ពលរដ្ឋខេត្តតាកែវ ដាក់ពាក្យស្នើសុំឲ្យអាជ្ញាធរស្រុក ខេត្ត ជួយសហការបង្ក្រាបបទល្មើសនេសាទក្នុងរដូវបិទនេសាទ បន្ទាប់ពីមានជនជាតិវៀតណាម កំពុងនេសាទដោយប្រើឧបករណ៍ខុសច្បាប់ ដាក់រាយពាសពេញផ្ទៃទន្លេ និងឡូនេសាទនានា ដែលប្រមុខរដ្ឋាភិបាលបានប្រកាសកាត់ពីការគ្រប់គ្រងដោយរដ្ឋ ប្រគល់ឲ្យពលរដ្ឋប្រើប្រាស់ជាលក្ខណៈគ្រួសារ។
អភិបាលស្រុកអង្គរបុរី ខេត្តតាកែវ លោក ឃុន បូរ ថ្លែងគាំទ្រឲ្យពលរដ្ឋចុះបង្ក្រាបបទល្មើសនេសាទ ខណៈមានសេចក្តីរាយការណ៍ថា មានជនខិលខូចលួចប្រើឧបករណ៍ខុសច្បាប់ពាសពេញបឹងព្រែក និងឡូនេសាទ ដើម្បីចាប់យកត្រីនៅក្នុងរដូវបិទនេសាទ ជាពេលវេលាដែលរដ្ឋបាលជលផលកំពុងអភិរក្សធនធានត្រីធម្មជាតិ និងត្រីមេពូជ។
លោក ឃុន បូរ អភិបាលស្រុកអង្គរបុរី មានប្រសាសន៍ដូច្នេះនៅថ្ងៃទី៤ ខែកញ្ញា ឆ្នាំ២០១៤។ លោកបន្តថា ក្នុងរដូវហាមនេសាទ ពលរដ្ឋបានប្ដឹងមកអាជ្ញាធរស្រុក ឲ្យជួយការពារធនធានជលផលដែលកំពុងតែមានជនខិលខូច លួចដាក់លូស្បៃមុង ឬសៃយ៉ឺន និងឡុក (គឺជាឧបករណ៍ដូចស្បៃមុងដែរ តែមានច្រើនខ្សែគិតជាគីឡូដីនៅក្នុងទឹក) ចាប់យកត្រីធំតូច ពិសេសមេត្រីកំពុងពងនៅក្នុងពោះ ទើបលោកគាំទ្រឲ្យប្រជាពលរដ្ឋចុះបង្ក្រាបបទល្មើសនោះ៖ «ព្រោះសហគមន៍គាត់ឃើញករណីណាដែលខុសនឹងគោលការណ៍របស់ថ្នាក់លើ ហើយធ្វើបំផ្លាញនូវមច្ឆជាតិ អាហ្នឹងយើងត្រូវតែការពារទាំងអស់គ្នា ខ្ញុំគាំទ្រអាហ្នឹង»។
សមាជិកក្រុមប្រឹក្សាស្រុកអង្គរបុរី លោក អ៊ុំ គាវ ថ្លែងថា បើអភិបាលស្រុកបើកភ្លើងខៀវឲ្យពលរដ្ឋក្នុងសហគមន៍ចុះបង្ក្រាបបទល្មើសនេសាទ លោកនឹងដឹកនាំកម្លាំងប្រជាពលរដ្ឋ ៦ឃុំ ចុះបង្ក្រាបបទល្មើសនោះ។ លោកថា មនុស្ស ២នាក់មានឈ្មោះ យ៉ាន់ វណ្ណៈ ជនជាតិខ្មែរ និងឈ្មោះ មុត យូ ជនជាតិវៀតណាម ដែលបានអូសទាញអ្នកនេសាទវៀតណាម ឲ្យប្រើឡុក និងសៃយ៉ឺន ដាក់រាយនៅក្នុងទឹករាប់គីឡូម៉ែត្រ ពីព្រំប្រទល់ស្រុកកោះធំ ខេត្តកណ្ដាល ទៅស្រុកអង្គរបុរី ខេត្តតាកែវ និងទៅដល់ព្រំដែនវៀតណាម។ លោកថា ឡូនេសាទនោះ គឺលោកនាយករដ្ឋមន្ត្រី ហ៊ុន សែន កាត់ពីការគ្រប់គ្រងដោយរដ្ឋមកឲ្យប្រជាពលរដ្ឋរកនេសាទវិញ។ ប៉ុន្តែជនទាំង ២នាក់នោះ អាងខ្នងការពារ ហ៊ានប្រើឧបករណ៍ខុសច្បាប់ដាក់រាយក្នុងទន្លេ បឹង ព្រែក ពាសពេញទឹក ចាប់ត្រីក្នុងរដូវអភិរក្ស មិនទុកឲ្យប្រជាពលរដ្ឋក្នុងសហគមន៍អាចចាប់ត្រីនោះបានខ្លះទេ៖ «មិនតែប៉ុណ្ណោះ ឈ្មោះ យ៉ាន់ វណ្ណៈ និងឈ្មោះ យូ នេះ បានចេញលិខិតក្លែងបន្លំឲ្យទៅជនជាតិយួន ជាអ្នកនេសាទមួយសន្លឹកម្នាក់ៗទៀតផង»។
ប្រជាពលរដ្ឋឃុំគោកធ្លក ឃុំអង្គរបុរី និងឃុំផ្សេងៗទៀត កំពុងពិភាក្សាដើម្បីនាំគ្នាទៅបង្ក្រាបបទល្មើសនេសាទ ដែលបង្កផលប៉ះពាល់ក្នុងរដូវបិទនេសាទ។
លោក ណៃ លាន អ្នកភូមិកំពង់ហ្លួង ឲ្យដឹងថា គាត់រង់ចាំចម្លើយអនុញ្ញាតពីអាជ្ញាធរស្រុក ខេត្ត ទើបពលរដ្ឋហ៊ានចុះបង្ក្រាបបទល្មើសនោះ។ លោកថា អ្នកភូមិបានឃើញពលរដ្ឋនៅស្រុកកោះធំ ខេត្តកណ្តាល សហការជាមួយអាជ្ញាធរ ចុះកាប់បំផ្លាញឧបករណ៍ល្មើស ហើយបានដោះលែងត្រីពីឧបករណ៍ខុសច្បាប់ ឲ្យចូលទៅក្នុងបឹងធម្មជាតិវិញ៖ «បទល្មើសនេសាទខ្លាំងក្លាពេក ដាក់របាំងពី០៩ ទៅទល់ចុងព្រែកសឹង្ហ។ ហើយរបាំងទី២ របាំងធំ ដាក់តាំងពីព្រែកដើមគរខាងកើត ឃុំកំពង់ហ្លួង ទៅទល់ទួលវិហារ អាហ្នឹងយកត្រីគ្រប់ប្រភេទ តាំងពីបង្កងអី ចាប់បានទាំងអស់។ ហើយនៅទល់ដែននោះ មួយកភ្លូស អាហ្នឹងច្រើនណាស់»។
ចំណែក លោក ខៀវ ហិត នៅភូមិព្រែកទោល ឲ្យដឹងថា ជនជាតិវៀតណាម មានអ្នកការពារឈ្មោះ យ៉ាន់ វណ្ណៈ ទើបគេហ៊ានចូលបំផ្លាញត្រីធម្មជាតិពីទន្លេ បឹង ព្រែក។ លោកថា ការប្រើឧបករណ៍ខុសច្បាប់នោះ គេចាប់ត្រីបានច្រើនតោន ព្រោះក្នុងទូកមួយគ្រឿង គាត់ឃើញដឹកត្រីរាប់តោនដែលលើកពីឧបករណ៍សៃយ៉ឺនក្នុងមួយខ្សែ។ បើលើកពីឧបករណ៍ឡុកវិញ គឺចាក់ត្រីចាប់ពី ២០ ទៅ ៣០តោនឯណោះ។ បញ្ហាការប្រើឧបករណ៍ល្មើសខុសច្បាប់នេះហើយ ដែលធ្វើឲ្យត្រីធម្មជាតិវិនាសហិនហោច។ លោកថា ត្រីធម្មជាតិត្រូវបានអ្នកនេសាទវៀតណាម ចាប់ពីប្រទេសកម្ពុជា ដឹកយកទៅលក់នៅវៀតណាម ហើយដឹកត្រីគេចិញ្ចឹមយកមកលក់នៅក្នុងប្រទេសកម្ពុជា វិញ៖ «ធ្វើបង្ក្រាបហ្នឹង រៀបចំទូក វាទាល់តែ បួនដប់ម្ភៃទូកអីទៅ ហើយគ្នាហ្នឹងប្រហែលចូល ៥០ ទៅ ៦០នាក់អី បានធ្វើបាន»។
ឈ្មួញត្រីខេត្តតាកែវ ដែលប្រជាពលរដ្ឋចោទថានាំអ្នកនេសាទវៀតណាម មកដាក់ឧបករណ៍ខុសច្បាប់នៅក្នុងឡូនេសាទនានានោះ លោក យ៉ាន វណ្ណៈ ឲ្យដឹងថា គាត់គោរពច្បាប់ជលផល ព្រោះថា រដូវបិទនេសាទ រដ្ឋបាលជលផលហាមដាក់ឧបករណ៍នេសាទខុសច្បាប់។ លោកមិនហ៊ានធ្វើដូចការចោទពីពលរដ្ឋនោះទេ៖ «យើងធ្វើតាមដងស្ទឹងហ្នឹង ឥឡូវមានកន្លែងណាធ្វើ អត់ផង អត់ផង»។
មន្ត្រីជលផលបញ្ជាក់ថា រដូវបិទនេសាទបានចាប់ផ្ដើមនៅខែមិថុនា និងបញ្ចប់នៅខែវិច្ឆិកា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។