ប្រជាពលរដ្ឋប្រកបរបរនេសាទ រស់នៅឃុំសំបួរមាស ស្រុកមុខកំពូល ខេត្តកណ្ដាល ជាង ២០០គ្រួសារ មិនពេញចិត្តចំពោះទង្វើរបស់អាជ្ញាធរមូលដ្ឋាន ដែលឃុបឃិតឲ្យមានបទល្មើសនេសាទអានាធិបតេយ្យ។
ពលរដ្ឋច្រើននាក់រស់នៅភូមិអំពិលទឹក ឲ្យដឹងថា នៅព្រឹកថ្ងៃសុក្រ ទី២៩ ខែវិច្ឆិកា មានបំណងលើកគ្នាទៅបំផ្លាញឧបករណ៍នេសាទខុសច្បាប់ ដែលជនល្មើសកំពុងធ្វើសកម្មភាពក្នុងអាងទឹកភូមិអំពិលទឹក។ ពលរដ្ឋចោទថា អាជ្ញាធរមូលដ្ឋានបានជាប់ពាក់ព័ន្ធបទល្មើសនេសាទនៅក្នុងមូលដ្ឋានភូមិអំពិលទឹក។
ផ្ដើមពីបញ្ហានេះ ប្រជានេសាទស្នើដល់អាជ្ញាធរពាក់ព័ន្ធ ជួយមានវិធានការបង្ក្រាបបទល្មើសនេសាទអានាធិបតេយ្យនៅមូលដ្ឋានឃុំសំបួរមាស ជាបន្ទាន់ ដើម្បីឲ្យពលរដ្ឋអាចប្រកបរបរនេសាទចិញ្ចឹមគ្រួសារឡើងវិញ៖ «មេភូមិឲ្យដាក់បញ្ជាឲ្យបញ្ជាការពារភូមិដាក់ឧបករណ៍ល្មើសទាំងនេះ។ នៅចំណុចអាងអំពិលទឹក មានមាត់ ៤ ទៅ ៦ម៉ែត្រ។ ឧបករណ៍ហ្នឹង រដ្ឋាភិបាលគាត់បិទឡូនេសាទ ដើម្បីបើកចំហឲ្យប្រជាពលរដ្ឋប្រកបរបរសន្ទូច រាយមង និងសំណាញ់ធម្មតា។ ដល់ពេលមេភូមិចេញមុខដាក់ឧបករណ៍នេសាទល្មើសនៅតំបន់នេះ ពលរដ្ឋមូលដ្ឋានមិនអាចប្រកបនេសាទ ឬបង់សំណាញ់អត់បាន។ កាលណាដាក់អ៊ីចឹងបានប្រយោជន៍តែបុគ្គល ប៉ុន្តែសមូហភាពពលរដ្ឋមិនបាននេសាទទេ គឺរកមិនបាន ព្រោះគេដាក់ដាយ ឬស្បៃមុងនៅមុខទឹក»។
បញ្ហានេះ ប្រជាពលរដ្ឋស្រុកមុខកំពូល បានលើកជាចម្ងល់ថា បទល្មើសនេសាទ លោកនាយករដ្ឋមន្ត្រី ហ៊ុន សែន បានដាក់បទបញ្ជាជាលាយលក្ខណ៍អក្សរ និងផ្ទាល់មាត់ ឲ្យមន្ត្រីក្រោមឱវាទតាមខេត្តនានា បង្ក្រាបឲ្យមានប្រសិទ្ធភាព ប៉ុន្តែហេតុអ្វីបានជាមន្ត្រីពាក់ព័ន្ធមិនអនុវត្តតាម។
អ្នកស្រី ណែម យ៉ង មេឃុំសំបួរមាស ស្រុកមុខកំពូល ខេត្តកណ្ដាល ទទួលស្គាល់ថា ពិតជាមានបទល្មើសនៅក្នុងមូលដ្ឋានខ្លួនដូចពលរដ្ឋអះអាងពិតមែន។ បទល្មើសនេះ អ្នកស្រីបញ្ជាក់ថា នឹងដឹកនាំពលរដ្ឋក្នុងមូលដ្ឋាន បំផ្លាញឲ្យបានជាស្ថាពរក្នុងសប្ដាហ៍នេះ៖ «បទល្មើសប្រើឧបករណ៍នេសាទនៅមូលដ្ឋានខ្ញុំៗឲ្យជនបង្ករើចេញហើយ។ ប៉ុន្តែ បើមិនរើចេញទេ ខ្ញុំនឹងឲ្យប្រជាជនកម្ទេចចោលទាំងអស់។ បញ្ហានេះ ខ្ញុំមិនអាចទុកបានទេ បើវាត្រូវតែអ៊ីចឹង ត្រូវតែកម្ទេចចោល ហើយនិងរាយការណ៍ទៅថ្នាក់លើ»។
មេប៉ុស្តិ៍នគរបាលឃុំសំបួរមាស ស្រុកមុខកំពូល លោក សៀន សម្បត្តិ បានឲ្យដឹងថា បទល្មើសនេសាទនៅមូលដ្ឋានលោកៗបានរាយការណ៍ជូនមន្ត្រីជំនាញពាក់ព័ន្ធរួចហើយ។ ហើយថា សមត្ថកិច្ចលោកបានត្រៀមសហការជាមួយមន្ត្រីជលផល ដើម្បីឈានដល់បង្ក្រាបបទល្មើសនេសាទឲ្យបានជាស្ថាពរ៖ «ប្រជាពលរដ្ឋគាត់បានមកជួបខ្ញុំដែរ។ ខ្ញុំរុញឲ្យគាត់ទៅជួបអ្នកពាក់ព័ន្ធ ឬឃុំ ព្រោះបទល្មើសនេសាទ គឺជាសមត្ថកិច្ចរបស់ជលផលទេ ហើយខ្ញុំអាជ្ញាធរនៅរង់ចាំសហការបង្ក្រាបបទល្មើសទាំងនេះ»។
ទាក់ទងបទល្មើសនេះ លោកនាយករដ្ឋមន្ត្រី ហ៊ុន សែន ក្នុងរាជរដ្ឋាភិបាលនីតិកាលទី៤ បានដាក់បទបញ្ជាដល់មន្ត្រីក្រោមឱវាទតាមខេត្តនានា បង្ក្រាប និងទប់ស្កាត់ឲ្យមានប្រសិទ្ធភាព។ បន្ថែមលើនេះ ប្រមុខដឹកនាំថែមទាំងបានព្រមានដកតំណែងមន្ត្រីពាក់ព័ន្ធ ដែលនៅពីក្រោយបទល្មើសនេសាទថែមទៀត។
ទោះជាបែបណា ប្រជាពលរដ្ឋខេត្តកណ្ដាល ក្នុងចំណោមពលរដ្ឋតាមខេត្តទៀត បានអះអាងថា បទល្មើសនេសាទបានធ្វើសកម្មភាពច្រើនកន្លែងនៅខេត្តកណ្ដាល គ្មានការទប់ស្កាត់ពីអាជ្ញាធរទេ។ ហើយថា ភាគច្រើននៃបទល្មើសនេសាទ មន្ត្រីមានតួនាទីក្នុងជួររដ្ឋាភិបាលធ្វើជាខ្នងបង្អែកបទល្មើស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។