំង លោក ឈួរ ច័ន្ទឌឿន ដែរ ប៉ុន្តែការចុះពិនិត្យមើលជាក់ស្ដែងជាបន្តបន្ទាប់ តាំងពីមុនថ្ងៃទី៣០ ខែតុលា ឆ្នាំ២០១៤ មក គឺពុំមានបទល្មើសច្រើនដូចការអះអាងរបស់ប្រជាពលរដ្ឋឡើយ។ ទាក់ទងនឹងការចោទប្រកាន់លើមន្ត្រីរបស់លោក និងតំណាងសហគមន៍នេសាទនោះ លោកថា ពលរដ្ឋចេះតែចោទប្រកាន់គ្មានភស្តុតាង ខណៈដែលខាងជំនាញជលផលធ្វើការបង្ក្រាបជាប្រចាំ៖ «ខ្ញុំបដិសេធថាការឃុបឃិតអីហ្នឹង សូមឲ្យគាត់រកភស្តុតាងឲ្យត្រឹមត្រូវ កុំឲ្យគាត់ចេះតែថាអ៊ីចឹង វាជួនកាលគាត់មានប្រសាសន៍ទៅ វាធ្វើឲ្យប៉ះពាល់ដល់សតិអារម្មណ៍ ធ្វើឲ្យមន្ត្រីរបស់ខ្ញុំមានសតិអារម្មណ៍ថា ខំធ្វើចង់ងាប់ នៅថាអ៊ីចេះអ៊ីចុះ។ បើសិនគាត់មានភស្តុតាងអីច្បាស់លាស់ យើងនឹងហៅមន្ត្រីហ្នឹងធ្វើការណែនាំបងណា ទៅតាមលក្ខន្តិកៈមន្ត្រីរាជការ»។
កាលពីដើមខែតុលា ឆ្នាំ២០១៤ វិទ្យុអាស៊ីសេរី បានទទួលលិខិតភ្ជាប់ស្នាមមេដៃរបស់ពលរដ្ឋភូមិខ្លាគ្រហឹម ចំនួន ១៦នាក់ តំណាងឲ្យពលរដ្ឋជាង ៣០០គ្រួសារ។ នៅក្នុងលិខិតនោះបញ្ជាក់ថា បទល្មើសនេសាទកើតមានពេញបន្ទុក ប៉ុន្តែការបង្ក្រាបរបស់មន្ត្រីជំនាញ និងអាជ្ញាធរមានសមត្ថកិច្ច ហាក់បង្ក្រាបមិនស្មើមុខគ្នា និងគ្មានប្រសិទ្ធភាព។ ទាក់ទងនឹងការបង្ក្រាបបទល្មើសនេសាទនៅឃុំអំពិលទឹក ស្រុកកំពង់ត្រឡាច នេះដែរ កាលពីដើមឆ្នាំ២០១៤ មានសមត្ថកិច្ចពីរនាក់ បានស្លាប់ក្នុងហេតុការណ៍ចុះបង្ក្រាបបទល្មើសនេសាទឆក់នៅពេលយប់ ដែលបច្ចុប្បន្នរកឃើញសាកសពម្នាក់ និងម្នាក់ទៀតរកមិនទាន់ឃើញនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។