បទល្មើសនេសាទដែលមានទូកកាណូត រួមទាំងឧបករណ៍ចាប់ត្រី ស្បៃមុង ឬហៅម្យ៉ាងទៀតថាសៃយ៉ឺន ផងនោះ ត្រូវបានប្រជាពលរដ្ឋក្នុងមូលដ្ឋាននោះចោទថា ជនជាតិវៀតណាម យកទៅធ្វើជាឧបករណ៍សម្រាប់នេសាទយ៉ាងគគ្រឹកគគ្រេង នៅតាមចំណុចមួយចំនួនក្នុងតំបន់ឡូត៍លេខ២០ ដែលមានទីតាំងស្ថិតក្នុងឃុំកោះសំពៅ ស្រុកពាមជរ ខេត្តព្រៃវែង។
ការនេសាទត្រីអនាធិបតេយ្យរបស់ជនជាតិវៀតណាម នេះ អ្នកស្រុកពាមជរ បញ្ជាក់ថា នៅថ្ងៃទី២០ សីហា គេឃើញអាជ្ញាធរមូលដ្ឋានបាននាំកម្លាំងសមត្ថកិច្ចរបស់ខ្លួនចេញធ្វើការទប់ស្កាត់ ដោយមានការសហការគ្នាជាមួយមន្ត្រីជលផលខេត្ត ប៉ុន្តែលោកថា ការទប់ស្កាត់នេះពុំបានសម្រេចឡើយ។ ជនជាតិវៀតណាម ដែលបាននេសាទនៅដែនកម្ពុជា ទាំងនោះ មួយផ្នែកជាជនអន្តោប្រវេសន៍វៀតណាម រស់នៅក្នុងប្រទេសកម្ពុជា និងមួយចំនួនជាជនជាតិវៀតណាម មកពីប្រទេសវៀតណាម។
ប្រជាពលរដ្ឋម្នាក់ឈ្មោះ លោក គង់ ដារា រស់នៅភូមិអូតាលូ ឃុំកោះសំពៅ ស្រុកពាមជរ មានប្រសាសន៍នៅថ្ងៃទី២០ សីហា ថា ការទប់ស្កាត់បទល្មើសនេសាទបរាជ័យ បណ្ដាលមកពីមានមន្ត្រីជលផលខ្នងក្រាស់ជាអ្នកនៅពីក្រោយខ្នង៖ «ដែលមានកម្លាំងចម្រុះ ៣០-៤០នាក់ទៅ កាណូត ៣-៤ ដល់តែពេលហ្នឹងស្រាប់មានការអន្តរាគមន៍ពី លោក អូន ស៊ីណាត ប្រធានការិយាល័យជលផលកុំឲ្យចុះបង្ក្រាប ដោយឆ្លើយថា គេរត់ការបង់លុយអស់ហើយ។ ឥឡូវនេះ អត់ទាន់បានបកមកវិញទេ កំពុងតែប្រទាញប្រទង់គ្នាជាមួយរបស់ក្រុម អូន ស៊ីណាត របស់ក្រុមល្មើសច្បាប់ហ្នឹង។ ហើយក្រុមដាក់សៃយ៉ឺន ស្បៃហ្នឹង គឺសុទ្ធតែជាជនជាតិវៀតណាម ទាំងអស់ អត់មានខ្មែរណាទៅដាក់ទេបង»។
លោកបន្តថា ក្រុមនេសាទជនជាតិវៀតណាម ខាងលើ បានយកស្បៃមុង ឬហៅថាសៃយ៉ឺន ធ្វើជាឧបករណ៍ចាប់ត្រី។ លោកថា ឧបករណ៍ដែលក្រុមនេសាទជនជាតិវៀតណាម បានយកទៅដាក់ពង្រាយតំបន់ឡូត៍នេសាទលេខ២០ នោះ មានប្រមាណ ៣០០កន្លែង គេដាក់ក្នុងបឹងបួនានាក្នុងតំបន់ឡូត៍នេសាទខាងលើ។
ឆ្លើយតបទៅនឹងបញ្ហានេះ ប្រធានជលផលខេត្តព្រៃវែង លោក អូន ស៊ីណាត បានបង្ហាញថា រាល់នេសាទទាំងឡាយណាដែលពុំស្របច្បាប់ រូបលោកនឹងធ្វើការដោះស្រាយទៅតាមគោលនយោបាយរបស់រដ្ឋាភិបាល។ ដូចនេះ លោកថា លោកសុំបដិសេធចំពោះពាក្យចោទប្រកាន់របស់ប្រជាពលរដ្ឋខាងលើ៖ «ហើយមកថាចោទថាមេជលផលខេត្តអីមកប៉ះពារអ៊ីចឹងៗ អត់មានទេ ខ្ញុំអត់មានហ្មងលោក រឿងប៉ះពារជលផលហ្នឹង ខ្ញុំមិនជាប់ពាក់ព័ន្ធអីទៅថាអេឃាត់ឃាំងមិនឲ្យ អត់ទេ។ បេសកកម្មបញ្ជាហើយហ្នឹង ដេញកូនចៅធ្វើ និងនិយាយទៅ ឥឡូវធ្វើការងារប៊ុយរ៉ូដោយខ្លួនឯងទេ»។
ក្រុមអាជ្ញាធរមូលដ្ឋាន រួមទាំងប្រជាពលរដ្ឋ បានចុះបង្ក្រាបបទល្មើសនេសាទចាប់ពីម៉ោង ៧ព្រឹកថ្ងៃទី២០ សីហា ប៉ុន្តែ ការបង្ក្រាបនៅព្រឹកថ្ងៃដដែលនេះ ពុំបានសម្រេចឡើយ។ លុះដល់រសៀលម៉ោង ២ កម្លាំងជំរុញពីប្រជាពលរដ្ឋនៅតំបន់នេសាទខ្លាំង ធ្វើឲ្យអាជ្ញាធរដែលបានចុះដល់កន្លែងនេសាទនោះ បានបង្ខំចិត្តរុះរើឧបករណ៍នេសាទរបស់ជនជាតិវៀតណាម បានមួយចំនួន។ ប៉ុន្តែ ការបង្ក្រាបបទល្មើសនេសាទខាងលើ នៅតែជាបញ្ហាប្រឈមនៅឡើយ។
ប្រជាពលរដ្ឋអះអាងថា ដែននេសាទនៅឡូត៍លេខ២០ ជាឆ្នាំងបាយរបស់មន្ត្រីមានអំណាចខាងជលផលខេត្តព្រៃវែង។ លោកថា ក្នុងឧបករណ៍នេសាទមួយកន្លែង ក្រុមនេសាទជនជាតិវៀតណាម ត្រូវបង់ប្រាក់ពី ៣លាន ទៅ ៤លានដុង ឬស្មើនឹង ៦០ម៉ឺនរៀលក្នុងមួយកន្លែង បង់ទៅឲ្យប្រធានជលផលខេត្តព្រៃវែង ដើម្បីទទួលបានការនេសាទដោយសេរី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។