បទល្មើសនេសាទ បានកើតឡើងនៅក្នុងតំបន់បឹងស្នេហ៍ ឃុំធាយ ស្រុកបាភ្នំ ខេត្តព្រៃវែង ក្នុងពេលដែលក្រុមអាជ្ញាធរ និងសមត្ថកិច្ច កំពុងតែជាប់រវល់ត្រៀមក្នុងពេលបុណ្យអុំទូក។
មន្ត្រីអង្គការធ្វើការងារតាមសហគមន៍ និងចូលរួមទប់ស្កាត់បទល្មើសនេសាទ បញ្ជាក់ថា បទល្មើសកើតកាន់តែច្រើន នៅពេលអាជ្ញាធរជំនាញឈប់សម្រាកនៅពេលព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ដែលទើបនឹងបញ្ចប់នេះ។
ទូកនេសាទចំនួន ៦គ្រឿង បានប្រើប្រាស់ឧបករណ៍នេសាទអួនទំហំធំៗ ដែលក្រុមសហគមន៍នេសាទហាមឃាត់ គឺបានធ្វើសកម្មភាពនេសាទនៅក្នុងតំបន់អភិរក្ស នៅថ្ងៃទី៨ ខែវិច្ឆិកា ឆ្នាំ២០១៤ នៅក្នុងឃុំធាយ ស្រុកបាភ្នំ ខេត្តព្រៃវែង។
មន្ត្រីសម្របសម្រួលកម្មវិធីរបស់អង្គការ ហ្វូមីន (Women) ប្រចាំនៅខេត្តព្រៃវែង លោក ទី ថន ថ្លែងថា សកម្មភាពនេសាទល្មើសច្បាប់របស់ពលរដ្ឋមួយក្រុមតូចនៅក្បែរតំបន់បឹងស្នេហ៍នេះ គឺកើតឡើងម្ដងហើយម្ដងទៀត ដែលមើលទៅហាក់មិនញញើតនឹងកម្លាំងសមត្ថកិច្ចឡើយ។ លោកថ្លែងបន្តថា សកម្មភាពទាំងនោះ គឺប្រើប្រាស់ឧបករណ៍ដែលសហគមន៍ហាមឃាត់ ហើយទៅប្រព្រឹត្តនៅក្នុងបរិវេណដែលក្រុមពលរដ្ឋក្នុងសហគមន៍អភិរក្សថែមទៀត៖ « នេះជារបររបស់គេតែម្ដង ទោះបីយើងទៅយ៉ាងម៉េចក៏ដោយ បើខាងខ្ញុំទៅគឺប្រមូលទូកដូចជាក់ស្ដែងប្រមូលផ្ដុំគ្នា យើងមិនដឹងធ្វើម៉េចបានទេ។ រាល់ថ្ងៃបង ! អ្នកដែលមានឈ្មោះតែប៉ុណ្ណឹងនាក់ហ្នឹងកាលពីអាទិត្យមុនគឺរកមងបីជាន់ ទៅហ្នឹងដាក់ទៅហើយមងបីជាន់រាយមងរួចហើយ បញ្ឆេះទូកកាត់ព្រៃទៅដើម្បីឲ្យត្រីផ្អើលជាប់មងហ្នឹង។ បានមងបីជាន់គឺជាមងខុសច្បាប់ដែរហាមមិនឲ្យប្រើមងបីជាន់ដាច់ខាតបាទ ហើយមងហ្នឹងប្រភេទត្រីប៉ុន្មានក៏ជាប់ដែរ អាហ្នឹងចង់ខ្លាំងជាអួនទៅទៀត។ ដល់ពេលរកអ៊ីចឹងទៅ បើរកមងហ្នឹងស្បើយត្រី គឺចាប់ផ្ដើមរកអួនទៀត »។
ក្នុងពេលដែលអ្នកសារព័ត៌មាន និងមន្ត្រីអភិរក្ស ចុះទៅមើលសកម្មភាពនេសាទខុសច្បាប់ទាំងនោះ គឺក្រុមអ្នកនេសាទខ្លះនៅបន្តអូសអួនដែលគេប៉ានប្រមាណថា មានប្រវែងប្រហែល ៣០០ម៉ែត្រ ជាប្រភេទសហគមន៍ហាមឃាត់ ហើយអ្នកនេសាទខ្លះទៀតបានស្រាវអួន ដោយផ្ដុំទូកចូលគ្នាជាក្រុមនៅក្នុងអន្លង់ត្រីដែលសហគមន៍បានអភិរក្ស។ មេក្រុមដែលប្រើឧបករណ៍ដែលសហគមន៍នេសាទហាមឃាត់ ត្រូវគេស្គាល់ថា ឈ្មោះ សៅ ខា រស់នៅក្បែរបឹងស្នេហ៍នេះ។
មន្ត្រីយោធាម្នាក់នៅខេត្តព្រៃវែង ដែលសុំមិនបញ្ចេញឈ្មោះ បានទៅចូលរួមការពារសុវត្ថិភាពមន្ត្រីអភិរក្សថ្លែងថា ពលរដ្ឋភាគច្រើនដែលរស់នៅក្បែរនោះ គឺបានគោរពច្បាប់របស់សហគមន៍នេសាទ ប៉ុន្តែក្រុមជនមួយចំនួនតូចដែលប្រព្រឹត្តល្មើសដដែលៗ ប៉ុន្តែលោកមិនអាចចាប់ឃាត់បាន ព្រោះនេះជាសមត្ថកិច្ចរបស់រដ្ឋបាលជលផល៖ « បាទ ! ខ្ញុំមើលទៅហាក់ដូចជាគគ្រឹកគគ្រេងរកស៊ីមុខរបរខុសច្បាប់ហ្នឹងវាខុសណាស់បង។ ខ្ញុំចង់ឲ្យថ្នាក់ដឹកនាំខាងលើៗហ្នឹងគាត់ជួយអន្តរាគមន៍ ជួយលុបបំបាត់ឲ្យគាត់មករករបរដែលស្របច្បាប់វិញ។ អ៊ីចឹងតំបន់នេះវាអាចក្លាយទៅជាតំបន់ទេសចរ ដូច្នេះខ្ញុំចង់ឲ្យតំបន់ហ្នឹងវាក្លាយទៅជាតំបន់ទេសចរមកវិញ »។
ទោះយ៉ាងណា ក្រុមអ្នកនេសាទមួយចំនួនតូចដែលប្រើឧបករណ៍នេសាទល្មើសច្បាប់នោះ ត្រូវពលរដ្ឋចោទប្រកាន់ថា បានផ្ដល់ប្រាក់ឲ្យសមត្ថកិច្ចជាថ្នូរនឹងធ្វើសកម្មភាពនេសាទល្មើសច្បាប់។
ប៉ុន្តែ នាយខណ្ឌរដ្ឋបាលជលផលខេត្តព្រៃវែង លោក អូន ស៊ីណាត ថ្លែងថា ក្រុមជនល្មើសឆ្លៀតពេលដែលសមត្ថកិច្ចជាប់រវល់ការពារសុវត្ថិភាពពេលបុណ្យអុំទូកផង ហើយក្រុមសមត្ថកិច្ចជំនាញឈប់សម្រាកផងនោះ គឺគេបានធ្វើសកម្មភាពល្មើសតែម្ដង។ លោកបន្តថា លោកនឹងឲ្យសមត្ថកិច្ចស្រាវជ្រាវក្នុងករណីនេសាទល្មើសច្បាប់នោះឲ្យបានឆាប់៖ « កម្លាំងរបស់យើងបានចាប់ផ្ដើមប្រមូលមនុស្សទៅធ្វើហើយ បាទអត់មានធ្វេសប្រហែសទេ គ្រាន់តែថា យើងធ្វើមិនទាន់ហើយថា គាត់អត់រាយការណ៍មកជំនាញ។ បាទ ! កន្លងមកគាត់រាយការណ៍មកជំនាញយើងចាត់ចែងបាន ចាប់បាន៤វង់នោះ ( អួន៤ ) ៤ករណីហើយរឿងហ្នឹងយើងធ្វើជាបន្តបន្ទាប់មកសមិទ្ធផលបានល្អ ប៉ុន្តែថ្ងៃនេះគាត់អត់ប្រាប់មកយើងទេ។ ខ្ញុំឲ្យកម្លាំងចុះស្រាវជ្រាវប្រសិនបើម្នាក់ហ្នឹងគាត់រកចូលទៅក្នុងកន្លែងអភិរក្សមែន ហើយយើងរកកំហុសឃើញនោះយើងចោទប្រកាន់គាត់ទៅព្រះរាជអាជ្ញាដើម្បីសុំឲ្យព្រះរាជអាជ្ញាអនុវត្ត។ បាទ បើនិយាយទៅរឿងនេះគឺកើតចេញពេលបុណ្យទានហើយមន្ត្រីសមត្ថកិច្ចគាត់ឆ្លៀតមកមើលបុណ្យទានមួយថ្ងៃ នេះមិនមែនជាការធ្វេសប្រហែសមិនធ្វើនោះទេ »។
នាយខណ្ឌរដ្ឋបាលជលផលខេត្តព្រៃវែង បានថ្លែងថា សមត្ថកិច្ចបានបង្ក្រាបបទល្មើសនេសាទគិតពីដើមឆ្នាំ២០១៤ មក គឺបាន ២៨៨ករណី ហើយបានបញ្ជូនទៅតុលាការចំនួន ១៤ករណី មានពិន័យជាប្រាក់ចំនួន ៧៤ករណី សរុបប្រាក់ចំនួនជាង ៥៤លានរៀលចូលជាថវិការដ្ឋ។ លោកបានបញ្ជាក់ថា សមត្ថកិច្ចនឹងនៅបន្តបង្ក្រាបរាល់បទល្មើសដែលកើតឡើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។