ពលរដ្ឋរស់នៅតាមដងទន្លេមេគង្គស្រុកថាឡាបរិវ៉ាត់ ខេត្តស្ទឹងត្រែង បារម្ភពីការបំផ្លិចបំផ្លាញពូជត្រីដោយសារបទល្មើសនេសាទនៅរដូវត្រីពងកូន។ ការព្រួយបារម្ភនេះ គឺនៅបន្ទាប់ពីសកម្មភាពនេសាទនៅរដូវត្រីពងកូនកើនឡើង ដោយប្រើឧបករណ៍ខុសច្បាប់នៅតំបន់ជម្រកត្រីតាមអូរដៃទន្លេមេគង្គ ពុំមានការទប់ស្កាត់។
ពលរដ្ឋរស់នៅតាមដងទន្លេមេគង្គស្រុកថាឡាបរិវ៉ាត់ នៅថ្ងៃទី១៥ សីហា អំពាវនាវឲ្យរដ្ឋាភិបាលយកចិត្តទុកដាក់អភិរក្សធនធានជលផល តាមដងទន្លេមេគង្គដែលកំពុងប្រឈមហានិភ័យធ្ងន់ធ្ងរ ដោយសារតែភាពធូររលុងនៃការអនុវត្តច្បាប់នេសាទ ការនេសាទនៅរដូវត្រីពងកូន ការមិនចូលរួមទប់ស្កាត់បទល្មើសនេសាទដោយអាជ្ញាធរមូលដ្ឋាន រួមទាំងការមិនចូលរួមរបស់សហគមន៍នៅមានកម្រិត ឬមិនទាន់មានសមត្ថភាព និងការប្រែប្រួលចរន្តទឹក ជាដើម។
តំណាងពលរដ្ឋរស់នៅស្រុកថាឡាបរិវ៉ាត់ ថ្លែងសុំមិនបញ្ចេញឈ្មោះថា បច្ចុប្បន្នសកម្មភាពនេសាទដោយប្រើឧបករណ៍ឆក់តាមមូលដ្ឋាននៅរដូវត្រីពងកូន និងការនេសាទដោយបណ្ដែតមងតាមអូរ ដែលជាជម្រកត្រីពងកូន កំពុងកើតឡើងយ៉ាងអនាធិបតេយ្យនៅឃុំថាឡាបរិវ៉ាត់ ពុំឃើញមានមន្ត្រីជំនាញទប់ស្កាត់នៅឡើយទេ។ លោកថា ការបណ្ដែតបណ្តោយឲ្យមានការនេសាទនៅរដូវត្រីពងកូន នឹងធ្វើឲ្យធនធានត្រីថយចុះខ្លាំង ហើយប្រភេទត្រីកម្រមួយចំនួនក៏ប្រឈមការផុតពូជផងដែរ៖ «ជលផលខេត្តច្បាប់គេ គឺគេបិទត្រឹមត្រូវ វាមានជលផលតាមភូមិ ដល់ពេលមុនពេលចុះមកខេត្តត្រូវតេមកភូមិ ដល់តេមក ពួកភូមិផ្សព្វផ្សាយ ពួកនេសាទត្រីឲ្យគេច ដល់ចឹងមិនអាចចាប់ពួកនេសាទហ្នឹងបានទេ»។
រដ្ឋបាលជលផលខេត្តស្ទឹងត្រែង បានជូនដំណឹងស្ដីពីការបិទនេសាទជាបណ្ដោះអាសន្ននៅរដូវត្រីពងកូន ចាប់ពីថ្ងៃទី១ ខែឧសភា ដល់ថ្ងៃទី៣០ ខែវិច្ឆិកា។ តែយ៉ាងណាក៏ដោយ អ្នកភូមិអះអាងថា សេចក្តីជូនដំណឹងស្ដីពីការហាមឃាត់នេះ មានតែនៅលើក្រដាសនោះទេ តែការឃ្លាំមើល និងហាមឃាត់នេសាទជាក់ស្តែងនៅមានតិចតួចណាស់។
ឆ្លើយតបការចោទប្រកាន់នេះ នាយខណ្ឌរដ្ឋបាលជលផល លោក ប៉ែន ឈុនឌី ទទួលស្គាល់ថា ពិតជាមានពលរដ្ឋធ្វើនេសាទប្រើឧបករណ៍ខុសច្បាប់ នៅតាមដងទន្លេមេគង្គស្រុកថាឡាបរិវ៉ាត់ ពិតមែន តែការធ្វើនេសាទនោះ ធ្វើឡើងដោយលួចលាក់។ តែយ៉ាងណាលោកថា មន្ត្រីជំនាញតែងតែសហការជាមួយសហគមន៍នេសាទតាមមូលដ្ឋាន អាជ្ញាធរ និងសមត្ថកិច្ច ដើម្បីផ្តល់ដំណឹងពីបទល្មើសនេសាទ ព្រមទាំងចូលរួមទប់ស្កាត់បទល្មើសនេសាទតាមដងទន្លេនៅមូលដ្ឋាន៖ «កន្លងទៅខ្ញុំបានផ្សព្វផ្សាយតាមទូកក្នុងរយៈពេលខ្លីៗ ពន្យល់ត្រួសៗឲ្យគាត់ប្រើឧបករណ៍មងដែលវាត្រូវច្បាប់ កុំនេសាទក្នុងរដូវត្រីពង ចៀសវាងប្រើឧបករណ៍ល្មើសច្បាប់»។
លោក ប៉ែន ឈុនឌី បន្ថែមថា គិតចាប់ពីខែមករា ឆ្នាំ២០១៥ ដល់ខែសីហា ឆ្នាំ២០១៥ មន្ត្រីរដ្ឋបាលជលផល បានចាប់ជនសង្ស័យដែលប្រើឧបករណ៍នេសាទខុសច្បាប់ចំនួន ៨នាក់ ព្រមទាំងបានបញ្ជូនទៅតុលាការ។
ទាក់ទងនឹងបញ្ហានេះដែរ មន្ត្រីសម្របសម្រួលនៃអង្គការបណ្ដាញទន្លេបី លោក មៀច មាន មានប្រសាសន៍បញ្ជាក់ថា ភាពធូររលុងនៃការអនុវត្តច្បាប់ជលផលដើម្បីទប់ស្កាត់បទល្មើសនេសាទ និងការអប់រំផ្សព្វផ្សាយស្ដីពីច្បាប់នេសាទ និងគុណវិបត្តិការនេសាទនៅតំបន់ត្រីពងកូន មិនបានទូលំទូលាយ បណ្ដាលឲ្យធនធានមច្ឆជាតិកាន់តែថយចុះ។ លោកកត់សម្គាល់ថា មន្ត្រីជលផល និងអាជ្ញាធរមូលដ្ឋាន ហាក់នៅមិនស៊ីចង្វាក់គ្នាក្នុងការទប់ស្កាត់បទល្មើសនេសាទនោះទេ ទើបបង្កឲ្យបទល្មើសនេសាទកាន់តែកើនឡើង៖ «ឆ្នាំ២០១៥ ហើយរយៈពេលជាង ៣០ឆ្នាំហើយ ដែលក្រោយរំដោះ ៧ មករា មន្ត្រីអាជ្ញាធររបស់រដ្ឋាភិបាលនៅតែធ្វើការបែបមិនចូលគ្នា ថ្នាក់ដឹកនាំ និងមន្ត្រីជំនាញ សុទ្ធតែមនុស្សដដែលៗ គួរតែច្បាស់នូវគោលនយោបាយនូវច្បាប់របស់រដ្ឋាភិបាលអនុវត្តច្បាប់ឲ្យតឹងតែងវាអត់»។
លោក មៀច មាន កត់សម្គាល់ថា បរិមាណត្រីដែលសហគមន៍នេសាទបានជាលក្ខណៈគ្រួសារនៅពេលបច្ចុប្បន្ន មានការថយចុះពីមួយឆ្នាំទៅមួយឆ្នាំ ហើយពូជត្រីមួយចំនួនក៏គេពុំឃើញមាន ដូចជាត្រីព្រួល ត្រីលេញ និងត្រីរៀល ជាដើម។ បន្ថែមពីលើនេះ ការបាត់បង់ពូជត្រីនេះអាចបណ្ដាលមកពីប្រែប្រួលទឹក ការនេសាទខុសច្បាប់ និងការបញ្ចេញកាកសំណល់នៃការកសាងទំនប់វារីអគ្គិសនីសេសានក្រោម២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។